1Anjoauwo ma Herod Antipas koaun in Galilee rongda doahr Jesus, 2ih pwehng nah papahk, “Me uhdahn John jounpoapdaij ne pwuroahng mourda. Ioar kahrehda ih kak wia joangoan manman pwiak.”

3Pwa Herod ne koldi John jounpoapdaij, piroahpene, kioang ih nehn kalpwuhj, ih wia me oang Herodias, pahien riahu Philip. 4Pwa John kin pwehng Herod, “Johpwa pwung koawoa en painkihla Herodias!” 5Herod uhdahn nimen kojukdi John, a ih mijik mihn Jew pwa irai kin wiahki John joukohp men.

6Rehnin en Herod noaisikdiho nihn Herodias jerpeinno uhda, kahkahlek mwohn pokonno. Herod inenin malaukihda, 7ih inoaukihdi apel kahukihoang jerpeinno, “Ngoahi pirin kioang koawoa me ohroj ma koawoa poaki.”

8Jang in kaweid in ah nohnohu, jerpeinno poaki Herod, “Kihdoahng ngoahi wijahkije apel apkas moangoan John jounpoapdaij nehn oau pileis en!”

9Nahmwarkiho injinjuwedkihla, a jang in kahula apel inoau ma ih wiahda mwohn sohn kamdippwo ohroj, ih pwa en jerpeinno poakpoakko en pwoaida. 10Moangoan John ken poalpoaljang nehn kalpwuhjjo. 11Moangoan John wijikdo nehn pileis oau, liklikkoang jerpeinno; ih uhda wahlahng ah nohnohu. 12Nihn John sohnpadahkkok indoa oaloa palwoaroa wahla jaripdi; Irai ken inla pwehng Jesus.

13Nen en Jesus rongda rongin John, Ih inla jang wijahu, Ih pwilihda pohs pas, jeilahng kalahpwukla wija kij. Armajjok rongda me, irai injang nehn ahr koaujoannok wud nehn japw kaujla Ih. 14Nen en Jesus doaudihjang pohn pohsso, Ih kapangda pokon koalik oau, nen kapehdin ipwilkihda irai, Ih kemwehuwihla armaj johmwehuwok iparai.

15Injoausik pene Nah sohnpadahkkok indoa ipoa pwehng Ih, “Maing, ne rospene, a wija kije japwsoahn oau. Kadarla pokonno pwa irai en kak inla nehn kahnihmw dupukda kanrai mwinge.”

16A Jesus japoang irai, “Irai johpwa anahne inla. Kamwai pein kamwinge irai.”

17Irai pwehng Ih, “Mehwahr mine ipamai, lopwonin pilahwa limoau apel mwumw roahmen.”

18Jesus pwehng irai, “Wahdo oang Ngoahi.” 19Ih pwehng pokonno en mwindi pohn mohk. Ih oaloa lopwonin pilahwa limoau apel mwumw roahmen, jardahla nehnloannge, kapingkalahngan oang Koahs, sipwangpijoang pilahwa, kioang Nah sohnpadahkkok, sohnpadahkkok wud nehk oang pokonno. 20Armaj ohroj mwinge oaroh moadla, sohnpadahkkok dowihda luhwen mwinge wiahda kiam eijek riau. 21Dirin woal ma pwili mwinge, woal limekid, li apel jeri johpwa pwili wadwaddoang.

22Jesus pwehng Nah sohnpadahkkok arai en doauda pohn pohs oau jeila oaloap jeddo, pwa Ih en kadarpijoang pokonno. 23Mwerin Ah kadarpijoang armajjok, Ih indahla kalahpwukla pohn dol oau, pwa en kapkap. Ih minmine wijahu kalahpwuk oaroh rospene. 24Ioar anjoauwo ma pohsso ne dohla mine nehn pwungen lehu okdekkihjili nohk pwa enngo sihkei koaldohng pohsso.

25Nehn pwungen kiloak jiluh apel wonou injohrehn, Jesus inla iparai, alu pohn lehu. 26Nehn en sohnpadahkkok kapang Ih alu pohn lehu, irai inenin majpwehkda. “Eni men!” Irai pwa apel rahrahuki arai majpwehk.

27Jesus pispisinnoar lallahng irai, “Kamwai sihkei!” Ih pwa, “Ngoahi me, kamwai joah majpwehk.”

28A Peter pwehnglahng ih, “Maing, amai Koaun, ma uhdahn koawoa men, pwehng ngoahi en alwe ipoamw, alu pohn jed.”

29 “Koa, indoa,” Jesus pwehng ih. Doar Peter kerdihjang pohn pohsso, alu pohn jeddo inla ipen Jesus. 30A nehn ah poahmda sihkeilahn enngo, ih majpwehkda, sapda pwuhpwuhrdi. Ih pwa, “Maing, Doaroahla ngoahi!”

31Anjoauwohr Jesus pukla, koldi ih, pwehng ih, “Amwda oamw pwojon ke siksik! Amwda koawoa ke joh kamehlele?”

32Ara doaudahng pohn pohsso, a enngo uhdi. 33Sohnpadahkkok pohn pohsso pwongi Jesus, pwehng Ih, “Mehlel oar pwa koawoa uhdahn Nihn Koahs!”

34Irai kosehla lehu lellahng japw wijahkij oadoa Gennesaret. 35Nehn en armaj in wijahu kidalda Jesus, irai ken iloaklahng armaj johmwehuwok in wijahu apel wija koaroannok ohroj en wijikdohng ipen Jesus. 36Irai poaki Ih en mweidoahng armaj johmwehuwok en pukkoang ikin Ah likkoauwo; doar ohroj ma pukkoang kin sihkeida.