Luda yã takada kũ Bisã yão NƐƐMAYA 9

Isarailanↄ ń durunnanↄ ona Ludanɛ

1Mↄ dokↄ̃nↄ pì gↄrↄ baro awɛɛsiikↄ̃dea Isarailanↄ kↄ̃ kàkara kũ lɛ́yĩnaao kũ uta kasanↄ dadana, bùsu ká ń mìn. 2Ò ń zĩda kɛ̃̀ buri pãndenↄa akũ ò zɛna, òtɛni ń durunnanↄ kũ ń dizinↄ yãvãnikɛnanↄ o. 3Ò gↄ̃̀ zɛna gu kũ ò kún, akũ ò Dikiri ń Luda doka takada kyó kɛ̀ńnɛ awa aakↄ̃, akũ ò ń durunnanↄ ò ò donyĩ kɛ̀ Dikiri ń Ludanɛ awa aakↄ̃. 4Levi kenↄ zɛna tìntin kũ ò kɛ̀ńnɛ musu, ò lɛ́ zù Dikiri ń Ludai gbãngbãn. Ń tↄ́nↄn dí: Yesua, Bani, Kadamiɛli, Sebania, Buni, Serebia, Bani kũ Kenanio. 5Levinↄ Yesua kũ Kadamiɛlio kũ Banio kũ Asabaniao kũ Serebiao kũ Odiao kũ Sebaniao kũ Petayao pì:

À futɛ à Dikiri á Luda táaki lɛ́!

À kun zaa káaku ari gↄrↄ sĩnda pínki.

Ò n tↄ́ gakuride bo,

à de gbɛ̃ tↄ́kpana kũ táakiola pínki.

6Mↄkↄ̃mmɛ Dikiri ũ ndo.

N sarapura kɛ̀ kũ n bɛ kũ à kú musuo

kũ pↄ́ kũ ò kú gwenↄ pínki.

N andunia kɛ̀ kũ pↄ́ kũ ò kúnnↄ.

N ísira kɛ̀ kũ pↄ́ kũ ò kú a gũnnↄ.

Ndì wɛ̃̀ndi kpá ń pínkia,

n bɛ malaika dasinↄ dì donyĩ kɛnnɛ.

7Mↄkↄ̃mmɛ Dikiri Luda kũ à Abramu sɛ̀ ũ,

n bo kãao Uru, Kaladia bùsun,

n a tↄ́ lìtɛnɛ Ibrahĩ.

8N è à n náani vĩ a swɛ̃̀ɛ gũn,

akũ n pì n bàka nigↄ̃ kú kãao,

ĩni Kanaanↄ bùsu kpáa kũ a burinↄ,

bùsu kũ Itinↄ kũ Amↄrinↄn kún

kũ Pɛrizinↄ kũ Yebusinↄ kũ Gigasinↄ.

Akũ n lɛ́ kũ ń gbɛ̃̀nɛɛ pìi pàpa,

kũ ń mana yãi.

9N wari kũ ó dizinↄ kɛ̀ Misila è,

n wiki kũ ò lɛ̀ Isira Tɛ̃raii mà.

10N sèedanↄ kũ daboyãnↄ kɛ̀ Firi'aunanɛ,

n sunyĩ kpài kũ a ìbanↄ

kũ a bùsudenↄ ń pínki,

zaakũ ń dↄ̃ lákũ ò ania pãsĩ kɛ̀ kũ ó dizinↄ nà.

N tↄ́ bò lákũ à kun ari kũ a gbãrao nà.

11N ísira zↄ̃̀kↄ̃rɛńnɛ,

akũ ò táa ò gukoria ò bikũ̀.

N gbɛ̃ kũ ò pɛ̀tɛńyĩnↄ zù í lòkoton,

n ń zú lán gbɛ̀ɛ bà í zↄ̃kↄ̃ↄ pìi gũn.

12N do n gbɛ̃nↄnɛ arɛ tɛ́luku gũn fãnantɛ̃,

gwãani sↄ̃ tɛ́ gũn.

N zɛ́ kũ à de ò sɛ́ pùńnɛ.

13N kipa Sinai kpi musu,

n yã òńnɛ zaa musu.

N doka zɛ́de yãpurade kpàḿma

kũ yã mana kũ n dìtɛnↄ.

