1Ning Yona gamona doa mana axa baguli saing ating disala. 2Baing sabu na Toxoratamona ba, “O Toxoratamona, ngaharua bila li bungina ngawauyu yabagia, maxuna? Namua naga ngaluki mala Tasis sap. Namua na ngaxabiau, ung Urana usingangam xaung atim dimoti mana lipudi, atim disala sap te. Kubolum murum sibunama subingan te, baxagi maung. Uxugia hatuminganoa mana uhaxuya lipudi kuboluding diandi, daxap doa bila uhau manadi te. 3Baing ina naga, Toxoratamona, usahi walingagua. Xai buk ngamati, nam ngawauyu.”

4Ne Toxoratamona haxuya ba, “Atim salianamga li bola maring, bo?”

5Baing Yona sok sangua long sabanga, ila sangga karaga saing rung la ba. Tongtongia xahi to, baing rung yonggaxinia, ragu mana baraxinta bagula sok mana long sabangga ba. 6Baing Toxoratamona Urana ta waxu tela ba haing etua mana Yona bu sina yongga mana toxona xaung bu tatua salianoa. Baing Yona yaha sibuna mana waxua ba. 7Ne buragina, xaidaba bo ba haing, baing Urana ta moxamoxa tela ba ma gaxuti waxua bu mutuxu. 8Xaidaba haing laing sup, baing Urana ta yang saliana ba ma sangga karaga, saing xaidaba xani haringing sibuna Yona toxonia bu makmatiauba. Muruna ba matiuba, baing harua ba, “Xai buk ngamati, nam ngawauyu.”

9Ne Urana harua na Yona ba, “Maring ba atim disala mana waxua li, bo?”

Baing haxuya ba, “Wane, maring ba! Atigu disala buk sangaʼm xai buk ngamati.”

10Ne Toxoratamona harua ba, “Waxua li oa mana yambong taininau ne yambong tela mutuxu. Ung guwasa mana te saing ung gulibu sok te. Ne ung gusinga olang mana! 11Ning Ninibe long sabanga sibuna, ramramona sabanga, lipu 120,000 duwa mana baing. Daxabia rimading rimamo xong te. Asaxa nangnang xumana duwa la ba xauna. Ne maring ba ngausinga mana long sabangga ba, bo?”