बप्तिस्मा बीम्ह यूहन्नां भिंगु खँ न्यंका जूगु
मर्कूस १:२-८; लूका ३:१-१८; यूहन्ना १:१९-२८
1अनं लिपा बप्तिस्मा बीम्ह यूहन्नां यहूदियाया मरुभूमिइ वनाः 2थथे धकाः भिंगु खँ न्यंकाजुल --
“पश्चाताप या,
छाय्धाःसा स्वर्गयागु राज्य न्ह्यःने
थ्यंकः वःगु दु।”
3थ्व हे यूहन्नायागु खँ यशैया अगमवक्तां थथे च्वया थकूगु दु --
“मरुभूमिइ छम्ह मनू थथे धकाः
हालाः वइ --
‘प्रभुयात लँ ब्यु,
वय्कःयागु लँ छिंका ब्यु।’ ”
4थ्व यूहन्नां उँटयागु सं थाना तःगु वसः पुनातःगु दु। अले जँय् छेंगूयागु जनीं चिनातःगु दु। वयागु नसा क्वःबुइँचा व गुँ कस्ति खः। 5यरूशलेमं, यहूदियाया फुक्क गामं व यर्दन खुसिया जःखः च्वंपिं मनूत वयाथाय् वल। 6अले थः थःगु पाप स्वीकार यानाः यर्दन खुसिइ यूहन्नापाखें बप्तिस्मा काल।
7यक्व हे फरिसीत व सदुकीत नं बप्तिस्मा कायेत वयाच्वंगुलिं वं इमित थथे धाल -- “हे सर्पया सन्तान, परमेश्वरयागु तंपाखें बचय् जुइत छिमित सुनां ख्याच्वः बिल? 8पश्चाताप याःथें छिमिसं थःगु चालचलन नं अथे हे या। 9‘अब्राहाम हे जिमि तापाःबाज्या खः, उकिं जिमित छुं नं जुइ मखु’ धकाः धयाजुइ मते, छाय्धाःसा जिं छिमित धाये -- परमेश्वरं अब्राहामया निंतिं ल्वहँतं नं मस्त दय्कादी फु। 10सिमायागु हाप्वलय् पा लाये हे त्यंगु दु। उकिं भिंगु फल मसःगु सिमा पालाः छ्वय्का छ्वइ।
11“जिं ला छिमित पश्चातापया निंतिं लखं बप्तिस्मा बियाच्वना। जिगु लिपा जि सिबय् तसकं तःधंम्ह झायाच्वंगु दु। जि ला वय्कःयागु लाकां ज्वनाजुइत तक नं मल्वः। वय्कलं हे छिमित पवित्र आत्मां व मिं बप्तिस्मा बियादी। 12वय्कलं ल्हातिइ हासा ज्वनातयादीगु दु। वय्कलं फुक्क छ्व हायाः थःगु धुकुतिइ स्वथनादी। अले छ्वस जुक्व गुबलें मसीगु मिइ छ्वय्कादी।”
येशूं बप्तिस्मा कयादीगु
मर्कूस १:९-११; लूका ३:२१-२२; यूहन्ना १:३२-३४
13येशू नं बप्तिस्मा कायेत गालीलंनिसें यर्दन खुसिइ यूहन्ना दुथाय् थ्यंकः झाल। 14यूहन्नां वय्कःयात थथे धकाः पनेत स्वल -- “छिं जक जितः बप्तिस्मा बियादी माः। छि जिथाय् झायादीयागु ला?”
15वय्कलं लिसः बियादिल -- “आःयात थथे हे थजु। थुकथं झीसं फुक्क धार्मिकता पूवंके माःगु दु।” अले वं “ज्यू” धाल।
16वय्कः बप्तिस्मा कयाः उघ्रिमय् लखं थहां झाल। उबलय् हे स्वर्ग चाल, अले वय्कलं परमेश्वरयागु आत्मा सुकुभतु थें जुयाः थःगु म्हय् जूवयाच्वंगु खन। 17अले स्वर्गं थथे धयाहल -- “थ्व जि यःम्ह काय् खः, थ्व खनाः जि तसकं लय्ताः।”