14N tò ò kámmabogↄrↄ dↄ̃̀ n pↄ́ ũ.

N n yãditɛnanↄ kũ n ↄdↄkio

kũ n dokao dà n zↄ̀bleri Musanɛ

akũ à kpàḿma.

15Kũ nà ń dɛ́, n pↄ́ble gbàrɛńnɛ zaa musu.

Kũ ími ń dɛ́, n í bòńnɛ gbɛ̀sin.

Bùsu kũ n a la dàńnɛ n pì ĩni kpáḿman

n pìńnɛ ò gɛ́ ò sí ń pↄ́ ũ.

16Bee kũ abireo ó dizi pìnↄ karambaani vĩ,

ń sã gbãna kũ̀,

òdigↄ̃ n yãditɛnanↄ kũnaro.

17Ò gì n yã mai,

daboyã kũ n kɛ̀ńnɛnↄ yã sã̀ńgu.

Ń sã gbãna kũ̀ ò bò n yã kpɛ

ò don'arɛde dìtɛ à ɛra à tá kũńwo zↄ̀blen.

Luda, ndì gbɛ̃nↄ durunna kɛ̃ḿma,

ń sùru vĩ kũ wɛ̃ndao,

n pↄ dì fɛ̃ likaro, ń gbɛ̃kɛ vĩ zↄ̃kↄ̃,

akũ ńdi pã kpáńyĩro.

18Bee kũ ò mↄ̀ↄ kàsa lán zùsanɛ bↄ̀rↄↄ bà,

ò pì ń dikiri kũ à ń bↄ́tɛ Misilan gwe,

akũsↄ̃ ò dↄkɛ̀ kũnwo manamana,

19ńdi pã kpáńyĩ gbárannanlo

n wɛ̃nda zↄ̃kↄ̃ yãi.

Tɛ́luku pìi dòńnɛ arɛ à zɛ́ mↄ̀ńnɛ fãnantɛ̃,

tɛ́ pì zɛ́ kũ à de ò sɛ́ pùńnɛ gwãani,

adi ń tón zikiro.

20N n Nini kpàḿma à yã dàńnɛ.

Ńdi ń tɛ̃ manaro,

kũ ími tɛni ń dɛ, n ń gbá í.

21N ń gwá gbárannan wɛ̃̀ bupla,

pↄ́ke dí kĩaḿmaro.

Ń pↄ́kasanↄ dí yakaro,

ń gbá dí sɛ́sɛro.

22N burinↄ kpàḿma kũ ń bùsunↄ,

n ń bùsuu pìnↄ kpàatɛtɛńnɛ míↄmiↄ.

Ò Ɛsɛbↄ̃ kína Siↄ̃ bùsuu sì ń pↄ́ ũ

kũ Basã kína Ogu pↄ́o.

23N tò ń burinↄ dasi kũ̀ lán susunɛnↄ bà,

n gɛ̃ kũńwo bùsu kũ n ò ń denↄnɛ ò gɛ́ ò sí ń pↄ́ ũ gũn.

24Kũ ń nɛ́nↄ gɛ̀ɛ ò bùsuu pìi sì ń pↄ́ ũ,

akũ n Kanaa kũ ò kú gwenↄ kã dɛ̀ńnɛ,

n ń náńnɛ ń ↄĩ kũ ń kínanↄ ń pínki,

n bùsuu pìi burinↄ kpàḿma,

ò ń pↄyeinaa kɛ̀ḿma.

25Ò wɛ̃tɛ bĩnidenↄ sì kũ zĩtɛ manao,

ò kpɛ́nↄ sì kũ pↄ́ mana kũ ò kunnↄ

kũ lↄ̀gↄ kũ ò yↄ̃̀nↄ

kũ geepi búnↄ kũ kùkpɛnↄ

kũ lí kũ òdi a nɛ́ blenↄ à kɛ̀ zↄ̃kↄ̃.

Ò pↄ́ blè ò kã̀ ò mɛ̀ɛ kpà,

ò nnamanaa mà n arubarika zↄ̃kↄ̃ yãi.

26Bee kũ abireo ń sã gbãna kũ̀,

akũ ò bò n yã kpɛ ò kpɛ lì n dokanɛ.

