1Anih loh kai taengah, “Diklai hilvang a tongnah vaengah, diklai kah hmucung loh amah hmuen ah a om hlan ah, khohli aka cet a hong uh hlan ah, 2rhaek neh khohum ol a hum hlan ah, khopha hmaivang a tueng hlan ah, paradai kah khoengim a khueh hlan ah, 3rhaipai a then a tueng hlan ah, thoeihnongnah thadueng a pai hlan ah, vaan puencawn kah caempuei toeklek pawt la tun a tingtun hlan ah, 4yilh kah a sang a pacuet hlan ah, bangyai kah imdang ming a sui hlan ah, Zion ah tungkho a sut hlan ah, 5tahae kah kum he a thoelh hlan ah, tahae kah tholhnah aka hii rhoek te awtnah a om hlan ah, tangnah a tunghlaep neh kut-ha a khueh hlan ah, 6He kah hno he ka hmoel coeng. Te rhoek te kai lamlong bueng ni a saii tih a tloe lamlong moenih. Diklai a bawtnah khaw kai lamloh ha thoeng vetih a tloeh lamlong mahpawh,” a ti.

7Anih te ka doo tih, “A tue paekboenah dongah balae a om eh? A tue lamhma te mevaengah lae boeih vetih, hmailong kah dueklai tue a dongah neh a om eh?” ka ti nah.

8Anih loh n'doo tih, “Abraham lamloh Isaak, anih lamoh Jakob neh Esau a sak, a tongcuek lamkah ni Jakob kut loh Esau kah khomik te a tuuk coeng. 9Esau tah tahae kah diklai tue a bawtnah tih, Jakob tah aka lo ham a tue a tongnah ni. 10Hlang kah a tongnah tah a kut la om tih, hlang kah a bawtnah a khomik ni. Ezra, Ezra, kut neh khomik laklo ah bang khaw tlap voel boeh.

11Ka doo tih, “Tlungluen Boeipa aw, na mikhmuh ah kolonah ka dang atah, 12hlaem yin ah na mikhmuh kah nan tueng te a cungvang khaw an sal taengah n'tueng lah,” ka ti nah.

13Amah loh kai te n'doo tih, “Na kho te thoh lamtah boeih na yaak bitni, a ol cai sak. 14Na pai nah hmuen te muep a hinghuen atah, 15ol a cal vaengah khaw let uh boeh. Te ol tah a bawtnah kawng ni, diklai khoengim khaw na yakming bitni. 16Te olthui loh te ni a paelki. Amih te let uh vetih thuen uh ni, amamih kah a bawtnah khaw a ming coeng,” a ti.

17Ka yaak vaengah ka kho ka yueh tih ka hnatun, ol a thui tih, a ol khaw tui dueng ol bangla om. 18“Diklai khosa rhoek hip hamla ka yoei vaengah he a khohnin ha pai coeng. 19Bothae aka saii rhoek kah a bothae phu te ka cawh vaengah, Zion kah tlayaenah a cup vaengah. 20Khum tangtae diklai tue dongah kut-ha a khueh vaengah, he rhoek kah minoek he kan tueng ni. Vaan maelhmai soah cabu a rha vaengah, ka laitloeknah tun tueng bitni. 21Camoe kumkhat ca khaw amah ol cal vetih bungvawn loh camoe te hla thum hla li ah vivawt la a cun ni. Te vaengah hing suidae khawn he ni. 22A tuh nah hmuen khaw a tuh pawt la pha vawva ni. Cangboh a bae khaw a hong la vova a hmuh uh ni. 23Olueng te a len a tum uh tih a yaak uh vaengah buengrhuet let uh ni. 24Te tue ah tah paya loh a paya te thunkha bangla a vathoh thil ni. Sokca tuisi khaw pai vetih khonoek pathum pali khuiah long mahpawh.

25Nang hamla kan thui phoeikah aka om rhoek boeih te tah daem vetih kamah kah khangnah neh lunglai a bawtnah a hmuh ni. 26Te vaengah vaan la a loh rhoek te a hmuh uh ni. Amih tah a thang paek lamloh dueknah te a ten uh moenih. Diklai kah a lungui kah khosa rhoek te thovael uh vetih mueihla tloe la thohai uh ni. 27Boethae te boeih a khoe vetih laithae khaw paa pawn ni. 28Uepomnah loh saihnim vetih huencaknah te a hnawt ni. A thaih aka thai tlaih pawh oltak te khaw koep phoe ni.

