1À lɛ̀ dufu sí Dikirinɛ,

andunia gbɛ̃ sĩnda pínki, à lɛ̀ sí Dikirinɛ.

2À lɛ̀ sí Dikirinɛ à a tↄ́ bo,

àgↄ̃ a surabana baaru kpá lákũ gu dìgↄ̃ dↄ nà.

3À a gakurikɛyã o burinↄnɛ,

à a yãbonsarɛnↄ baba gbɛ̃ sĩnda pínkinɛ.

4Dikirin zↄ̃kↄ̃, à kà ò a táaki lɛ́,

à kũ̀ ò vĩna kɛnɛ de tãnanↄla ń pínki.

5Burinↄ tãnanↄ bi pↄ́ ginanↄmɛ,

ama Dikiri mɛ́ à musu kɛ̀.

6Zↄ̃kↄ̃kɛ kũ bɛ̀ɛrɛɛo kúa,

gbãna kũ gakurio kú a kúkiamɛ.

7À gakuri kũ gbãnao dↄ̃ Dikirinɛ,

bùsu sĩnda pínki gbɛ̃nↄ, à dↄ̃ Dikirinɛ.

8À Dikiri tↄ́ gakuri dↄ̃nɛ,

à mↄ́ kũ gbao à gɛ̃o a ↄnn.

9À donyĩ kɛ Dikirinɛ a kúadona manakɛn,

zĩtɛdenↄ, àgↄ̃ luka a arɛ á pínki.

10À o burinↄnɛ, Dikiri tɛn kí ble.

Andunia katɛna gíngin, à yĩgãna vĩro,

ani yãkpatɛ kɛ kũ gbɛ̃ sĩnda pínkio a zɛ́a.

11Musudenↄ, à pↄnna kɛ,

zĩtɛdenↄ, à vĩ kũ pↄnnao,

ísira kũ pↄ́ kũ ò kunnↄ, à kĩni kɛ.

12Sɛ̃̀ntɛ kũ pↄ́ kũ ò kunnↄ, à pↄnna wiki lɛ́,

lí kũ ò kú dàkoo gũnnↄ, à ayuwii kɛ á pínki.

13Oni pↄnna kɛ Dikiri arɛ, zaakũ àtɛn su,

àtɛn su yãkpatɛ kɛ kũ anduniao.

Ani yãkpatɛ kɛ kũ anduniao a zɛ́a,

à yã gↄ̃gↄ̃ gbɛ̃nↄnɛ kũ yãpurao.