Ngwujaꞌri ngwanni ngwujaw ngwullu je
Murkuj
Änï kitabanu
Murkuj gwullu ndi ondaci ngwüjü ngwujaꞌri ngwanni ngwujaw ngwani Kirictu Gïjï gidi Ngwaalu (Murkuj 1.1). Nginde gwinggida ngwujaꞌri ngwonyadu ngwudi Ngwüyäwüd na dïmürä degen, no yiru nono gwüllïjä ngwüjü ngwanni ngwuru yiꞌra ngwäꞌtüdï Ngwüyäwüd.
Murkuj gwullu ngwinggidi yiꞌral yanni yärrü je Yicu ngwuje inggidi. Yicu gwondaca ngwüjü yeleny ye yidi Ngwaalu ndi ari yima ila. A ngwaalu elalu ngwüjï ngwe anni ma aar engga ndi ari gwätï yiima ngwüꞌrïllälä. Gwuꞌriya ngwüjü nono ngwümä, ngwüꞌdïꞌrïyä geralu gayu ngwüdüdänïjï ngwüjänü ndi ke gwegen.
Yicu gwondaca ngwoꞌra ngwüngün ndi ari gwïndädï ndi äpïjï ngwüjü yiiru ngwududiyi ligoꞌro lüngün nunnu ngwuje gïlängïdïyï ndi ke gwegen. Ngwuje ci ndi ari gwere gwanni gwunana ndi ru dooꞌra düngün ngwulenge ꞌto ndi ari gwa yiꞌrendeny mbuji gwayi. Anni ma Yicu ayi ngwüꞌdïꞌrä mana, ngwondaci ngwoꞌra ngwüngün ndi ele ngwaalu ꞌdar aar ondaci ngwüjü ꞌdar gwani nginde.
Yajang yidi ngwujaꞌri
1. Ngwujaꞌri ngwudi Yuwana Almamadan (1.1–8)
2. Nyïnyïnï na ïdäjï gwudi Yicu (1.9–13)
3. Yiiru yidi Yicu Jälïl (1.14—9.50)
4. A Yicu ila Jälïl ngwele Üräjälïm (10.1–52)
5. Aar giki Yicung aar gwe obalu giyiꞌrany (11.1—15.47)
6. A Yicu ꞌdïꞌrä giyiꞌranyanu (16.1–8)
7. A Yicu ꞌtäcä ngwoꞌralu ngwüngün (16.9–20)
A Yuwana Almamadan jaꞌrima gay
(Mätä 3.1–12; Luka 3.1–18; Yuwana 1.19–28)
1Ngwujaꞌri ngwuru ngwee ngwanni ngwujaw ngwani Yicu Kirictu gwuru Gïjï gidi Ngwaalu ngwädäälü no.
2Anaku üllïnäär gu kitabanu ganni gullu dïjïr didi Ngwaalu dani Ajaya ngwari,
“Äny gwadi ükäjä dïnädä düny ngwumadinana gwerre gwerre ꞌdunggunga,
danni da ang räꞌtïjï gay ngwugeꞌte mama.”
3“Dïjï durnidu dulala gïtäny daru nu,
‘Gïꞌtïjär Delenya gay mama,
gïꞌtïjär ngwüdünälü.’ ”
4No, a Yuwana ila poor gïtäny ngwondaci ngwüjü ngenone ndi ari aar joꞌrenyana aar oꞌralu giyiꞌral yegen yanni yiki ngwuje nyïnyï yaw ye nunnu a je Ngwaalu düdänïjänü giyiꞌral yegen yanni yiki. 5A ngwüjï ngenone ngwaalu ngwani Yäwüdïyä na kündär gani Üräjälïm ꞌdar aar ꞌtädä ꞌdünggüngün aar ꞌtäjï yiꞌralalu yegen yanni yiki ngwuje nyïnyï gidibirta didi yaw yidi Ordoning. 6Ati Yuwana genne ngwureda ngwuru yotang yidi ngwamla ngwürüjïnänü lägü le liru dirna gidirinyanu, ating eny ngwama na ngwaay ngwudi ngwüdäny. 7Na ngwujaꞌri ngwüngün ngwuru ngwee ngwanni ngwondacung ngwe ngwüjü, “Gwodan, nggwo gwïndï gwanni gwupana yelenya ꞌdünggüny gwanni gwaꞌti nyi mbutu ngwäyänü ngwüngün ndi nyi üllïcänü nyi gwäꞌdäcï ngwaralu ngwudi ngwüdän ngwüngün. 8Äny gwünyïnyä je yaw ye, a be nginde gwa je nyïnyï Lïgïꞌrïm le lanni Lijuꞌru.”
