1Âgofâc-nane, no Anutu buuruc-ticnere erâ dâŋ hazec qâuŋ ŋazape mananiŋ. Ŋoŋe sahac-ŋeŋic Anutu qikiŋnecnepie taha bâzi ɋaɋacne â tirine eme honeme biaŋkezejec. Iŋuc ehuc Anutu kiŋaŋ fârine qacnenšepieŋ. 2Erâ juju bapa-ŋeŋiczi miti tâmiric jaŋere sâc mi ezejec. Ŋoŋe maŋ mamanasu-ŋeŋic bâtikiepie hawarine moc eme Anutu micdâŋ-ticnere sâcko gie biaŋne â hohone šiziwene â tirine irec wosâenšepieŋ.

3Aki anonoc tahacnukicnere mâmâc sasawa ŋazape mananiŋ: Moc e jahacnere maname fefene boc mi ezejec, Anutuzi miti râcnewec sâc i sawa ezejec, sâc jâuruhuc ine mi ezejec. 4Ʒiŋuc mananiŋ: Fâri ombâŋ-nâŋec mocjaha e kiŋaŋ qaqafâc-ticne bocjahazi gie fuŋne fuŋne baeŋgopieŋ. 5Eme ŋifec Kristorao iŋuc jaha bocjahazi qâfâsâepene fâri ombâŋ mocjaha ekac, erâ me kikefâcne juhuc dodopec eeŋgopeneŋ. 6Mitire tâpire fuŋne fuŋne i aki anonoc nâre tahac ekicne sâc fonâre rakac. Eme irec sâcko gie banšepeneŋ. Irec moc e Anuture micdâŋ mumufuare tâpiri focnekacko mamanasiŋ-ticnere sâcko muzejec. 7Moc e kiŋaŋ qaqa giere tâpiri focnekaczi gie i bazejec, â moc e qaqazu gie baocmu e irec tâpiri focnekac sâc bazejec. 8Uŋsawaŋ dâŋ muekac e irec tâpiri focnekacko muzejec, bâmec gie baekac e maŋticne bawahahuc bazejec, moc e micne juocte mucnekicko šoɋachec juzejec, â moc e jauŋ gie baocmuzi buafec jaha bazajec.

9Jauŋ babac i sahaczi sawa mi enšepieŋ. Wiac sâqocnere mamakâc-ŋopazejec â wiac biaŋnao qohotanšepieŋ. 10Ŋoŋe ââgo fârine junšepieŋ, erâ sâsâsec eniŋte sisiric efârenšepieŋ. 11Rokac bârokac tâmiric ɋicwânšâŋhec erâ junšepieŋ. Mârore buŋeŋic bâruŋkezejec, ehuc Wofuŋ kiŋaŋ qacnenšepieŋ. 12Sambaŋ worickehuc bubiaŋ junšepieŋ, â šâic busâqocko maŋuruc junšepieŋ. Erâ nunumu gie i uruc šuhuc jaha banšepieŋ. 13Anuture mitiŋicfâc hume serereŋ jupie hone bafic ejarenšepieŋ. Ŋic fisipie afeckerâ hezu hewâneŋ ejarenšepieŋ. 14Ŋopa jâpec eŋareniŋmu jaŋe jambuŋ-jopanšepieŋ. Micŋeŋickonec sâwecdâŋ mâcne, jambuŋdâŋ sawa wahazejec. 15Bubiaŋ eniŋmu jaŋe qâtec-joparâ bubiaŋ enšepieŋ, kioniŋmu jaŋe qâtec-joparâ kionšepieŋ. 16Maŋŋeŋic bâturehuc wiac mocjahare henširiŋnehuc junšepieŋ. Ŋaŋacnere boc mi manapie sâckezejec. 17Sâqocnere okac babazuc mi enšepieŋ. Ŋic âgo ejareekac ijaha enšepieŋ. 18Ŋicne Ŋicne jaŋehec wamao juju i eene eme ŋoŋe hâcne irec hatane âtenšepieŋ. 19Âgofâc, kiŋŋeŋic ŋaŋac mi batarahuc Wofuŋ kimbeŋ-ticnere biŋe râepie fozejec. Dâŋ šiŋuc hâcne qâreŋkekicne fokac: “Kiŋ babatara i nore gie, â okacne babazu i no nahac epemu, Wofuŋ e iŋuc mukac.” 20Ŋoŋe ine šiŋuc enšepieŋ: Râsige nânâre hâmome nânâ gumezemec, opâre hâmome opâ gumezemec. Go iŋuc etecne mimiehuc šara marane eocmu. 21Sâqocnezi go mi bawahacguzejec. Aricne, go wiac biaŋne ehuc sâqocne bawahazemec.