मेगु ल्वहंयागु पौ
1परमप्रभुं मोशायात धयादिल, “न्हापाथें ल्वहंयागु निपाः पौ हजि। अले जिं उकी छं न्हापा तछ्याःगु पौतय् च्वयातःगु हे खँ च्वया बी। 2छ सुथ न्हापां हे तयार जुयाः सीनै पर्वतया च्वकाय् जिगु न्ह्यःने थहां वा। 3छ नापं सुं नं मनू मवयेमाः। उलि जक मखु पर्वतय् गन नं सुं मनू खने मदयेमाः। फैच्वलय् व सा-द्वहं नं पर्वतया न्ह्यःने मज्वयेमा।”
4अले मोशां न्हापायागु थें ल्वहंपौ निपाः चानाः दय्कल अले परमप्रभुं आज्ञा बियादीगु थें सुथ न्हापां सीनै पर्वतय् थहां वन।
5अले परमप्रभु सुपाँचय् क्वहां झायाः व नापं अन दनाः थःगु पवित्र नां, “परमप्रभु” धकाः न्ववानादिल। 6अनंलि परमप्रभु वया न्ह्यःने झायाः थथे धकाः धयादिल,
“परमप्रभु, परमप्रभु
दया दुम्ह, सदां दयामाया यानादीम्ह,
तं चायेत लिबाकादीम्ह
व तसकं विश्वास याये बहःम्ह खः।
7वय्कः द्वलंद्वयात माया यानादीम्ह,
अधर्म, अपराध व पाप क्षमा यानादीम्ह खः।
अय्सां वय्कलं द्वंयाःम्हय्सित
सजाँय मब्युसे त्वःतादी मखु।
वय्कः पुर्खाया अधर्मया सजाँय
इमि छय् व छुइया पालय् तकं नं बियादीम्ह खः।”
8अले मोशां हथासं बँय्पाखे क्वछुनाः आराधना यात। 9वं धाल, “हे परमप्रभु छिं जिमित धात्थे माया याना दीम्ह खःसा छेँ जिपिं नापं झासँ। थ्व छगू जिराः जाति जूसां जिमिगु दुष्टत व पाप क्षमा यानादिसँ, अले जिमित थःगु हे सम्पत्ति थें नाला कयादिसँ।”
10अले परमप्रभुं धयादिल, “स्व, जिं छनापं छगू बाचा चिने। पृथ्वीइ फुक्कं जातितय् दथुइ गुबलें मजूगु अजूचायापुगु ज्या जिं छिमि मनूतय् न्ह्यःने याना क्यने। अले छिमिगु दथुइ च्वनाच्वंपिं मनूतय्सं परमप्रभुया ज्या खनी, छाय्धाःसा जिं छ पाखें छगू तःधंगु ज्या याये। 11थौं जिं छन्त बियाच्वनागु उजंयात मानय् या। स्व, जिं छंगु न्ह्यःनें एमोरी, कनानी, हित्ती, परिज्जी, हिव्वी व यबूसीतय्त लिना छ्वये।
12“बांलाक होस याना च्वँ, छ वनेगु देसयापिं मनूतलिसें छं बाचा चिने मते, मखुसा इपिं छिमिगु निंतिं तक्यनिगु जाः जुइ। 13इमिगु वेदीत स्यंका ब्यु। इमिगु पवित्र ल्वहंत तछ्याना ब्यु, अले इमि अशेरा द्यःमय्जुयागु थांतय्त पालाः क्वथला ब्यु। 14छिमिसं मेम्ह सुं द्यःयागु पुजा याये मते। परमप्रभुया नां ‘नुगः मुइकादीम्ह खः’। थ्व खनाः वय्कलं नुगः मुइकादी।
15“होसयाना च्वँ, व देय्यापिं मनूतलिसें बाचा चिने मते, मखुसा इमिसं थः द्यःतय्त बां बियाः पुजा यानाः भ्वय् न्याय्कीबलय् छिमित नं सःती अले छिमिसं इमिगु भ्वय् नइ। 16अले छिमिसं उपिं जातयापिं भौमचात हयाः इमिसं थः द्यःतय्गु पुजा याइबलय् छिमि काय्पिन्त नं अथे हे याके बी।
17“छिमिसं थःगु निंतिं नाय्काः मूर्तित दय्के मते।
