पाथाए प़ाइँरानी छींताव छाप ओफैव
1नकिन नो पाथाए प़ाइँरानी छींताव छाप ओफैक स्वर्गत आधा घन्ता पै साइँसुइँ ताके। 2नकिन परमेस्वरए ओङ़ाकाव सात जना ओचाकर्यार ङारारँःके। नोरालाई सात गोता भोंकर याद ओरानैज़्याव।
3हाःत ज़ परमेस्वरए छुत तोबो ओचाकर्या हुद धुप झाःन्या सुने जा उकुइत रैद सिंहासन ङ़ाकाव सुने थानक च्याँःसिहुके। नोलाई नो थानत परमेस्वरए छैंव उमींराए यापोंखारिउ पाँत चा·द्यान्याए जूँनी कुधु धुपर याद यानैज़्याव। 4नो धुपए उम़िकुइ परमेस्वरए छैंव उमींराए यापोंखारिउ पाँस थोम्सिद नो चाकर्याए उकुइनी ज़ परमेस्वरए ओङ़ाक केस्के। 5हाःत ज़ फरी नो चाकर्याए नो थानताव मेरैः ओजाल झाःद मानुवात ख्याक्यो। ओख्याव प़ाइँना ज़ नम बनै गर्जिद म्याल्याकनी मिलिक ताद भोंचालो बाके।
सात गोता भोंकरर
6हाःत ज़ नो याकुइत भोंकर ल्यो सात जना परमेस्वरए ओचाकर्यार याभोंकर तप्न्यात थूसिकेर।
7उस॰कताव चाकर्याए ओभोंकर ओतबो प़ाइँना झी बरे·सिउ तिसरै स़ोनो मेंः बनै ज़ वाके। नोए मानुवाताव सींर स़ोंभानी तभा भरी नामस ज़ सघाद चुयाप याजैक्यो। छी भरी ब ओपो·स ज़ सघाद याखेम्क्यो।
8नकिन नोए उछींताव चाकर्याए ओभोंकर ओतबोत बनै घ्योःव हाँ स्यासो मेंःए सुम्ला समुन्द्रल तेद नो समुन्द्र स़ोंभानी तभा भरी झी ज़ ताके। 9फरी नो समुन्द्रलाव यास॰ ल्यो भरी स़ोंभानी तभा भरी सिकेर। समुन्द्रलाव जहाजर मनी स़ोंभानी तभा भरी खेम्केर।
10नकिन फरी नोनी निछींताव चाकर्याए ओभोंकर ओतबोत नमतिन तोबो बनै घ्योःव चाँःज़्याव मेंः स्यासो सोरो तेद ऱीमुलर स़ोनो खोलार स़ोंभानी तभा भरिल परिके। 11नो सोरोए उमिन ‘अइरालु’। नो परिउ भरिलाव ऱी भरी बनै काव अइरालु मिताव ज़ ओतावए नो ऱी ओज़्याव मिँर कुधु ज़ सिकेर।
12नकिन नो स़ोम्लोराए याछींताव चाकर्याए ओभोंकर ओतबोत निमी, स़्यावै स़ोनो सोरोर स़ोंभानी तभा भरी चुम चुमो ताकेर। है जैद ला मनी स़ोंभानी तभा भरी चुम चुमो ज़ ताके। हिताव ज़ री मनी स़ोंभानी तभा भरी छाम छामो ज़ ताके।
13नकिन फरी ङाभाल्सिक नमत तोबो काप्च्यागा उभुर्ज़्याव ङारँःके। नो बनै चोइस अइ लिद उक़िज़्याव, “नो आःपै यामातप्ताव स़ोम्लो भोंकर परमेस्वरए ओचाकर्याराए यातबोत आव मानुवाताव मिँरालाई स़ोंखेप थैए माँतकन तारिज़्या,” है उलिज़्याव ङाथैके।