1Ngakoija Leviathan namat thei ding ham? Ahiloule aha a khaokol nabu peh thei ding ham? ✡ 2Anahhom sunga khao nathil lut theija, ahiloule akhalhang thihhem a nasut vang thei ding ham? 3Nakhoto ding ngeh na a, hung taova ahiloule nalainat pi dinga hung tao tuntun nam? 4Ahinkho a nasoh a panga nanatong dinga nanop peh ding hinam? 5Nangin hiche khu vacha banga nangailut bol thei hiya, ahiloule nachapang neunu kichepna dinga napeh thei ding ham? 6Kivei mihon athiljoh nau mun ho a joh dinga ahung kichoh diu hinam? 7Avun khu tengcha a nasut khah theija, ahiloule aluchang ngathal a nakap khah thei ding ham? 8Achunga nakhut ngam in lang hile chun kidounan ahin jui ding khu geldoh in natin, avel a nabol patep kit lou hel ding ahitai. 9Ahipoi hiche mat ding got chu phatchomna bei ahin, sadel hatpa thiltup jong chu kisuhnem peh ding ahi. 10Chuleh a itih a koima chan asuhnoh phah ngamlou ahin, koiham kamasanga ding ngam ding chu. 11Kangaichat pet tah a kalepeh kit ding thil eipe chu koi ham? Vannoija thil umjouse hi keija ahi. 12Leviathan tibah ho hoidan chuleh athahat oupe dan chule agongso hoidan ho kasei nomme. 13Avun khu kon alahdoh peh theija chule athoa um agalvon khu kon amulet pai thei ding ham? 14Akhalhang khu kon akal keh a ahondoh ding ham? Ajeh chu aha khu tijat jat um behseh jeng ahi. 15Alip ho chu pho banga agol gol a detchet a mahor kinam banga thakhat'a kinam detchet ahi. 16Kimatchet a umkhom ahijeh chun akah a hui jangkhat cha jong alut theipoi. 17Alip khat chu aban'a alip chunga hub eh detchet a, khat leh khat kikam toa kimulet pai theilou ahi. 18Anah akhon tengle avahlap lap jengin, amitchang teni jong jingkah nichangsat pet toh abange. 19Akamsunga konin meisi apahlah lah jin, meikou ahung vahdoh ji'e. 20Meichunga twibel kisonga, twihu pot bangin anahhomma konin meikhu ahung kitung doh ji'e. 21Akamsunga konna meikou alendoh ji jeh chun, ahai husa chun meihol ahal kou jeng jin ahi. 22Leviathan ngongchang thahatna chun chene jouse a kichat tijatna asosah e. 23Aphe ho chu atah in chuleh adetchet in, akimulet thei poi. 24Alungchang chu song bangin atah in sumhei song bangin atah e. 25Ahung kithodoh tengle thahat chungnung ho akicha jiuvin, kichat tijatnan amanchah kheh jin ahi. 26Chemjam, tengcha, thalchang ahiloule tengcha neoho khat chan asutang joupoi. 27Thih jong imacha ahisah poi. Hiche thilsem ding hin changpol tobangbep bou ahin, chuleh sum-eng jong thing motsa tobangbep ahi. 28Thalchang in adeljam joupon, song aboma kisep jong chu hampan ajepkhah abang bep e. 29Akivoh ho jong chu ham donthah toh abahsah in chule tengcha neu euvel vul hung leng jong chu anuisat bep e. 30A oipoh chu haihal hemtah tobang alip in atom in ama chena nung chu loukai nang pan lou akainangna nung abahsah ji'e. 31Leviathan chun twi lah'a aum tengle twi chu belphul abahsah ji'e. Twikhanglen tojong thao kiloijol abahsah jin ahi. 32Twi lah'a ache tengle twi kinong ho chu aval lah lah jin, gah vet ding'in twikhanglen chu akang in akilang ji'e. 33Leiset chunga ama kibahpi aumpon, ama tobanga kichat neilou thilsem ganhing dang aumpoi. 34Thilsem ganhing jouse lah a akiletsah pen ahin, amahi ganhing jouse leng ahi.