18“सोडा मतःगु मरिया नःखः हनेगु या। जिगु उजं कथं आबीब लाया क्वःछिना तःगु इलय् न्हय्न्हुतक सोडा मतःगु मरि नयेगु या। आबीब लाय् हे छिपिं मिश्र देसं पिहां वःगु खः।
19“न्हापां बूपिं फुक्क काय् मस्त जिम्ह खः। अले सा-द्वहं व फैच्वलय्तय् न्हापां बूपिं बाजात नं जिम्ह खः। 20न्हापां बूम्ह गधाया मचाया भ्याःचानापं लिफ्या, लिमफ्यायेगु जूसा वयागु गःपः त्वथुला ब्यु। छिमिसं न्हापां बूपिं काय्मस्तय्त नं लिफ्यानाकायेमाः।
“सु नं जिगु न्ह्यःने ल्हातय् छुं मदय्क खने दःवये मते।
21“खुन्हु तक ज्या या, तर न्हय्न्हुखुन्हु आराम का। बुँ पुलेगु व छ्व लयेगु इलय् नं आराम का।
22“छिमिसं बुँइ सःगु छ्वनापं सामाज्याया नखः हनेगु या। हानं न्हय्गूगु लाय् थःथःगु फल खाय् धुंकाः मुनेगु नखः हनेगु या। 23दँय् स्वक्वः फुक्क मिजंत परमप्रभु इस्राएलया परमेश्वरया न्ह्यःने खने दयेक वयेमाः। 24जिं छिमिगु न्ह्यःने जातितय्त लिना छ्वये। देसया लागि लागा अप्वः याना बी। दँय् स्वक्वः छिपिं परमप्रभु छिमि परमेश्वरया न्ह्यःने वनिबलय् सुनानं छिमिगु बुँयात ल्ववंकि मखु।
25“जितः बलि छाय्बलय् सोडा दुगु मरि छाय् मते। सुथ जुइ न्ह्यःतकं छुत्काराया बलिया ला फुकेमाः, ल्यंका तये मते।
26“छिमिगु बुँ वःगु दकले भिंगु न्हापां सःगु अन्न व फल परमप्रभु छिमि परमेश्वरयाथाय् हजि।
“सुं च्वलेचाया मचायात वया मांया दुरुइ दय्के मते।”
27अनंलिपा परमप्रभुं मोशायात धयादिल, “थुपिं बचं च्व, छाय्धाःसा थुपिं हे बचंकथं छ व इस्राएलीत नापं जिं बाचा चिनागु दु।”
28अले मोशा अन परमप्रभु नापं पीन्हु पीचा तक छुं हे नये त्वने मयासे च्वन। वं उपिं ल्वहँपतिइ बाचाया बचं, झिगू उजं च्वल।
मोशाया ख्वाः ज्वल्ल थीगु
29बाचा चिनादीगु निपाःल्वहं पौ ज्वनाः सीनै पर्वतं क्वहां वःबलय् परमेश्वर व नापं खँ ल्हाःनादीगुलिं थःगु ख्वाः ज्वल्ल थीगु दु धकाः वं मस्यू। 30हारुन व फुक्क इस्राएलीतय्सं मोशायागु ख्वाः थीया च्वंगु खनाः इपिं वयागु न्ह्यःने वयेत ग्यात।
31अय्नं मोशां इमित सःतल, अले हारुन व थकालित वयाथाय् वल, अले वं इपिं नापं खँ ल्हात। 32अनंलि फुक्क इस्राएलीत वया न्ह्यःने वल, अले इमित परमप्रभुं सीनै पर्वतय् बियादीगु फुक्क उजं न्यंका बिल।
33इपिं नापं खँल्हाये धुंकाः थःगु ख्वाः गाबलं त्वपुल। 34मोशा परमप्रभुया न्ह्यःने वय्कःनापं खँ ल्हायेत वनिबलय् वं पिने पिहां मवतले थःगु ख्वाः उलिगु याइ। अले परमप्रभुं वयात छु उजं बियादी पिने वयाः वं इस्राएलीतय्त न्यंकी। 35अले इस्राएलीतय्सं मोशायागु ख्वाः ज्वाल्ल थीगु खनीगु। परमप्रभु लिसे खँल्हायेत दुने दुहां मवंतले हे थःगु ख्वाः त्वपुया तइगु।