1Myan asa a mabigbigbig a mahakay a yapo do trībo no Benhamin a mayngaran so Kis a pōtot ni Abiyel a apoko ni Seror a yapo do pamilya ni Bekorat do partīdo ni Apiyah. 2Myan pōtot na a mahakay a mayngaran so Saulo. Abaw kapayngay na dyirad Israelita saw do kagwapo na, kan asa a kaoho so kakarakarang kan aran sino.

3Do dāwri, naiwawa saw asnwaw a dyira ni Kis a āmang ni Saulo. Dawa, binata ni Kis di Saulo a kāna, “Manghap ka so asa rārayay mo dyirad pachirawatan saya, ta yangay nyo sa chichwasen asno da saw.” 4Dawa, kinelsat daw maychichwas do katokotokonan no Epraim kan do tana no Salisah, ki nachichwasan da saba daw. Nagkelsat sa pa do tana no Saalim, ki asaba daw asno saw. Sinpangan na, kinelsat da do tana no Benhamin, ki alit na dyi da sa nachichwasan daw.

5Do nakapakarapit daw do tana no Sop, binata ni Saulo do pachirawatan naw a rārayay na a kāna, “Ay, maybidi ta na, ta āngwan sira pabaw asnwaw iktokto ni āmang, as kan ari narana yaten a chabakel.”

6Ki initbay no pachirawatan naw a kāna, “Na, anchi ka, ah. Ariw tawo no Dyos do dyaya a idi, kan taywaraw kaanyib da sya no tawotawo. Tabo kono ibahey na, ki maparin anchi. Mangay ta daw sichangori. Sigōro ibahey nanchi dyaten an dino rarahan a kwanan ta.”

7Inyahes ni Saulo do pachirawatan naw a kāna, “Ki an mangay ta, āngo kono itoroh ta dya? Arabayaw mākan do kostal ta saya. Aba met mairigālo ta do propīta no Dyos. Āngo myan dyaten?”

8Tominbay danaw pachirawatan naw a kāna, “Chiban mo, aryaw naiyonot ko a asa dēkey a plata a pirak. Itoroh ko do propītaw no Dyos tan komwan ibahey na dyaten rarahan a kwanan ta.” 9(No sīgod do Israel, an myan mangay a machiintood do Dyos, no batahen na, ki “Ngay, mangay ta do mamadtwaw,” ta siraw propīta changori, ki sīgod a matawagan sa so mamadto.)

10Binata ni Saulo do pachirawatan naw a kāna, “Maganay. Ngay, mangay ta na.” Dawa, nangay dana sa do idyaw a yanan propītaw no Dyos.

11Do nakasonget daw do songtanaw a komwan do idyaw, myan saw nabayat da babbalāsang a mangay a mamoranom, kan inyahes da dyira a kon da, “Aryori dyaw mamadtwaw?”

12Initbay da a kon da, “Naon. Aryaw a nanmanma lang so dēkey kan inyo. Makalisto kamo. Kawawara na pa do idi namenaya, ta mangidāton saw tawotawowaw do logaraw a pagdaydayāwan. 13Apāman anchi a makasdep kamo do idyaw, madas nyo panchi daw sakbay a makasonget do logaraw a pagdaydayāwan a mangay a koman. Ta mangrogi saba koman tawotawowaw mandan dyi pa iya a mawara maynamot ta machita na pa bindisyonan iyaw dātonaw. Katayoka na, koman dana saw naāwis saw. Somonget kamo na, ta mabayat nyo na sichangori a ōras.”

14As dawa, somnonget sa do idyaw, kan do kapakasdep daw, kosto a lomongo si Samwel dyira a komwan do logaraw a pagdaydayāwan.

15Do arawaw a sakbay pa a mawara si Saulo, inbahey dana ni ĀPO di Samwel nyaya a kāna, 16“Delak do komwan anchi a ōras, toboyen ko anchiw asa mahakay a yapo do tana no Benhamin. Iya anchiw padwan mo so lana do oho na a mangipangōlo so tawotawo ko a Israel. Iyanchi, ki mangisalākan sira do toray dan Pilisteo saw, ta chiniban ko iyaw kapakaidadanes dan tawotawo ko, as kan nakarapit dyaken tanyis da.”

17Do nakaboyaw ni Samwel di Saulo, binata ni ĀPO dya a kāna, “Iyaw nyaw mahakayaw a inbahey ko dyimo. Iyanchiw mangitoray so tawotawo ko.”

18Naypasngen si Saulo di Samwel do masngenaw do rowangan kan inyahes na a kāna, “Maparin a ibahey mo dyaken an dino bahay no mamadtwaw?”

19Initbay ni Samwel a kāna, “Na, yakenaw mamadtwaw. Ngay, manma kamo a somonget do logaraw a pagdaydayāwan, ta somarono ako na dyinyo. Ta sicharaw, ki machakan kamo dyaken. Anchan mabekas, ki ibahey konchi a tabo myan saya do aktokto nyo as kapayam ko dyinyo. 20Pakariribokan mo pa sabaw asno saw a nabo nyo do tatdo dana a karaw, ta nachichwasan dana sa. As sino kono kalikagōman da no tabo Israelita saw an dya imo kan iyaw tabo pamilya ni āmang mo?”

21Tominbay si Saulo a kāna, “Naon, ki taga trībo ako abawri no Benhamin a yapo do kadēdekeyan a trībo no Israel, kan iyabawriw partīdo ko dya masisīta do tabo a trībo no Benhamin? Āngo ta ibahey mo sa dyaken nawri?”

22Do dāwri, inyonot ni Samwel si Saulo kan iyaw pachirawatan naw do rakohaw a kwarto, kan pinaydisna na sa do kasisītaan a disnan dyirad magtatdo a poho a naāwis. 23Binata ni Samwel do kosinirwaw a kāna, “Mangay mwa apen karnyaw a inpapatawa ko dyimo.”

24As dawa, nangay na a inhap no kosinirwaw iyaw pā naw no karni, kan indasar na do salapenaw ni Saulo. Binata ni Samwel a kāna, “Cha dya iyaw nakapya a para dyimo. Kanen mo, ta napatawaw nyaya a para dyimo a manda do naitongdwaya a ōras tan machakan ka dyirad naāwis saya.” Dawa, nachihanghang si Saulo di Samwel do dāwri a araw.

25Do nakapakawsok daranaw do idyaw a yapo do logaraw a pagdaydayāwan, myan naisagāna a pakaychehan a para di Saulo do atep naw no bahay ni Samwel, as dawriw nakaychehan na.* 26Do nakapaysēsedang naranaw, tinawagan ni Samwel si Saulo a myan do atepaw no bahay, kan binata na a kāna, “Maybangon ka na tan toboyen ko naymo do kwanan mwaw.” Dawa, naybangon si Saulo. Iya kan si Samwel, ki nayrayay dana sa minohbot. 27Do nakapakawsok daranaw do payis naw no idi, binata ni Samwel di Saulo a kāna, “Ibahey mo do pachirawatan mwaya a manma dana.” Kinarwan no pachirawatan naw. Tinongtong ni Samwel a kāna, “Mabidin ka pa so dēkey dya tan ibahey ko dyimo minsāhi a yapo do Dyos.”