1Ɓande na nga ɓa lozingo,

saanola milimo misɔ,

kasi omimikye,

pho ya iyeɓa ɓo mili ma Ŋwaphongo.

Phɔ ɓaimosi ɓaikye ɓa ɓɔɔlɛ ɓanyangwa o mokyisi.

2Na ɓoɓo, wamoeɓa Ɓolɔɓɔ pha Ŋwaphongo:

Molimo munsɔ moanole oɓokye Yesu Klisto aya na nzoto,

moli ŋwa Ŋwaphongo.

3Emba molimo munsɔ moote moanole Yesu,

temoli ŋwa Ŋwaphongo,

eli molimo ŋwa motɛmɛsi wa Klisto,

ŋwa ooka ɓɛ̀ɛ ɓawɔ oɓokye moye,

emba tata uŋwaŋwa eye, moli o mokyisi.

4Ɓana ɓa nga, ɓɛ̀ɛ ɓaali ɓa Ŋwaphongo,

oli ɓalongyi ɓa ɓaimosi ɓaɓana,

phɔ oli onte ya ɓɛ̀ɛ

ali munɛnɛ koleka oli onte ya mokyisi.

5Ɓɛ, ɓali ɓa mokyisi,

ɓambe na wɔ mowɔsi ŋwa mokyisi,

emba mokyisi moɓaokye.

6Ɓanga, toli ɓa Ŋwaphongo.

Moto okozingye iyeɓa Ŋwaphongo, kalookye.

Moto otoli wa Ŋwaphongo, talokye.

Na yango toeɓe

Ɓolɔɓɔ pha maphɔɔ ma phɛlɛ na ɓolɔɓɔ pha ɓɔɔlɛ.

7Ɓande na nga ɓa lozingo,

tozingane ɓanga na ɓanga,

phɔ lozingo loute na Ŋwaphongo,

emba moto munsɔ okozingye

aɓotama na Ŋwaphongo, aeɓa na Ŋwaphongo.

8Moto otozingye, taeɓe na Ŋwaphongo,

phɔ Ŋwaphongo ali lozingo.

9Kyeka ndengye eya wɛnɛnɛ lozingo la Ŋwaphongo onte ya ɓanga:

Ŋwaphongo atoma Ŋwana wɛ nde mɔnɔmɔ o mokyisi,

phɔ ya oɓokye toɓe na ɓomɔɔ phɔ yɛ.

10Kyeka ɓoli lozingo:

Teli ɓanga ɓazinga Ŋwaphongo,

eli nde yo owa lozinga

na owa toma Ŋwana wɛ ndokolo mbeka phɔ ya masumu ma ɓanga.

11Ɓɛbi na nga ɓa lozingo,

ɓo Ŋwaphongo alozinga ɓaɓona,

na ɓanga tosengyesi izingana ɓanga na ɓanga.

12Ŋwaphongo, na moto mɔnɔmɔ taika mowɛnɛ.

Ɓo tozingane ɓanga na ɓanga,

Ŋwaphongo ali onte ya ɓanga,

emba lozingo lɛ onte ya ɓanga lowɛnɛɛ.

13Na ɓoɓo toeɓe oɓokye:

Toli onte yɛ, nɛ ali onte ya ɓanga.

Alophɛ Ɓolɔɓɔ phɛ.

14Emba ɓanga, towɔ phɔ tomowɛnɛ,

oɓokye Tata atoma Ŋwana wɛ ndokolo Mobikye wa mokyisi.

15Moto munsɔ okowɔ oɓokye Yesu ali Ŋwana wa Ŋwaphongo,

Ŋwaphongo ali onte yɛ, nɛɛ ali onte ya Ŋwaphongo.

16Emba ɓanga, toeɓe phɔ toanola,

lozingo lowɛninya Ŋwaphongo onte ya ɓanga.

Ŋwaphongo ali lozingo:

Moto ooli na lozingo

ali onte ya Ŋwaphongo, Ŋwaphongo nɛɛ ali onte yɛ.

17Na ɓomɔ, lozingo onte ya ɓanga lowɛnɛɛ,

oɓokye tolokokyi ilota mokɔlɔ ŋwa mosambisa ɓɛ́ɛ mokyisi,

phɔ ɓoli yo,

na ɓanga mɛ, nde ɓoli ɓanga o mokyisi mumu.

18Onte ya lozingo tewali ilota,

kasi lakolo lozingo lomanya ilota,

phɔ ilota kaɓangye etumbu,

emba moto okolote tali na lakolo lozingo.

19Ɓanga, tozingye,

phɔ yo moto wa o ɓoo wa ilozinga.

20Ɓo moto mɔnɔmɔ kawɔ oɓokye: «Nazingye Ŋwaphongo», bibi kaine nwɛbi nɛ,

ali moto wa ɓɔɔlɛ.

Phɔ moto otozingye nwɛbi nɛ okowɛnɛ yo,

takokyi izinga Ŋwaphongo otowɛnɛ yo.

21Emba kyeka moɓeko ŋwaalophɛ yo:

Moto okozingye Ŋwaphongo,

azingye na nwɛbi nɛ mɛ.