1O Pathen, phat sottah masanga kapu kapateo khanglai a nanatoh nathil bolho eina seipeh u chu keiho tah in kanakol un kanajaove: 2Nangin nangma helou namtin vaipi ho naban thahat in nana deljam in agam leiset uchu kapu kapateo nanapen ahi. Nangin agalmiteo nana suhlhuh peh in kapu kapateo chu nana chamlhat sah in ahi. 3Amahon achemjam uva gal anajouva gam analah u ahipoi; abanthahat uva jong gal anajou ahipoi. Amavang nangma ban thahat leh namaivah chun gal nana jopeh ahibouve ajeh chu nangin amaho chu nana ngailun ahi. 4Nangma kalengpa le kaPathen nahin nangin Israel te dingin gal nana jo peh tai. 5Nangma thahatna jal a bou kagal miteo kanungno jouva ahin naming a bou keihon eidouhou kachotphao ahibouve. 6Keiman kathalpi kasongpoi, kachemjamin eihuhdoh dingjong kakinempoi. 7Nangma bouvin kagalmi teo chunga galjona neipeh u ahibouve, hitihin nangin eihotbol teo chu jumna napejin ahi. 8O Pathen nangin nilhum kei kei in naloupina nasamphongin namin kathangvah jinge. 9Ahinla tunvang nangin jumthetna neipaidoh u ahitai. Nangin ka sepia hou jengjong neilamkai peh tapouve. 10Nangin kagalmi teu vakon in neinung jamsah un chuleh eidou houchu kagamsung u nalosah tai. 11Nangin kelngoiho bangin eikisat chen chen sah gamtaovin chitin vaipi lah a neithe thang gamtaove. 12Nangin nasahlut namitehi manbai tah in najohdoh in man neilouhel toh nabah sahtai. 13Nangin kaheng kakomhou noise neichansah taovin kavelluva mite taitom le houset dingbep in neikoitaove. 14Nangin amaho totthang hoina bepseo neihisah taovin isahlou tah in alu eihih khum taovin ahi. 15Ki taitom jingna a konhin kakile doh jouta pouvin kamai uva jumleh jachat mel kapu den taove. 16Kajah uhi eitaitomteo housetna thucheng ngen ahin, kamit uva kamu houhi ahileh kachunguva phula nom dougal mite ngen ahiuve. 17Hichenghi kathoh jeng vangun keihon nangma kasumil deh pouvin ahi. Kitepna thuchengho jong kasukeh deh pouve. 18Kalung thim un nangma kanuse deh pouvin nalampia konin jong kajam mangdeh pouve. 19Hinlah nangin sial chenna neldi gam anei suchipden taove, nangin thina le muthim neikhu khum taove. 20Ijemtia keihon kaPathen u min kasuh mil uva ahilouleh gamdang semthu Pathen houna a kakhut u kalhandoh khah uva ahileh, 21Pathen in ahet teiding ahi ajeh chu aman mihem lungthim a thuguh jouse ahet ahi. 22Ahin, nangma jal in niseh in eiki thatnun; kelngoi bangin eiki that taove. ✡ 23O Pakai hung thoudoh in ibol a na imut ham? Hung thoudoh in! neipaidoh pai pai hihbeh un. 24Ipi dinga namai naheimang ham? Kathohgim naoleh eibolset naohi nanahsah lou hitam? 25Keiho leivui lah a kalhumat gam taove, bonlhoh lah a akhupbon kakijam taove. 26Hung kipatdoh inlang! Neikithopiuvin! Nami ngailutna longlou chun neihung lhatdoh taovin.