JACOB
JACOB LEKHA THOT
Tahsan anatoh in asodoh
Nasei chu bol in: natahsan dung juiyin hingin!
Jacob lekhabu sung thu umdan
Jacob hin koima dat neilouva adih chu seijeng ahi ti geldoh masan. Ajeh chu aman maipha velouva Pakai lunglhaina bou ahol ahi. Ama hin lungput dihlouho le chonna dihlou ho thudol asei ahi. Aman thupeh somnga le li vei einei nau alekhabu jih sunga hin akimun, aman tahsanna hinkho theng le adih chu iti manding ahi eiseipeh uve Jac 1:27. Ama thuhil hi Kitepna Lui (OT) a Thuchihbu tobang ahin chule Kitepna Thah (NT) a Pakai Yeshuan Mol chunga athuhil Matt 5:7 banjopna ahi. Athuhil hi ngailutna neiya, kineosah a, chule thoh hattah'a i-nitin hinkhouva isodoh diuvin eitemun ahi. Jacob hin ithusei nau lei hi ithunun louva ahileh aphat loudan, chule mihaoho khohsah a, avaicha ho ijaselouna, hou kikhopna mun'a bollou ding ahi thujong eiseipeh uve (Bung 2). Kiletsah hoithoa umho le Pathen alung gel-a jana neilou ho umchan juilouva, Pathen ging a, Pathen'a kingaiho kineosah a chule Pathen tahsanna hinkho man joh ding thua hilna eineiyu asung thu nasim teng nahet chet ding ahi.
Lekhathot jihpa chule ajih kum
Hiche lekhabu jih dinga ginchat umpen chu Pakai Yeshua penjouva Joseph le Mary in ahinlhon chapa masapen Jacob hi ahi. Amahi Jerusalem Houbunga lamkai, Houbunga le gamkaiya thusei jathei mi khat in akihei (Sol. 15:13-21). Hiche lekhabu hi Kitepna Thah (NT) a akijih masa loitah AD 40 le 50 sunga kijih hinte tin, ginchat aume.
Ipi dinga ajih ham?
Christian hinkho kitihi itahsan chu anatoh a sodoh ding ahi, tithua Christian ho hilna dinga Jacob lekhathot hi kijih ahi akiti 2:14-20. Hiti chun tahsan le natoh kiti hi kithokhom, hing khom'ah ahi. Yeshua natahsan le Yeshua bolbol apha chu bol'in tina ahi.
Salam thu
1Hiche lekhathot hi Pathen le Pakai Yeshua Christa soh, Jacob a kon ahi. keiman Judah mi atahsan ho Israel phungsom le ni gamtina kithecheh ho henga dinga kajih ahi. Chibai! 2Sopi deitahteho, nangho hahsatna hon nahinphah tenguleh, hichu hachangpa kipana dinga chanpha changin kingaitouvin. 3Ajehchu natahsanu chu akipatep tengleh, natahsan chu khanglen ding ahi ti naheuve. 4Hijehchun khansah un, ajeh chu nathoh hatnau chu ahung khan'a abulhin tengleh nangho nabulhinuva chule nachamkim uva, imacha kiphahsamna neilou nahi dingu ahi. 5Nanghon chihna na-ngaichat uva ahileh, hongphaltah IPathen'u koma chun thum'un, chutileh Aman napeh dingu ahi. Nathum jeh uva chu Aman nahouset louhel dingu ahi. 6Hinlah Ama koma nathum tenguleh Pathen bou natahsan chu kicheh hen. Lunglinglau hih un, ajeh chu atahsan detlou mi chu twikhanglen kinong le detna neilou huimut lon le tobang hiding ahi. 7Hitobang mi chun Pakaiya kona imacha muding kinepna neihih hen. 8Amaho kiphaldohna chu Pathen le vannoiya kihom khen'ah ahiuvin, chule abol jouseu chu detna neilou ahiuve. 9Tahsan cha avaicha hon kisonna ding khat chu aneiyuve, ajeh chu Pathen in amaho ajabol ahitai. 10Chule mihao ho chu Pathen in asuhnemu chu kithang-atnan neijou hen. Amaho chu loujaova pahcha neocha tobanga mola ahitauve. 11Nisa sat chu ahungsa cheh cheh in hampa chu asang gop in: Pahcha neocha chu apul in chule ahoina jong amollha jitai. Hitobang a chu, mihaoho jong athilbol doh jouseu toh mollha jeng diu ahiuve.
Lhepna le patepna
12Patepna le lhepna a thoh hattah'a pang ho chu Pathen in phatthei aboh ding ahi: Chujoutah chule Pathen in Ama ngailuho athutep hinna lallukhuh chu amahon asan dingu ahi. 13Chule nanghon lhepna nato tenguleh geldoh un, “Pathen in eilhep patep ahi” tin hinsei hih beh un. Pathen chu thil dihlou bol dingin akilhem patep khapoi chule Ama chun koima alhem khapoi. 14Lhep patepna hi eima ho lung ngaichatna a hung kipanjia hichun eidoha boljiuva chule eipui mang jiu ahi. 15Hiche lung ngaichatna ho hin chonset natoh ahin sodohji ahi. Chule chonset chu akhangtou dia akiphal teng leh, hichun thina ahin sohdoh ji ahi. 16Hijeh chun sopite, puimang theiyin umhih'un. 17Ipi hileh apha le achamkim chu I-Pau Pathena hungkon ahi, Ama chun van hoa vah jouse asem ahi. Ama akichonle theile banga kikhel jing ahipoi. 18Ama chun eiho dinga Athutah chu eipeh tah jeh uva pengthah dia eilhendoh u ahi. Chule eiho hi athilsem jouse lah a agou manlu tah chu ihung hiu ahitai.
Thungaina le natohdohna
19Kasopi deitahteho, hiche hi heuvin, nangho thungaina lama gang uvin lang, thuseiyin kino hih un. 20Mihem lung hanna hin Pathen ngaichat chonphatna ahin lhutpoi. 21Hijeh chun, anen anamse chule na hinkhouva aphalou jouse chu paidoh un, chule Pathen in nalunguva akhum Thu chu kisanun, ajeh chu hichun na lhagaovu ahuhhing thei ahi. 22Pathen Thu chu moh ngaitho hih un. Pathen Thun asei chu bolteiyun. Achuti louva ahileh nang le nang ki-ngolbol nahi ding ahitai. 23Ajeh chu nangman Thu chu nangaiya chule najui louva ahileh, phatvet a namai vea tobang nahi ding ahi. 24Nangma le nangma nakivet jouva nache mang tengleh, itobang lim pua nahi nasumil jitai. 25Hinlah nangman nachamlhat sahthei achamkim kei dan chu chingthei tah'a navet a, chule hichun ipi asei nasuh mil louva najui leh, Pathen in hichu nabol jeh a phatthei naboh ding ahi. 26Nangma hou ngaisah a nakigel a ahia nakam nathunun louva ahileh, nangma tah kingol bol nahin, na Pathen hou chu pannabei hiya ahi. 27Pa Pathen mitmua hou thengsel le adihtah chu–meithai ho chule nuneilou le pa neilou ho alunglhah nauva gakhotoa chule vannoiyin suhboh ding jahnom lou hiya ahi.