योसेफं फारोया म्हगसया अर्थ कंगु
1निदँ लिपा फारों छगू म्हगस खन। म्हगसय् व नील खुसिया सिथय् दनाच्वंगु। 2खुसिं न्हय्म्ह तसकं स्वय्ज्यूपिं व ल्ह्वंपिं सा पिहां वयाः तिंकथिया घाँय् नः वन। 3अनं लिपा मेपिं न्हय्म्ह बांमलाःपिं व क्वँय् खने दुपिं गंसिपिं सा पिहां वयाः न्हापायापिं लिसें दंवन। 4अले छेंगू व क्वँय् जक दुपिं गंसिपिं सातय्सं ल्ह्वंपिं सातय्त नयाबिल। उबलय् हे फारोया न्ह्यलं चाल।
5व हाकनं द्यन, अले मेगु म्हगस खन। वं म्हगसय् छगू हे दंलय् बांलाःगु व दुकुलुगु अन्नया न्हय्च्वः सयाच्वंगु खन। 6अनंलि वं सालुसे च्वंगु व पुर्बया फसं झ्वाः जूगु अन्नया न्हय्च्वः लुयावःगु खन। 7अले व सालुसे च्वंगु अन्नया न्हय्च्वलं दुकुलुगु अन्नया न्हय्च्वःयात नुनाछ्वत। अले फारोया न्ह्यलं चाल। वं थ्व म्हगसय् म्हंगु धकाः सिल।
8कन्हय् खुन्हु सुथय् फारोया मन मच्वनाः देशय् दक्व ज्योतिषतय्त व सःस्यूपिन्त सःतके छ्वत। वं इमित थःम्हं म्हगसय् खंगु खँ कन। इपिं सुनानं फारोया म्हगसया अर्थ धाःसा कने मफुत।
9अबलय् हे दाखमद्यया थल ज्वनीम्हय्सिनं धाल-- “थौं जिं थःम्हं द्वंकागु खँ लुमन।” 10वं फारोयात धाल-- “छकः महाराजं जि व मरि छुइम्हलिसे तंम्वयाः जिमित झ्यालखानाय् कुनाबिल। 11अबलय् अन जिपिं निम्हय्सिनं नं छन्हु हे चान्हय् थीथी अर्थ दुगु म्हगसय् खना। 12अन झ्यालखानाया हाकिमया छम्ह ल्याय्म्हम्ह हिब्रू च्यः नं जिपिं नापं दुगु खः। जिमिसं वयात थःपिनिगु म्हगसया खँ कना। वं जिपिं निम्हय्सिगुं म्हगसया अर्थ कनाबिल। 13अले वं गथे धाल अथे हे जुल। जि थःगु ज्याय् हाकनं लिहां वया, अले मरि छुइम्हय्सित यख्खाल।”
14थ्व न्यनाः फारों याकनं योसेफयात काय्के छ्वत। वयात झ्यालखानां पित हल। अले व सँ व दाह्रि खानाः वसः हिला: फारोया न्ह्यःने दंवल। 15फारों वयात धाल-- “जिं छगू म्हगस खना। उकियागु अर्थ सुनानं कने मफुत। छं म्हगसयागु अर्थ कनेफु धकाः जिं न्यना।”
16योसेफं धाल-- “महाराज! जि थःम्हं ला अथे याये मफु। परमेश्वरं धाःसा महाराजयात मनं तुंगु लिसः बियादी।”
17फारों योसेफयात धाल-- “जिं म्हगसय् जि नील खुसिया सिथय् दनाच्वनागु खना। 18अले न्हय्म्ह स्वय्ज्यूपिं व ल्ह्वंपिं सा खुसिं पिहां वयाः तिंकथिया घाँय् नः वन। 19अनंलि न्हय्म्ह छेंगू व क्वँय् जक दुपिं गंसिपिं सा खुसिं पिहां वल। जिं अज्याःपिं सा मिश्रय् गुबलें हे मखनानि। 20व क्वँय् खने दुपिं गंसिपिं सातय्सं न्हापायापिं स्वये ज्यूपिं व ल्ह्वंपिं सातय्त नयाबिल। 21इमिसं अथे नःसां इमिसं नःगु धकाः सुनानं धाये फइ मखु। छाय्धाःसा इपिं न्हापा गथे अथे हे गंसिया गंसि तुं। अबलय् हे जि न्ह्यलं चाल।