A Yicu nyïnyïnï a dijegoꞌrr ïdäjï
(Mätä 3.13—4.11; Luka 3.21–22; 4.1–13)
9Kaji nggoo a Yicu ila kündär gani Najra ngwaalu ngwani Jälïl a Yuwana nyïnyï gidibirta didi yaw yidi Ordoning. 10A gaji ganni giju ge Yicu ndi ꞌtüdä giyaanu, ngwengga gere ngwïgïtïnï a Lïgïꞌrïm üllä nono gwele amaam ngwaw nono. 11A dulu üllä kerala ngwari, “Nga gwuru Gïjï güny ganni gämnïny. Äny gwujayanu gwulleny ꞌdunggunga!”
12Kaji nggoo, a Lïgïꞌrïm ape ngwudinga poor gïtäny. 13Ngwuji ngenone poor gïtäny yomon küüꞌrï rom (40) ati dijegoꞌrr ïdïtäjï. Aar gu ji ngwäng gwe ngwudi pooring, a gu yïꞌrr äpïjï yiiru.
Ngwooꞌra ngwanni ngwurnidaar je gwerre gwerre
(Mätä 4.12–22; Luka 4.14–15; 5.1–11)
14Anni ma aar määtä Yuwanang aar geꞌte korkon, a Yicu ele ngwaalu ngwani Jälïl ngwurnidi ngwujaꞌri ngwe ngwudi Ngwaalu ngwanni ngwujaw. 15Ngwuje ci, “Gaji gima ila na yeleny yidi Ngwaalu yima ja gito. Joꞌrenyanar be ngaa gatana yiꞌral yanni yiki, ngaa ämnï ngwujaꞌri ngwanni ngwujaw!”
16A Yicu ji ndi ele gïmämäng nono gidi yaw yidi Jälïlïng, ngwengga guru gani Jamaan gwenggen gwe gwani Andrawuj, liju ndi gïꞌrï ngwüꞌdïbä giyaanu ndi ummi ngwuuma ndi ari lati ummi ngwuuma. 17A je Yicu ci nu, “Ilar nyii gwujani, nggwa je ruji ngwiina ngwudi ngwüjï ngwümnä.” 18Kaji nggoo, aar gatani ngwüꞌdïbälü ngwegen aar gwujani.
19Anni mung ꞌdonggalu gweere gwooko ngenone, ngwengga guru gani Yagub gïjï gidi Jäbädï ngindenga gwenggen gwe gwani Yuwana gïbälükänü aar ji ndi gagiri ngwüꞌdïbänü ngwegen. 20Ngwuꞌti jana ngwuje urnidi, aar gatana papangalu gwegen gwani Jäbädï gïbälükänü ngwüjïngä le ngwanni ngwati je ümmïjï ngwuuma aar gwujani.
A Yicu ꞌtüyï dïꞌrïllä
21Aar be ꞌdïꞌrï aar ele Kaprnawum. Anni ma gomon ila ganni giru Kwoꞌra täꞌrïl, a Yicu änï ngwämrä ngwenggaci ngwüjü ngwujaꞌri ngwudi Ngwaalu. 22A ngwüjï dibi ngwujaꞌri ngwüngün ndi ari ngwondajung je yeleny ye yiru ꞌter yäꞌtüdï nono yeleny yanni yati ye ngwoorta ngwudi yobo ondaji. 23Ngwämrä ngwegen, gur giju gu gätï dïꞌrïllänü ngwürrï dula ngwari, 24“Nga gwümïnä ange ꞌdänggärï gwani Yicu gwudi Najrang? A gwïndädï ndi nje dudiye? Äny gwülïngïdängä nga gwani yärü, nga gwuru gwudi Ngwaalu gwanni Gwujuꞌru!”