29Kai taengla a thui li vaengah ka painah hmuen kah lungto soah ha ben hang bangla vawlh vawlh nong. 30Anih loh kai taengah, “He tueng ham ni tihnin hlaem ah nang taengla ka lo. 31Te dongah koep na thangthui tih hnin rhih na yaeh atah he lakah aka len hno te nang taengah koep kan thui ni. 32Khohni loh na ol te a yaak coeng tih tlungluen loh na thuemnah khaw a hmuh coeng. Na camoe lamloh a cilrhik la na cue uh te khaw a hmuh coeng. 33Te dongah ni he kah boeih he nang tueng ham neh nang te, ‘Tangnah lamtah rhih boeh,” ti nah hamla kai n'tueih. 34Hnukbuet ka a tue dongah na poeknah te a hinghong la poek koeloe boel lamtah a hnukkhueng tue ham khaw cukhat la saii koeloe boeh,” a ti.

35He phoei lamkah tah ka rhap bal tih lamhma ka bang phek la hnin rhih ka yaeh. Kai hamla a thui boeih te yalh thum dongah tah soep laeh saeh ka ti. 36A hnin rhet dongah tah ka thinko he a khuiah limlum bal coeng. Te dongah Khohni kah mikhmuh ah pahoi ka cal. 37Ka mueihla loh bahoeng niknuk coeng tih ka hinglung khaw ngai hmang la om.

38“Boeipa aw, suentae a tongcuek vaengah na thui coeng ta, lamhma cuek hnin ah, ‘Vaan neh diklai sai la om saeh,’ na ti dongah na ol te na bibi dongah soep coeng ta. 39Te vaengah mueihla tah phuel uh tih a hmuep neh dingcak loh a cungkuem a kop, hlang ol ti he khaw ana om hlan. 40Te vaengah thakvoh imkhui lamkah vangnah khosoeng te a thoeng ham ol na paek tih na bibi te khaw tueng.

41A hnin bae dongah tah bangyai dongkah yilh na khueh tih tui rhoek te phih hamla ol na paek. Te dongah hlop at tah a sola luei tih hlop at tah a laedil ah om.

42A thumnah hnin ah tah tui rhoek te diklai hlop rhih la tun tingtun ham ol na paek. Te dongah diklai hlop rhuk tah na rhae sak tih te rhoek te thing na ling, na tawn dongah na mikhmuh ka bitat la paho om. 43Na ol kamat a caeh vaengah na bibi khaw rhenten a coeng. 44A thaih khaw a bawtpat kolla a tui a hlim a soeprhaep neh, rhaipai khaw pangcik neh botui la, bo-ul la thui thai, poek thai pawt hil ah tlek thoeng. He boeih he a hninthum dongah na saii.

45A linah hnin ah tah khomik kah a aa khaw, hla kah a vang khaw, aisi kah soepsoeinah khaw a om hamla ol na paek. 46Te rhoek te hlang ham aka thotat la om ham neh boelrhai ham ol na paek.

47A hnin nga dongah tah hlop rhih te ol na paek tih tui khaw, mulhing, rhulcai, vaa neh nga a thoeng ham ol na paek. Te dongah te rhoek ana coeng van. 48Olpaek bangla tui duek loh aka hing mulhing a thoeng sak. Te dongah namtom rhoek loh namah kah kopoekrhai bibi te hoe pai saeh.

49Aka hing mulhing te panit la na khoem tih Behemoth neh Pakhat te tah Leviathan la a ming na khue. 50Khat neh khat te hloep na hoep. Tui loh hlop rhih la tun a tingtun sak long te khaw te rhoi te tu thai pawh. 51Behemoth tah a hnin thumnah dongkah na rhae sak khuiah hlop at te na paek tih a khuiah kho a sak. Te ah te mol tlang thawngkhat khaw om. 52Tedae Liviathan tah tui a hlop rhih te paek. Teah te na ngaih rhoek loh na ngaih vaengah a caak hamla na khoem pah.

53A hnin rhuk dongah tah na hmaiah saelhung khaw, khohong rhamsa khaw, rhuicai khaw, a thoeng hamla diklai te ol na paek. 54Te rhoek boeih kah a so neh, na kut dongkah na bibih boeih soah uktaemkung la Adam na khueh. Anih lamkah ni kaimih boeih khaw, na coelh pilnam boeih khaw a thoeng,” ka ti.

55“Boeipa aw na taengah boeih ka thui coeng he. Lunglai boeih kaimih ham na suen khaw boeih nan thui coeng. 56Adam cadil a tloe namtom rhoek te tah a hong pawn ni na ti. Amih tah timtui banghui la om uh tih a khuehtawn khaw vaihang dongkah tuicip nen ni na thuidoek. 57Boeipa aw, kaimih soah aka vuenan tih kaimih aka dolh namtom he melae a hong la na thui pawn eh? 58Tedae kaimih he na pilnam ni, he na caming omthang la na khueh. Dawk na thintlohnah, na thatlai thil, bahoeng na oingaih dae tah amih kut ah vik na paek mai. 59Na ol te kaimih ham na suen tangloeng atah, ka diklai he balaetih rho la ka pang uh pawh? Me vaeng hil nim a om ve?