22“जिं हाकनं मेगु म्हगसय् छगू हे दंलय् बांलाःगु व दुकुलुगु अन्नया न्हय्च्वः सयाच्वंगु खना। 23अले हानं सालुसे च्वंगु व पुर्बया फसं झ्वाः जूगु अन्नया न्हय्च्वः सल। 24व सालुगु व झ्वाःजूगु अन्नया न्हय्च्वलं बांलाःगु अन्नया न्हय्च्वःयात नुनाछ्वत। जिं थ्व फुक्क ज्योतिषतय्त कना। सुनानं हे थुकिया अर्थ कने मफुत।”
25योसेफं फारोयात धाल-- “महाराजया निगू म्हगसयागु नं अर्थ छगू हे खः। परमेश्वरं थःम्हं याये त्यनागु खँ महाराजयात क्यनादीगु खः। 26न्हय्म्ह स्वयेज्यूपिं साया अर्थ न्हय्दँ खः, अले बांलाःगु अन्नया न्हय्च्वःया अर्थ नं न्हय्दँ हे खः। निगुलिं म्हगसया अर्थ व हे खः। 27लिपा पिहांवःपिं न्हय्म्ह छेंगू व क्वँय् जक खनेदुपिं गंसिपिं साया अर्थ नं न्हय्दँ हे खः। अले सालुसे च्वंगु व पुर्बया फसं कयाः झ्वाः जूगु अन्नया न्हय्च्वःया अर्थ नं न्हय्दँ हे खः। थुकिं न्हय्दँ अनिकाल जुइ धाःगु खः।
28“जिं महाराजयात धयागु थ्व खँ परमेश्वरं थःम्हं यानादीत्यंगु खँ महाराजयात क्यनादीगु खः। 29मिश्र देशया न्यंकभनं न्हय्दँ तक तसकं बालि सइ। 30अनंलि मेगु न्हय्दँ अनिकाल जुइ। अले अनिकालं देशय् हाहाकार जुइ। थुकिं न्हापायागु भिंगु ईया खँ ल्वःमंकाबी। 31लिपा वइगु अनिकालं यानाः न्हापायागु भिंगु खँ ल्वःमनी, छाय्धाःसा थ्व अनिकाल तसकं ग्यानापुइ। 32महाराजया थथे लिसा कयाः म्हंगुया अर्थ परमेश्वरं थ्व क्वःछिनादीधुंकल, अले थथे याकनं जुइ धयागु खः।
33“उकिं आः महाराजं छम्ह ज्ञां दुम्ह व छु यायेमाः धकाः स्यूम्ह मनूयात ल्ययाः मिश्र देशयागु जिम्मा बियादिसँ। 34अले हानं महाराजं न्हय्दँ बालि यक्व सइबलय् नं न्याब्वय् छब्व बालि मुंकेत मनूत ल्ययादिसँ। 35इमित याकनं वयेत्यंगु न्हय्दँया ई दुने बालि मुंकाः हयाः शहरया धुकुतिइ धुकुतिइ स्वथनेगु व पिवाः च्वनेगु अधिकार बियादिसँ। 36थ्व बालि मिश्रय् जुइत्यंगु न्हय्दँया अनिकालय् छ्यलेत मुंकातयेफइ। थुकिं यानाः अनिकालया इलय् नं मनूतय् नये मखं धयागु दइ मखु।”
37फारो व भारदारत फुक्कसित थ्व ग्वसाः यल। 38वय्कलं इमित धाल-- “थ्व थें ज्याःम्ह परमेश्वरया आत्मा दुम्ह मनू झीसं गनं लुइके फइ ला?” 39अले फारों योसेफयात धाल-- “परमेश्वरं छन्त फुक्क खँ क्यनादीगु दु। छ थें ज्याःम्ह ज्ञां दुम्ह व सःस्यूम्ह मनू सु दइ? 40उकिं आः जिं छन्त हे मिश्र देशया हामा यानाबिया। फुक्क मनूतय्सं छंगु उजं न्यनी। थ्व सिंहासनं यानाः जक जि छ स्वयाः च्वय् लाइ।”
