1Masapuɏʼn awaton taku lakapsut chi pammatila un umali kan chitaku, ya achi taku makasongsongbyat mipanggop si sabyaliʼn somsomokcha. 2Isun chi tagu un, gapu si kilakapsut chi pammatila, abus chi alimaɏay si kalola. Ngim ha pammatin cha uchum, makwa un kaloncha byaɏanglaʼn makan. 3Ked ha taguʼn mangan si byaɏanglaʼn makan, achila otyan chillawon cha mangissan si uchum un makan. Ked ha mangan bo si alimaɏay abus, achipunla otyan bo chillawon cha mangan si byaɏangla, ti ilawat bo Apudyus siya. 4Silukaman un manguis si bubùulon cha uchum? Ti ha apula makaammu un mangibyega lu ustu willu achipun. Ked ustu koola ti kabyeeɏan Jesu Kristu un tuɏungan siya.

5Awed chi osaʼn tagu un potpotgola osaʼn eɏgew lu cha uchum un eɏgew. Ngim cha uchum, man-iisuwoncha cha kaeɏge-eɏgew, lappun ossaan si lapotpotog. Ked lappun chuwachuwalaʼn kacha osa maplok si somsomokla. 6Cha mangipotog si osaʼn eɏgew, kooncha un malayawancha kan Apu. Siya bo kan cha mangan si byaɏanglaʼn makan, kaloncha bo si malayawancha kan Apu ti lanyamancha kan Apudyus. Ked cha mangissan un mangan si byaɏanglaʼn makan, kooncha un malayawancha kan Apu ya manyamancha kan Apudyus. 7Kan chitakuʼn mamati, chakampun un michayawan taku singsington taku si katattagu taku ya ulay bo matoyan taku. 8Ti ha panggop chi allaʼn mataguwan taku siya machayawan Apu Jesu Kristu, isula bo si matoyan taku, ti michayawala bo. Ked ulay lu matattagu taku willu matoy taku, lappun uchum si panggop cha alla, lu achi abus chi michayawan Apu Jesu Kristu un singkuwa kan chitaku.

9Ti latoy ya ummuli latagu si Kristu ta siya man-Apun cha matattagu ya cha latoy. 10Ked lu si Jesu Kristu Apu taku losan, lappun kalobbongan taku un manguis ya mangam-amsiw kan cha biɏun taku. Ti losan taku sumangu makuis kan Apudyus. 11Ti kalan chi liigili un ugudla,

12Ked kacha osa kan chitaku, sumangu kan Apudyus un malongbyat kan cha losan un killingwala.

13Ked masapuɏʼn iyagey taku un mampillabyasuɏ, ya allechen taku ta achi taku mangwa si makabyasuɏan cha biɏun taku. 14Gapu si litimpuyugek kan Apu Jesus, sigulachuʼn ammuk un lappun makan un kiisaw si sangwalan Apudyus. Ngim lu ibilang chi osaʼn tagu un kiisaw, kiisaw kan siya lu kalola. 15Ked chikayu boʼn mangan si byaɏangla, ilanyu ta chakampun si mayam-alan chi pammatin cha biɏunyu mangalanyu, ta lu kamatchi koonyu, ipailayu un lappun ayatyu kan chicha, ti siya bo osaʼn langkatoyan Jesu Kristu. 16Ilanyu ta cha ibilangyuʼn bibiɏu ked achipun mambyalin un lawwing chi mibyegbyeg-ala. 17Ti ha Mampangatan Apudyus, chakampun un mipanggop si makan ya mailum, ngim lu mipanggop si mibilangan taku lalintog, ya ha makatimpuyugen taku ya galas un idchon chi Ispiritun Apudyus. 18Ked lu kamatchi koon taku un mansimbi kan Kristu, pachayawan taku si Apudyus ya mas-oman chitaku kan cha tagu.

19Ked ipapati taku un mangwa si losan un mampatimpuyug ya mampakoscheɏ si pammati taku. 20An-allechen taku ta achi taku yam-alon chi kawachin Apudyus gapu si makan. Losan un makan mampeɏkas, ngim lawwing lu siya makabyasuɏan chi biɏun taku chi mangalanyu. 21Ked ha koon taku, achi taku mangwa si mayam-alan chi pammatin cha biɏun taku ya achi taku mangan si ischa willu umilum si byeyas lu siya mayam-alan chi pammatin cha susulud taku.

22Lu silu pammatim mipanggop kan cha alla, abus kayu kan Apudyus si mangagammu. Ti pian chi tagu lu achipunla amuyuwan chi long-egla gapu si killingwala un ammulaʼn bibiɏu! 23Ngim ha manchuwachuwa mipanggop si makan ya killanla mit laing, chusaon Apudyus ti chakampun un siluɏutla pammatila. Ti cha losan un koon taku un achipun maibyeseɏ si pammati ked byasuɏ.