ISAIAH
LEKHABU
Isaiah Lekhabu Sung Thu Umdan
Hou thu toh kitoh-a nia hingkop nahetkhah em? Isaiah mite chu aphalhem jengin anahingun, hindan akheluva, Pathen henga ahung kilenadiu le alungthim pumpiuva Pathen angailutna diuvin, amite chu anakhoukhah-in ahi. Isaiah Lekhabu hin Thulhun luiya um thil tampi suhmiltheilou akijihlutnin, hiche lekhabu hi tuni chanin thaneitah ahi. Amite chunga Pathen kitahna, chule ahung lhung ding leiset kichai kahsea dinga Pathen mihuhhingna lampi mutheina ahi. Isaiah-in Jesu thudolla simjou hoi hilou akhang khangin Leng Huhhingpu ahou ding dan gaovin aphongdohin ahi.
Ajihpa, Akijih Kum chule Ajihlona
Amoz chapa Isaiah themgaopa sut ahi. Isaiah themgaopa hi Judah gam sah-solam lenggama anacheng ahi. Chule Isaiah themgaopa phatlai hin Israelte Northern Kingdom gamkai chu Assyriate khut noiya anaumuvin ahi. Hichun kum jabi 722 BC lai chun Northern Kingdom chu suhmang dingin anaumin ahi, hichun Isaiah themgaopan Judah gamsunga “Nalungheiyun” ti’n thu analhangsamin ahi.
Isaiah Lekhabu hi 740-680 BC phat sunga Judahte lengvaipoa anapang — Uzziah, Jotham, Ahaz, chule Hezekiah-teho lengvaipoh phat laitaha chu Isaiah themgaopan anasut ahi. Isaiah bung 1-39 sunghi ministry hung kipat til lai — hichu (740 BC) vella anasut ahi’n, chule bung 40-66 na sung hi ama hinkho kichai ding kon langa chu anasut ahi (680 BC vel chu ahi). Isaiah themgaopan hichehi adehsetna Jerusalema thua anaseiya chule anasuttho ahi.
Isaiah Lekhabu ajihna ajeh pen chu ahileh Judah mite achonsetnauva kon’a alungu ahin heiyuva a-Pathen heng lamuva ahung kinungle kitnuva, chule Pathen mihuhhingna chu Messiah-a kon bou ahi ti hilchahna dinga anasut ahi.
1Amoz chapa Isaiah-in Juda lengho Uziah, Jotham, Ahaz leh Hezekiah phat laiya Judah le Jerusalem chungchang gaova thil amuho:
Kiphinjinga um Judahte Hilchahna
2Vanho ngaiyun! leisetnin phaten ngaiyun! Pakaiyin asei chu hiche hi ahi: “Kahin vahkhang leh kahin seiletsah chaten kachungah nachonseuvin neidou tauve. 3Bongchal jengin jong apupa akihetnin, chule Sanganin jong apu’n apehna kong akihetnin, ahinlah kamiten vang amaho kahin vahkhang dan ahephapouvin, Israelin apupa akihettapoi. 4Ohe themmona dimsette chonse nam mite, gitlouna thilbol chilhahho; themmona dimset mite, hiche mite hin a-Pakaiyu adalhatauvin, Israel Mithengpa chu donselouvin akoiyun ajamsan tauve. 5Ipi dinga gimbolna ding nakikou bebeu hitam? Itih chan gei neidou nahlai diu ham? naluchang apumin anatan, nalungchang jong ana’n ahi. 6Nakengtoa pat nalujang chan adam lai mong mong aumtapon, akita-dupna jeng, apat lai jeng chule athi lonna maha jeng ahi’n, anaikolin, tom jong akitompon, thao jong akinupoi. 7Nagamsungu jong ahomkeovin alumtan, nakhopiu jong akavamtai. Namitmu tah'un gamdang miten nagam’u alosohtan, thil jouse amitmuva amu jouseu asusetauve. 8Jerusalem khopi hoitah chu lengpi leiya buh kisong tobang leh changmai leiya buh kisong bangin, akidalhan avengbit ding umlou khopi abangtai. 9Pakai van-khopi sepaihon eiho themkhat jeng jong eivenbitlouvu hileh Sodom le Gomorrah tobanga thehngima ium diu ahi. 10Sodom khoa vaihom lamkaihon Pakai thusei ngaiyun lang, Gomorrah miten Pathen dan thupeh ngaiyun. 