1Na, āngo bata ta sichangori? Tongtongen tawriw maygatos tan maypayit parābor ni Āpo Dyos dyaten? 2Samna, engga ah! Maypāngo a tongtongen taw maygatos an napakaro danaw bīleg no gatos dyaten? Ta akmay nadiman ta na do gatos. 3Ta chapatak nyo abawri a do nakapagbawtisar ta do ranom a maynamot do nakapanganohed ta di Kristo Jesos,* ki nawriw nakaboyan ta sya a nairāman ta na a machichasa dya do nakadiman na? 4Syimpri! As dawa, do nakapagbawtisar ta naw di Kristo, ki inpaboya ta a nairāman ta na do nakadiman kan nakaitābon na. On, naparin nyaya tan akmas nakapagōngaraw ni Kristo a yapo do kadiman a maynamot do panakabalin ni Āmang na do hanyit, ki komwan pa dyaten. Nairāman ta na do bayo a byay tan maybibyay ta a mononot do chakeyaw no Dyos.

5Ta an nairāman ta do nakadiman naw, ayket na, nairāman ta pa do nakapagōngar naw. 6Chapatak ta na a iyaw sīgod a dadakay ta a madaw do gatos, ki naparaparapas a nachilansa di Kristo do kros tan napaksyat danaw bīlegaya no gatos do inawan ta, as kan tan dyi ta na a magpaadīpen do gatos. 7Ta no tawo a nadiman, nadichanan naranaw bīleg no gatos dya. 8Sichangori, an manganohed ta a nairāman ta do kadimanaw ni Kristo, sigorādo a manganohed ta a machichasa ta dya do bayo a byay na. 9Ta chapatak ta na a si Kristo, ki nagōngar kan polos dana dya mirwa madiman, ta arabaw bīleg no kadiman dya. 10Nadiman si Kristo so naypisa tan paksyaten naw bīleg no gatos, ki maybibyay sichangori a para lang do pakaidayāwan Āpo Dyos. 11As dawa, aran inyo sichangori, ki ibidang nyo naw inawan nyo a nadiman do gatos kan mirwa kamo a mabyay a magsīrbi pakono do Dyos a maynamot do kapachichasa nyo di Kristo Jesos.

12As dawa, kakakteh, ipalōbos nyo aba mawnotan saw chalakamaw no inawan nyo tan dyi nyo na sa mirwa tongpalen nakaywaman nyowaw a marahet a dadakay. 13Masaw a ipalōbos nyo aba a mapaygatos aran āngo a partis no inawan nyo a maosar do marahet saw a panggep, basbāli a ipaitoray nyo inawan nyo do Dyos tan maosar dyirad malinteg a panggep na. On, ibidang nyo naw inawan nyo a nadiman do gatos, as kan nachipagōngar di Jesos a mabyay do Dyos. 14Ta apaba polos pamalōbos a mirwa dana mangitoray gatos dyinyo. Ta maynamot do pinarinaw ni Kristo, ki maybibiyay kamo paba do chimpo no linteg, an dyi dana parābor no Dyos.

15Chakey nawri a batahen a maynamot do nakalibri ta naw do linteg a intoroh ni Moyses, as kan myan ta na do parābor no Dyos, ki maparin ta na tongtongen maygatos ah? Samna! Dyi pakono a maparin komwan! 16Chapatak nyo abawri an sino panganohdan nyowaw, ki iyaw mangitoray dyinyo? An ipalōbos nyo gatos a mangitoray dyinyo, ki palongohen naynyo do kadimanan. Amnan ipalōbos nyo a iyaw chakeyaw ni Āpo Dyos mangitoray dyinyo, ki palongohen naynyo do kinalinteg. 17Ki magyāman ako di Āpo Dyos, ta aran do nakarahan adīpen naynyo no gatos, ki sichangori, mapasnek kamo na a manganohed do tābo aktokto nyo do oyodaya a nanawo a nainanawo dana dyinyo. 18Changori, nalibri kamo na do nangadīpenaya dyinyo a gatos, kan nayparin kamo na a adīpen kinalinteg. 19Maychirin ako dyinyo, kan osaren ko madama saya mapariparin dyinyo tan maydamnay nyo a maawatan, ta mawnged paw kapanganohed nyo. Do nakarahan, oyod a inpasnek nyo nagpapaadīpen a namarin so malapos kan maypaypangayaya karahet nyo a machikontra do lintegaya no Dyos. Ki sichangori, paybadiwen nyo pakono magpapaadīpen a para do kinalinteg tan maybibyay kamo a masantwan do salapen no Dyos.

20Ta do nakarahan, do nakaadīpen paw dyinyo no gatos, naitorayan naba inyo no kinalinteg. 21Ki āngo paro nahahap nyo dyirad pinariparin nyo saw, an dyi dana nayparin a chasnek nyo na sas changori? Siraw nawri, ki kadiman iyaw pandan da! 22On, napakakaro kamo na do bīleg no gatos, kan nayparin kamo na a adīpen ni Āpo Dyos. Maynamot do nyaya, rakoh danaw bindisyon nyo, ta ari kamo na a maybibiyay a masantwan do salapen Āpo Dyos, as kan iyaw bānag na, ki myan byay nyo a abos pandan. 23Ta iyaw panangdan no gatos, ki kadiman. Ki iyaw sāgot ni Āpo Dyos dyaten, ki byay a abos pandan maynamot do kapachasa ta di Kristo Jesos a Āpo ta.