Ò annabi kũ ò lɛ́ dàḿma

de ò summanↄ dɛ̀dɛ,

ò dↄkɛ̀ kũnwo manamana.

27N ń ná ń ibɛrɛnↄnɛ ń ↄĩ,

ò gbãna sùńnɛ,

akũ ò wiki lɛ̀mma ń warikɛnaa gũn.

Zaa musu n ń wɛ́kɛ sì

n wɛ̃nda zↄ̃kↄ̃ yãi,

n surabarinↄ dìtɛńnɛ,

akũ ò ń bó ń ibɛrɛɛ pìnↄ ↄĩ.

28Tó ò a yĩda lè,

òdi ɛra ò yã kũ à vãninnɛ kɛmɛ,

akũ n ń kpá ń ibɛrɛnↄa,

ò gbãna blèḿma.

Ò ɛ̀ra ò wiki lɛ̀mma,

akũ zaa musu n ń wɛ́kɛ sì,

n ń bó gɛ̃̀n ũgbangba n wɛ̃nda yãi.

29N lɛ́ dàḿma ò arɛ dↄ n dokaa,

ama ò dↄkɛ̀ kũnwo òdigↄ̃ n yãditɛnanↄ kũnaro,

yã kũ tó gbɛ̃ kũna anigↄ̃ kun a gãi.

Ò zã̀ n yã pìnↄa ò kpɛ lìnnɛ,

ń sã gbãna kũ̀ ò gì n yã mai.

30N mɛna kũńwo a wɛ̃̀ dasi,

n Nini yã dà n annabinↄnɛ,

akũ ò lɛ́ dàoḿma, ama odi sã dↄiro,

akũ n ń ná buri pãndenↄnɛ ń ↄĩ.

31N wɛ̃nda zↄ̃kↄ̃ↄ gũn ńdi ń lákaro,

Luda sùrude wɛ̃ndadↄ̃nnɛrimɛ n ũ,

ńdi pã kpáńyĩro.

32A yã mɛ́ à tò ó Luda,

ń zↄ̃kↄ̃, ń gbãna akũsↄ̃ ń naasi vĩ,

lákũ n bàka dìgↄ̃ kú kũoo n gbɛ̃kɛ gũn nà,

wari kũ à ó lé

kũ ó kínanↄ kũ ó don'arɛdenↄ

kũ ó sa'orinↄ kũ ó annabinↄ

kũ ó dizinↄ kũ n gbɛ̃nↄ ń pínki

zaa Asiria kínanↄ gↄrↄ ari kũ a gbãrao,

ǹsun tó à kɛnnɛ fítiro.

33Yã kũ à ó lénↄ pínki musu ń mana,

bee kũ o yã vãni kɛ̀, ń náani vĩ.

34Ó kínanↄ kũ ó don'arɛdenↄ

kũ ó sa'orinↄ kũ ó dizinↄ

odi zĩ kɛ n dokaaro,

odi laakari dↄ n yãditɛnanↄaro

ke lɛ́ kũ n dàḿmanↄ.

35Bee gↄrↄ kũ ò ń zĩda vĩ

akũsↄ̃ ò pↄ́ mana dasi kũ n ń gbánↄ vĩ

kũ bùsu yàasa tↄkↄtɛde kũ n kpàḿmao,

odi donyĩro odi kpɛ li ń yã vãninↄnɛro.

36Ǹ gwa! Zↄ̀nↄn ó ũ gbãra.

Bùsu kũ n kpà ó dizinↄa

ò a línɛnↄ kũ a pↄ́ mananↄ ble,

zↄ̀nↄn ó ũ a gũn.

37Kína kũ n tò ò kí blewánↄ

ó búgbɛ yàasanↄ gↄ̃̀ ń pↄ́ ũ ó durunnanↄ yãi.

Òdi kí blewá kũ ó pↄ́kãdenↄ

lákũ ò yei nà.

Ó kú wɛ́tãmma zↄ̃kↄ̃ↄ gũn.

38Yã birenↄ yãi pínki ótɛn lɛ́dokↄ̃nↄ kɛ kũnwo kũ yãpurao ótɛn kɛ̃ takada gũn. Ó don'arɛdenↄ kũ Levinↄ kũ ó sa'orinↄ tɛni ń sèeda kɛa.