1Ga yuwalknha bitjarranydja maḻŋ'thurruna. Wiripuŋuyunydja waluyu Bilitjiyapuyŋunydja nyäṉ'thurrunana lili yana, bunharaminana yukurrana walala Yitjuralpuyŋuna, ga guḻku'na dhika burakinanydja. 2Ga Djolwu ḻurrkun' gäthu'mirriŋu walala burakinayi, *Djonathan ga märrma' biyapul rakunydhinanydja ŋuriŋiyinydja waluyu, 3ga Djolnydja ŋayipinydja ga gaṯpurrthina burakina bonarra'yu. 4Bala ŋayi waŋana nhanukalaŋuwala djämamirriwala bitjarra, “Buŋana ŋarranha go, rakunyguŋana, märr ŋarranha yurru yakana ŋuruŋu Bilitjiyapuyŋuyunydja märrama.”

Yurru ŋunhi ḏarramunydja waŋana yaka'yurruna, yakana ŋayi ŋanya ŋula bumaranydja liŋgu ŋayi ŋunhi barrarinana. Bala Djol bunharaminanydja dharpunhaminanydja ŋanyapinyay ŋayi ŋuriŋi nhanukiyingalana mandjawakthu.

8-10Ga ŋunhi walala Bilitjiyapuyŋuyu ŋäkulanydja ŋunhi Djolnydja liŋguna rakunynha, wirrkina walalanydja dhika galŋa‐ŋamathinana; walala marrtjina lili, ga gulkthurruna ŋanya muḻkurrnha, ga rumbalnydja ŋanya walala dhuḻ'yurrunana ŋunha galki dhälili ḻoḻulili nhäyikayu †Bittjanlili wäŋalili. 11-13Yurru walala ŋunhi Yitjuralpuyŋunydja ḏarramuwurru beyaṉumiriwnha dhika wäŋgaŋala ŋunhimalayi wäŋalili, ga yupmaraŋala ŋanya Djolnha rumbalnydja, bala dhalkaraŋalana. Bala walala nyä'yunminanydja nhanŋu yukurrana Djolwu 7 walunydja ŋupara.