1Do dāwri, myan daw asa mangriribok a mahakay a mayngaran so Seba a pōtot ni Bikri, kan asa Benhaminita. Inalopan naw trompītaw, as nakaingengey na sya a kāna,

2Dawa, kinarwan dan tabo mahahakay no Israel si Dabid, kan minonot sa di Seba a pōtot ni Bikri. Ki siraw mahahakay saw no Joda, ki nāw da do āri daw, kan rinarāyayan da iya a yapo do Jordan a nanda do Jerosalem.

3Do nakapaybidi danaw ni Dabid do palasyo naw do Jerosalem, inpahap naw asa poho saw a minabakes na a natokos a mangaywan so palasyowaw, kan inpopok na sa do asa bahay a nagwardyaan. Intoroh na tabo machita da, ki inoknod na saba. Dawri danaw niyanan da akma siras kabibyay daw no babbālo a mandad nakadiman da.

4Sinpangan na, binata no āryaw di Amasa a komander dyirad bōyot na saw a kāna, “Paychipehen mo saw mahahakay saw no Joda a mangay dyaken do irahem no tatdo a karaw, kan imo pa.” 5Ki do nakangay naw ni Amasa a mangpeh siras mahahakay saw no Joda, nahahay pa kan iyaw inkeddeng naw no āryaw dya.

6Binata ni Dabid di Abisay a kāna, “Changori, si Seba a pōtot ni Bikri, ki mangamangay paw parinen na madi dyaten kan si Absalom. Ahapen mo saw bōyot kwaw a āpo mo, kan lakatan nyo iya. Ta āngwan somdep anchi dyirad nakotāan saw a syodad, kan malibāsan na yaten.”* 7Dawa, do kaidaōlo sira ni Abisay, minohbot saw bōyotaw ni Joab, siraw Keretita, siraw Peletita,† kan tabo mabibīleg saw a taga-gobat. Nagmarcha sa a minohtot do Jerosalem a manglakat di Seba a pōtot ni Bikri.

8Do nakapakarapit daw do rakohaw a bato do Gibeon, nachibayat dyira si Amasa. As si Joab, ki nakalaylay so laylay a pachigobat, kan nakasintorong do katinghan naw sinohot naw a imoko. Do kadakwang naw a maypasngen di Amasa, ināsot naw imoko naw.

9Binata ni Joab di Amasa a kāna, “Komosta ka nam kakteh?” Do dāwri, ginammatan ni Joab iyaw minyinaw ni Amasa‡ do kawanan naw a kakamay na§ a akma nay dadek. 10Ki inkaskāso naba ni Amasa iyaw imokwaw a inigpet ni Joab do kaholyaw a kakamay na. Binagkong ni Joab do bodek naw, kan minohtot so chinayi a nasday do tana. Pinirwa na paba a binagkong, ta nadiman a sigīda si Amasa. Sinpangan na, si Joab kan iyaw kakteh naw a si Abisay, ki tinongtong da a linakatan si Seba a pōtot ni Bikri.

11Asa dyirad mahakayaw a soldādo ni Joab, ki naytēnek do bīt naw no bangkay ni Amasa, kan binata na a kāna, “No aran sino a para di Joab kan aran sino a para di Dabid, ki may ka na a monot di Joab!” 12No bangkay ni Amasa, ki nayayawat do raya na do hobok naw no kalsāda. Do kaboya no mahakayaw a nagsardeng sa tabo homnabas di Amasa, ginorogod naw bangkayaw a inikwan do hakawan, kan pinonan na so kagay. 13Do nakatayoka da a nangpakaro so bangkayaw ni Amasa do kalsādaw, tinongtong da tabo no nachangayaw di Joab nachipanglakat di Seba a pōtot ni Bikri.

14Ranan a naparin nya, nangay si Seba dyirad tabo trībo no Israel a manda do syodad a Abel-bet-maakah. Naychipeh saw tabo partīdos no Bikri, kan inonotan da iya. 15Do nakapakarapit ni Joab kan tabo bōyot na saw, linakob da si Seba do Abel-bet-maakah. Napaytokon sa so tana do gaganaw no ahad no syodad tan makakayat sa. As rakraken daw ahadaw tan loyohen da. 16Sinpangan na, myan asa masīrib a mabakes do irahemaw no syodad a nangngey a kāna, “Mangadngey kamo! Mangadngey kamo! Ibahey nyo di Joab a mangay dya, ta chakey ko a kasarīta.” 17Nangay si Joab dya, kan inyahes no mabakesaw a kāna, “Imoris Joab?”

“Na, yakenaw,” initbay ni Joab.

Binata dana no mabakesaw a kāna, “Adngeyen mo pa an āngo ibahey no pachirawatan mwaya.”

“Na, ari akwaya mangadngedngey,” initbay na.

18Tinongtong no mabakesaw a kāna, “Do nakarahan, myan inbahebahey da a kon da, ‘Yay nyo a hapen iyaw atbay do syodadaya a Abel,’ as napaysonong danaw sopyat. 19No syodad namen, ki asa dyirad katatalnaan kan kapopodnwan do Israel. Āngo ta padāsen nyowaya a rārayawen iyaw syodadaya a pinakaānang no Israel. On, āngo ta chakey nyo a patawsen iyaw inpatāwidaya ni ĀPO?”

20Initbay ni Joab a kāna, “Taywaran yaken nawri? Taywaran patawsen kan rārayawen ko! 21Komwan aba. Myan mahakay a mayngaran so Seba a pōtot ni Bikri a yapo do katokotokonanaya no Epraim. Nagribīldi iya do āryaw a si Dabid. Iparawat mo a iya lang dyaken, as komaro ako do syodad nyowaya.”

Binata no mabakesaw di Joab a kāna, “Iyaw oho naw, ki maipagsid anchi dyimo a yapo do ahadaya.”

22Do dāwri, nangay mabakesaw do tabo omyan saw do syodadaw, kan inbahey na dyiraw masīrib a pamagbaga na. Pinotohan daw oho naw ni Seba a pōtot ni Bikri, kan inpagsid da di Joab. Inalopan ni Joab iyaw trompīta naw, kan nabogay saw bōyot naw a yapo do syodadaw. Kāda asa, ki somnabat dana sa. As si Joab, ki somnabat dana met do yanan āri do Jerosalem.

23Si Joab, ki komander no tabo bōyot no Israel. Si Benayas a pōtot ni Jehoyada, ki iyaw mangidaōlo siras Keretita kan Peletita saw. 24Si Adoniram, ki nangidaōlo siras napilītan saw a maytarābako. Si Jehosapat a pōtot ni Ahilod, ki iyaw maytoytolas so mapariparin do pagāryanaw.† 25Si Seba,‡ ki iyaw sikritaryo. Si Sadok kan Abyatar, ki papādi sa. 26Si Ira a taga Jair, ki iyaw bōkod a pādi ni Dabid.