યરૂશાલેમની માપણી
1મેં ઊંચે નજર કરીને જોયું, તો હાથમાં માપવાની દોરી લઇને એક માણસ ઊભો હતો. 2મેં તેને પૂછયું, “તું ક્યાં જાય છે?”
ત્યારે તેણે મને કહ્યું, “યરૂશાલેમને માપવા; તેની પહોળાઇ કેટલી છે અને તેની લંબાઇ કેટલી છે, તે જાણવા સાંરુ.”
3પછી મારી સાથે જે દેવદૂત વાતો કરતો હતો તેણે મને છોડી દીધો અને બીજો દેવદૂત તેને મળવા ગયો. 4બીજા દૂતે કહ્યું, “દોડતો જઇને પેલા જુવાનને કહે કે,
‘યરૂશાલેમમાં માણસો અને ઢોરોની એટલી વસ્તી હશે કે
તેની ફરતે કોટ નહિ બાંધી શકાય.’
5કારણ, યહોવા કહે છે કે,
‘હું પોતે જ તેની ફરતે અગ્નિનો કોટ બનીને રહીશ અને હું
મહિમાપૂર્વક તેમાં વાસ કરીશ.’ ”
દેવ પોતાના લોકોને ઘેર બોલાવે છે
6યહોવા કહે છે;
“જાઓ, ઉત્તરના પ્રદેશમાંથી નાસી છૂટો.
આકાશના ચાર વાયુની દિશાઓમાં મેં તમને ફેલાવી દીધા છે.
7બાબિલમાં વસનારા સિયોનના લોકો નાસી જાઓ.”
8સૈન્યોનો દેવ યહોવાએ મને સન્માન લાવવા માટે મોકલ્યો છે
અને તમને લૂંટનારી પ્રજાઓ પાસે મોકલ્યા છે,
કારણ, જે તમને અડે છે તે તેની આંખની કીકીને અડે છે.
9જુઓ, યહોવા કહે છે, “હું તેઓ પર મારો હાથ ફરકાવીશ
અને તેઓ તેમના સેવકોને હાથે લૂંટાશે,
અને ત્યારે તમે જાણશો કે સૈન્યોનો
દેવ યહોવાએ મને મોકલ્યો છે.”
10યહોવા કહે છે,
“સિયોનના વતનીઓ, ગીતો ગાઓ અને આનંદ કરો, કારણ, જુઓ,
હું આવું છું અને તમારી વચ્ચે વસનાર છું.
11તે દિવસે ઘણી પ્રજાઓ
યહોવાની સાથે સંબંધ બાંધશે,
અને તેઓ એની પ્રજા થશે
અને યહોવા તેમની વચ્ચે વસશે,”
અને ત્યારે તમને જાણ થશે કે યહોવાએ
મને તમારી પાસે મોકલ્યો છે.
12અને ત્યારે પવિત્ર ભૂમિમાં યહૂદિયા યહોવાનો વિશિષ્ટ ભાગ બનશે.
અને યહોવા ફરીથી યરૂશાલેમને પસંદ કરશે.
13યહોવા સમક્ષ સર્વ શાંત થઇ જાઓ, કારણ,
તે પોતાના પવિત્ર ધામમાંથી આવી રહ્યાં છે.