Bibeli Luayãtaalá Yáasiↄ 2

Tɛa ↄ̃nↄi ài

1Ma nɛ́, tó n ma yã́ sì,

mɛ́ n ma yãdilɛaↄ kũa n sↄ̃u,

2tó ńlɛ swãdↄ ↄ̃nↄyãi,

mɛ́ n sↄ̃ kpà a dadaawa,

3tó n lɛzù laaizi,

mɛ́ n wiilɛ̀ yãdadaai,

4tó n kpálɛkɛ̀i ã́nusu ũ,

mɛ́ n wɛ̀ɛlɛ àizɛɛ ulɛa ũ,

5ńyↄ̃ vĩakɛa Diiɛ midↄ̃ sa,

ní Lua dↄ̃a e.

6Asa Dii mɛ́ ì ń gba ↄ̃nↄ,

dadaa ń dↄ̃ao ì bↄ aà kĩ́iɛ.

7A kã́fĩa zɛ́ kũa gbɛ̃maaↄnɛ,

a dɛ sɛ̀ngbao ũ tàaesaideↄnɛ.

8Ì ↄlia gbɛ̃maaↄzi ń táa'oau,

ì a yãmanaↄ dↄ̃́a ń yã́ píi kɛa guu.

9Ńyↄ̃ yã́zɛde dↄ̃ sa ń yã́ dↄ̀ↄdeo

ń yã́ pↄ́ zɛvĩo ń maa píi zɛ́o.

10Asa ↄ̃nↄ a mↄma,

mɛ́ dↄ̃a a n kã́si.

11Kua ń laaio a n dↄ̃́a,

yã́zɛdↄ̃a a ↄlianzi.

12A n bↄ gbɛ̃vãiↄ zɛ́u

ń yãbɛ̃ɛkɛnaↄ ↄzĩo.

13Gbɛ̃́piↄ pã̀alɛ yãmaa zɛ́ɛ,

aa gusia zɛ́ sɛ̀.

14Aaì pↄnakɛ ń vãikɛao,

aaì vĩ aaↄ kɛ̃aa ń yãbɛ̃ɛ faasaio.

15An kɛkɛá faa vĩo,

aaìↄ yãkɛ ń kↄ̃nioɛ.

16Ɔ̃nↄpi a n bↄ káalua ↄzĩ,

a n si nↄɛ pãle yã́ nana oanɛwa.

17Nↄɛpi pãkpà a nɛnↄn gↄ̃i,

à a Lua bàa kuaanↄ yã́ gbòo.

18Aà bɛ ì mipɛńnↄ gawaɛ,

aà kpɛ́ zɛ́ ì táńnↄ bɛdau.

19Gbɛ̃́ pↄ́ gɛ̃̀aàzi lí nↄ̀sɛlilɛo,

ìli wɛ̃ni zɛ́ le lↄo.

20Ɔ̃nↄpi a n da gbɛ̃maaↄ zɛ́wa,

níↄ dↄ̀ↄdeↄ zɛ́ kũa.

21Asa nↄ̀sɛpuadeↄ mɛ́ aa gↄ̃ bùsu vĩ,

tàaesaideↄ mɛ́ aaↄ ku a guu.

22Vãikɛnaↄ sↄ̃, wa ń yá ń bↄlɛuɛ,

wa náaisaideↄ kpoɛuɛ.

Notes

*2:4 Mat 13.44