11Pakaiyin aseiye: “Nakilhainau jouseu hi ka-ipi phatchomna umdinga nagelluham? Keiman kelngoichal pumgo thilto le gancha kivah thaotahtah jong kaneiye. Keiman bongchal tampi thisan leh kelngoi thisan chule kelcha thisan hijongleh kakipapipoi. 12Keima eihou dinga nahung tenguleh koiham nakithoinau puma ka-inpi chonthang dinga nakouvu? 13Pannabei thiltoho chu hinpolut tahih-un, nagimnamtuiyu jong keima dinga thet-umtah ahi! Lhathah nikho, Sabbath nikho chuleh achombeha na-anngol nikho manhou chonset bulom leh adihlou ahi. Nakikhopkhomnau jong kadeitapoi. 14Nalhathah kut bolhou, kumlhun golnop nabolhou jong keidinga pohgih bep ahin, abonchan kapochimtan, kakidah ahitai! 15Vanlam sanga nakhut-u natundohuva natao tengu jongleh kahungvetnuva nataonau kangailhahpehlou ding ahi. Ajeh chu khohelouho thisan nakhutnuvah adimsetne. 16Nangho kisilngimuvin lang chule kisuthengun! Nachonset nau chu kamitmun paimangun, nachonset nau lampi chu dalhauvin, 17Thilphabol dan kithemchuh-un, thudih chu holun. Bolgentheina thoh ho chu panpiuvin, naochagaho chu thu adih-in tanpeh-uvin lang, vengphauvin. Meithaiho chu thildih jeng seipeh-un.” 18Pakaiyin hiti hin aseiye, “Hungun kihoutoh-u hite. Nachonset nau chu thisan bangin san jongleh buhbang banga kabansah ding, sandup jeju jongleh kelngoi mul jolsel tobanga kajolsah ding ahi. 19Kathupeh nanit-uleh nanghon nehlechah ninglhingset’na nanei diu ahi. 20Ahinlah kathupeh nanitlou-uva nakiheimangsanule namelmateu chemjama lousoh helding nahiuve, tia na-Pakaiyu keiman kaseipeh nahitauve!”
Kitahlou Jerusalem Mite
21I-atileh Jerusalem khopi kitahtah chu notia pang jenga hitam? Thu adih-a kitanna khopia chun tuhin tolthana jengin aumtai. 22Nadangka thih chu twieh asohgamtan, nalengpi twi chihtah chu twi toh akichohhal gamtai. 23Namilen milalteu jong doumahmah bolin apangun, gucha michomho jol le golin apang tauve. Nehguh chahguh adelleleuvin, nulou palouho thule meithaiho thujong adih-in atanpeh nom tapouve. 24Hijehchun Pakai, vantil galsatte Pakai Hatchungnung, Israel Pakai chun aseiye, “Keiman kamelmate chunga phuba kalah ding ahi. 25Nachunga kakhut kalha ding, nathih-eh thengsella kathehngima nasum kilhajol chengse kaloikhensohkei ding ahi. 26Chutengleh thutan vaihomthemho masang banga kahinpeh kit ding, Jerusalem khopi chu Thudih-a Kivaihomna Khopi chule Khopi Kitah tia kisei kit ding ahitai,” ati. 27Zion chu thudih-a akitan teng kiledoh kit ding chule akisihho chu chonphatnaa kiledoh kit diu ahitai. 28Michonseho vang suhmanga umding ahiuve, ijeh-inem itileh amaho Pakai hengah akile nompouve. 29Namilim hounau leh aguh-a gangpithing noi laha nachonnau leh milim houna'a nakipehdohnau jeh'a jumleja nathoh diu ahi. 30Anagopsa gangpi phung nabah diu, chule twilutlouna honlei toh nabah diu ahi. 31Nalahuva ahatpenpa jong chu changpol tobanga mangthah ding; athilbol dihlouhou chu meisipah mei chohkaiya pang ding, amaho le athildihlou bolhou chu meikong lah-a kachaiyintin, chuleh meikong chu aphelmit thei ding koima umponte.