योसेफ मिश्रया हामा जूगु
41फारों हानं धयादिल-- “छ आः मिश्र देशया हामा जुल।” 42वं थःम्हं न्ह्यानातःगु अंगू त्वयाः योसेफया पतिनय् न्ह्याकाबिल। अले वयात भिंगु कापःया भान्तां लं फिकाः गःपतय् लुँयागु सिखः क्वखाय्कल। 43वं वयात गयेत थःगु स्वयाः क्वय्यागु बग्गी बिल। अले व गन गन वन मनूतय्सं न्ह्यःने न्ह्यःने वनाः “पुलिं चु, पुलिं चु” धकाः हालावन। थुकथं योसेफ मिश्र देशया हामा जुल। 44अले वं वयात धाल-- “जि फारो खःसां छंगु उजं मदय्कं मिश्र देशय् सुनानं छुं याये दइ मखु।”
45फारों वयागु नां सापनत-पानेह तयाबिल। वयागु ब्याहा ओनय् च्वंम्ह पुजाहारी पोतीफेराया म्ह्याय् आसनतलिसे यानाबिल। अनंलि योसेफ मिश्र देश न्यंक चाःहिल। 46मिश्र देशया हामा जूबलय् योसेफ स्विदँ दुम्ह खः। फारोया थासं पिहां वयाः व मिश्र देशय् न्यंक चाःहिल।
47न्हय्दँ तक अन तसकं अन्न सल। 48योसेफं व न्हय्दँया दुने अप्वः दुगु फुक्क अन्न मुंकाः शहरय् शहरय् स्वथनातल। वं फुक्क शहरय् अनया जःखः च्वंगु थाय्या अन्न मुंकाः तयातल। 49अन अन्न फिसःया फि थें च्वंक ल्याः खानां ल्याः खाये मफयेक मुंवःगुलिं जोसेफं उकिया ल्याःचाः तयेगु तकं त्वःताबिल।
50अनिकाल वये न्ह्यः योसेफया आसनतया पाखें निम्ह काय् दयेधुंकल। 51योसेफं “परमेश्वरं जितः जिगु फुक्क दुःख ल्वःमंके बियादिल, अले जिमि बाःया छेँयागु फुक्क खँ नं ल्वःमंके बियादिल” धकाः थः न्हापांम्ह काय्यागु नां मनश्शे तल। 52अले वं निम्हम्ह काय्यागु नां “परमेश्वरं जितः जिं दुःख सियागु देशय् मस्त बियादिल” धकाः एफ्राइम तल।
मिश्रय् अनिकाल जूगु
53मिश्रया न्हय्दँया तसकं अन्न सइगु ई फुत। 54अले योसेफं धाःथें न्हय्दँया अनिकाल सुरु जुल। फुक्क थासय् अनिकाल जुल। मिश्रय् धाःसा फुक्क थासय् अन्न दु। 55मिश्रय् च्वंपिन्सं नं अनिकालं यानाः नयेमखँसेंलि फारोयाथाय् वनाः अन्नया लागि बिन्ति यात। वं इमित धाल-- “योसेफयाथाय् हुँ, वं छु धाइ, अथे हे या।” 56दे न्यंक अनिकाल न्यँसेंलि योसेफं फुक्क अन्नया धुकू चाय्काबिल। अले मिश्रय् च्वंपिन्त अन्न मिल। छाय्धाःसा मिश्रय् न्यंकभनं तसकं अनिकाल जूगु खः 57फुक्क देशय् हे अनिकाल जूगुलिं मेमेगु देशय् च्वंपिं नं योसेफयाथाय् अन्न न्याःवल।