1Do dāwri a chimpo, myan asa mahakay a yapo do trībo no Lebi a nangabahay so mabakes a katrībwan na. 2Sinpangan na, nabōgiw mabakesaw, ki inyanak naw asaw a mahakay. Do nakaboya naw sya makadadaw nyaya tagībi, intayo na so tatdo a kabohan. 3Do dyi naranaw a kaitaywan sya, nanghap so asa rakoh a badodang, kan kinōlaan na so birya tan dya manahan. Sinpangan na, pinosek naw tagībi naw, as nakapatapaw nas badodangaw do yanan daw no tametamek do payisaw no Oksong Nile. 4Ki si ākang na a mabakes no nya tagībi, tomnayo do dyaw a oyod a mabawa a mangsipsipot so ādi naw an āngo maparin dya.

5Do dāwri, iyaw balāsangaw ni Paraon, minosbos do oksongaw a Nile a mangay a mariyos. Siraw kasidong naw a mababakes, minidibidi sa do payisaw no oksong. Sinpangan na, naboya no balāsangaya ni Paraon badodangaw do katamtamkanaw, kan inpahap na do asaw a kasidong na. 6Nakarawat naw sya, nyeng na iniwangan, kan naboya naw adekeyaw a myan a tomanyis. Chināsi na kan binata na a kāna, “Ay-ay piman! Anak no Hebreo nyaya ah.”

7Ki naypasngen a sigīdaw ākangaw a mabakes no nya adekey, kan inyahes na do balāsangaw ni Paraon a kāna, “Āpo, chakey mori a yangay koymo a panghap so asa Hebreo a mabakes a mangtagībi so adekeyaya a para dyimo?”

8“Namna, āngo pa? May ka na ah,” initbay no balāsangaw ni Paraon. Nānyeng a komnaro ākangaw no adekeyaya, as nakatawag nas ānangaw no tagībi. 9Do nakawaraw ni ānang na, binata dya no balāsangaw ni Paraon a kāna, “Oy, hapen mo nya adekey ah, kan tagībyen mo a maganay, ta tangdanan konchimo.” Dawa, inhap naw adekeyaw kan tinagībi na. 10Do nakaposin naranaw no adekeyaw, inyangay ni ānang na do balāsangaw ni Paraon. Rinawat no balāsangaw ni Paraon, kan inabnek narana anak na. Pinangaranan na so Moyses, ta binata na a kāna, “Maynamot ta inawon ko a yapo do ranom.”

11Do asaw a karaw, do karakoh naranaw ni Moyses, minohbot kan nangay do yanan daw no kayidyan na saw. Binoybōya na sa do mararahmetaw a tarabāko da. Do dāwri, nakaboya so asa taga Egipto a madama a mangbabāot so asaw a kayidyan na a Hebreo. 12Minididit, as do kaboya naw sya a abo tawo, diniman naw taga Egiptwaw, as kan nakaitābon na sya do anayaw. 13Do somaronwaw a araw, minohbot dana, kan nakaboya so dadwa kayidyan na a maydiman. Do dāwri, inyahes na do machidimanaw a kāna, “Āngo ta baōtan mo kapayngay mwaya Hebreo?”

14Ki tinbay na a kāna, “Āngo bibyang mo? Sino kono napayparin dyimo a mangitoray kan mangokom dyamen? Chakey mori yaken a dimanen a akmas nakadiman mwaw so taga Egiptwaw ah?” Do dāwri, maamak dana si Moyses, kan bata na do aktokto na, “Oy! Na, chapatak darana no pinarin kwaw ah.”

15Do nakadngeyaw ni Paraon so nyaya naparin, pinādas na a ipadiman si Moyses, ki ingodes ni Moyses a pinayyaywan si Paraon kan nangay a minyan do tana a Midyan.

Do asa karaw, do kapaydisnaw ni Moyses do bīt naw no asa a bobon, 16nawaraw papito a mababakes a siraw pōtot saw no pādyaw do Midyan. Nangay sa a namoranom kan inapno da saw pamaynomanaw ni āmang da tan paynomen da saw binyay na saw a kalding kan karniro. 17Sinpangan na, nawara saw magpaspastor saw, kan binoyaw da saw mababakes saw. Ki inarāyat sa ni Moyses kan pinaynom na saw binyay da saw.

18Do nakasabat daw no mababakes saw di āmang da a si Rewel,* inyahes na dyira a kāna, “Āngo ta somnabat kamo a nasāpa sichangori?”

19Ki tominbay sa a kon da, “Inarāyat naw yamen taga Egiptwaw do nakaboyawaw dyamen magpaspastor saw. Basbāli paw a inporanoman na yamen, kan pinaynom na saw binyayaw.”

20Inyahes no āmangaw dyirad babbalāsang naw a kāna, “Na, dino yanan na? Āngo ta kinarwan nyo? Yangay nyo a awisen, ta pakanen nyo ah.”

21Do dāwri, chinakey ni Moyses nachiyan do mahakayaw, kan inpakabahay na di Moyses balāsang naw a si Sippora. 22Sinpangan na, naymanganak si Sippora so asa mahakay, kan pinangaranan Moyses so Gersom,† ata binata na a kāna, “Gan-ganaet akwaya do gan-ganaet a tana.”

23Do nakapaypahabas danaw no āro a tawen, nadiman āryaw do Egipto. As siraw Israelita saw, ki pagas-āsog daranaw lidyat da do kaadīpen daw sira, kan itanyis daw mapasidong. As iyaw katanyis daw, ki nakarapit do Dyos. 24Nakadngey no Dyos so nawri a āsog da, nanakem naw nakapachitōlag naw da simna Abraham, Isaak, kan Jakob.‡ 25Nakaboyaw ni Āpo Dyos siras Israelita saw, nadidiw naw kayayan daw.