God Da Geka Seka

Bajari Nange Jovereghe Sekago Joka Aetira Ainda Benunuri.
1Arie, Israel embo tavo tatau ari kato, namane Joseph da imendi gamendi Israel embo da giti jijighuse,
tavo tatau eraesa. Ni kini (king) edo Serubim maneda ikáda anumberaesa aimi,
dengoro namanekena fiti!
2Oro Ephraim, Benjamin a Manasseh ondikena isagha aso gaore!
Fu, ninda fakina namanekena ijuguse, namane sonembaso jebugaore!
3Arie God, sonembaso, namaneda irari nunda ari fatonga aeti. Namanekena joka ururaso, namane jebugaore!
4Arie Bajari God, fakina isambu da tofo, ni ghousa mavega ninda evetu genembo kena dubo eko use,
namanenda banungari jo ningae aresi?
5Ni namaneda bayau dubo vevera ava futusesi, jivu ava agha tomanakoda averege mindoro dae futusesi.
6Ni doteso, oro mendeni namanenda tinguda iritirera aimi, namanenda enda soro vesa ari dae tataya use irera.
Aminguse, namanendae jijivu ekoko seraera.
7Arie God, fakina isambu da tofo, sonembaso namaneda irari nunda ari fatonga aeti.
Namanekena joka ururaso, namane jebugaore!
8Ni vaini da asi veka Egypt aminda ghe bu fesa, oro mendeni mendeni ondeso,
nenda enda do buvurutero nenda endada govusesi.
9Ni aminda govari dae sedo, enda jedo goveteso, nunda besisi enda jokáda vose gogogho edo,
reighi isambu bedo usira.
10Enda jiro fumbari isambu nunda itumuimi gajojusira, ika babai Lebanon frovensi ami
11Nunda fafatuimi siregetiri era, eva Mediterranean aminda buvurutuseri,
a kotugo era uvu Euphrates aminda barago buvurutuseri.
12Ni redae furu dighi birurughetero ireira ava, de bejeteso vovosusi?
Oroko mave vare aminda ya buvu darige yari dae arera, aimi ninda vaini da vuji kotae kotae bagia ari inonori.
13Bao fukaimi fati beteraera. Kotugo taima sino fukaimi ainda vuji mindiraera.
14God, fakina isambu da tofo, dombu namanekena jovereghe!
Utudaghe diti fuge vose fururari namane gase! Aminguse fu, ninda natofo sonembaso jebugaore!
15Fu, asi seka evia govedo, tavo eteso baji fakina usira ava, sonembaso jebugare!
16Namanenda gitofuimi divetero fasetiri avarakai dungutuseri. Gi, dombuda sise, dege amomonjegaore!
17Evetu genembo nine gategusesa, a oro nine eteso fakina usera ava, tavo use, gagara e fete!
18Amingaresa amo, namane sifo nanjigo aminda ni jo sekago gukai mutae arera.
Namane tavo ururaso jebuga irarera amo, ni jighoro erase!
19 Bajari God, fakina isambu da tofo, namanekena joka ururaso, namane jebugaore!

*80:1: Tamo foyagoda geka etoto naká seraphim nengae cherubim irira. Ne avose aneyada mendeniri. Ne fakina kakatori. Nenda irari mo, ne God da dombuda irá geraera. Ezekiel tano dabako aminda, a tano ghabu soveni soveni aminda tegutuse cherubim da kau itako kasama arera. Ava edo, namonde geka mendeni Amboda Sirorari aminda tamburaera, ava kotarera. John nunda gekai tano 4 aminda living creature gefusira. Korafe geka aminge sarera amo, namonde sifo fuka da eni kotaeteri, tano. Avata, seraphim nengae cherubim ghae jo sino fuka iraeri. Ne God da geka ningia, mino bekami seraera, a nunda uju ava eraera. Ava sedo namane Amboda Sirorai aminda geka serubim gembudo ghuseri. Avori, Baibel jokada serapim vasa dabako tamburaera, Isaiah tano 6 aminda irira. Ne God da dombuda fetedo nundae sakai sise irera, a nunda uju use irera. Ne ajagha, cherubim ajagha, aĩ daba avori. Namonde jo gi gogogombae irera. Cherubim aminga ava, ne God da dombuda fetedo nu kakara use unda uju edo gherera. Ã Korafe gekami javo etoto naká da duka utuako bekári. Ava sedo, namane seraphim nengae cherubim ghae kotise geka dabako serubim gefuseri.