25A Yicu girinya ngwuci, “Gwugwundu! ꞌTüdï ꞌdünggüngünänü.” 26A dïꞌrïllä didiꞌriyi guru gwulleny ngwürrï dula ngwüꞌtü ꞌdünggüngünänü ngwele. 27A ngwüjï ꞌdar dibi yiꞌral giyee, aar otajidalu ndi ari, “Yiru ange giyee? Ngwujaꞌri ngwuru ange ngwee ngwuru ngwuyang ngwündäjïnä yeleny ye ndi ari ꞌdi ngwugirinya ngwüꞌrïllä ati aar ꞌdengenaci.” 28A ngwujaꞌri ngwee ngwani Yicu, badalu puprang ngwüjï ngwaalu ꞌdar ngwani Jälïl.
A Yicu uꞌriyi ngwüjü nono ngwonyadu
(Mätä 8.14–17; Luka 4.38–41)
29Anni ma aar ꞌtü aar gatani ngwämrä, aar ele aar änï ngwuꞌdun ngwudi Jamaaninga Andrawuj gwe, aar ele Yuwananga le na Yagub. 30A be nanni gwuru düünä didi Jamaan ümï ngwundri ngwümbür, gwübüdü nono a no aar gwe ondaci Yicung. 31A be Yicu ꞌdonggaci ngwümäätä kuy ngwüꞌdïꞌrïyälü. A dümdï gäbïcälü ngwuꞌri nono ngwüꞌdïꞌrälü ngwuje äpïjï yiiru.
32A digera de ndoo anni ma lingen üllï, aar äpïjä Yicung ngwüjü ꞌdar ngwanni ngwümä na ngwanni ngwätï ngwüꞌrïllänü. 33A ngwüjï kündär ꞌdar oꞌradalu gïlängïränü 34a je Yicu uꞌriyi nono lonyadu lanni lätïnä dümdänü donyadu. Ngwuje gu ꞌtüyï ngwüꞌrïllä ꞌto ngwonyadu, ngwuje ꞌti be gäbïcä ndi ondaji ndi ari gwülïngïdäär ndi ari gwani yärü.
A Yicu ondaci ngwüjü Jälïl
(Luka 4.42–44)
35ꞌTuꞌtu dilu danu ngwaalingalu tümün tümün, a Yicu ꞌdïꞌrï ngwugatani ngwuꞌduna ngwele ngwüꞌtänü poor ngwaalu ngwüjïnälü ndi otaci Ngwaalingalu. 36A Jamaan na ngwumaad ngwüngün ꞌdïꞌrï aar ele ndi mïnä. 37Anni ma aar mbuji aar ci, “Ngwüjï ꞌdar ngwo ngwümïnängä!”
38A je Yicu ci, “ꞌDïꞌrär ar ele ngwuꞌdunanu gito gito ngwuꞌter nunnu nyi gu ondaci ꞌto ngwüjü. Yiru giyee yanni yïndädïny gu.” 39No ngwüꞌdïꞌrï ngwele ngwaalu ꞌdar Jälïl ngwondaci ngwüjü ngwämrä ngwegen ngwuje gu ꞌtüyï ngwüꞌrïllänü.
A Yicu uꞌriyi daamu nono
(Mätä 8.1–4; Luka 5.12–16)
40A gur geꞌte ila giru daamu ngwukwuci Yicungalu yirku ye ngwüpäcälü ngwuci, “Manari nga gwubupa gu, nga gwätï yiima ndi nyi uꞌriyi nono.”
41Ngwïnä Yicung gwulleny a Yicu ruyi guy ngwakani nono ngwuci, “Äny gwubupa, uꞌru nono!” 42Kaji nggoo a yaamu ꞌtü ꞌdünggüngün ngwuꞌri nono.
43A Yicu gwäꞌrï ngge rimetanalu gwulleny ngwuci, 44“ꞌDingina, ïndï aaꞌti nga gwondaci dïjälü dere yiꞌral ye giyee. Ïndï ꞌdogo nga enggaci dirꞌdala ngwangina ngwunga nga ape gony gïgïlä nga ge mïꞌrïnï nono anaku aru gu Müjä ndi enggaci ngwüjü uꞌring nono gwunga.” 45Ngwube ele manni ngwugatu linginalu ngwubadalu ngwujaꞌri ngwe pad. No aar gäbïcï Yicung ating ꞌti ba be ïndälü kündär nggoo piꞌred ndi ngwüjï engga ating be jalu poor ngenone jücü. Ati ngwüjï jina ndi elaca ngwaalu ꞌdar.