Bùa Ta-Atoq Padon Trùh
1Cô, i mòiq bùa ta-atoq padon trùh,
wa 'bài cwan da haq yŏc bìac lem jang wèq cwìang.
2Rìm ngai cwan wì haq tìah ca hanình mot ca cayeo,
tìah ca nòi bàng bahùt,
tìah ca diac loh ta taneh croh,
tìah ca yàp hmu càn ta nòi taneh croh crenh.
3Jò aih mat da 'bài mangai ma ngan ùh hìaq pùa, don da 'bài mangai ma tamàng jah tàng.
4Manoh hèm da mangai darenh jah hèm ngan bàu joq 'nàng;
rapet mangai rađa jah capoch ro rang.
5Wì pi doi mangai ranhùa aih mangai rahù,
wa mangai canic aih mangai loq enh am tabàih.
6Ma jah 'màng aih mangai ranhùa haq capoch bàu blùng,
manoh haq toq tình trong đòiq 'nùt,
đòiq broq loh tôiq lôi,
wa capoch ùh troq tajraq hlài ca Chuaq,
đòiq broq ca mangai pangot jah ŏi cliac dech
wa mangai croh ranŏng ùh jah ôq diac.
7Mangai padô alùan wê ranac dù.
Haq chaq tình bìac dù
wa bìac capoch jù lê đòiq broq raliang đac ca mangai nan xa,
'nhac ca mangai pa capoch bàu troq.
8Mahaq mangai i 'bang tìang lem toq hèm wa hatình ca broq tiaq trong lem hêq,
nhò bìac aih haq yòng cajap.
9Ô 'bài gu cadrì ma da-òih,
yòng tamàng bàu au beq;
Ô 'bài con adrùh ma ùh i ca manoh lem,
halang don tamàng bàu au beq.
10Loi mòiq hanam hòm,
ô 'bài con cadrì ma ùh i ca manoh lem, manoh pì jah hlè lèt,
ma jah 'màng aih mùa plì nho èh hnhung,
mùa xot plì nho hadai pi i.
11Ô 'bài mangai gu cadrì ma ùh i ca manoh lem, crè tarìt beq!
Ô 'bài con cadrì ma i manoh tàu tìa ta dađeh, crè tarìt beq!
Lêh đac eo ŏi chac dech beq;
càt ca'nam xam bai briang beq.
12Tùc dèh rada, rawòi dèh ca đùng taneh jìang,
wa long nho bàc plì.
13Taiq brech breo jah hon ta taneh jàn Au,
taiq bìac lem bùi rìm hnem wa rìm phôq pi i hòm.
14Ma jah 'màng aih hnem bùa loh ca hatenh hatot,
phôq bàc mangai loh ca wang wê wang wot,
go wa hnem gòm rap khoi loh còp trùh hloi hloi;
aih nòi lùa rôm ŏi, nòi ngè aban acaq cùi padài.
15Trùh jò Yiang Hadròih enh 'nhèq ùc 'noh ta bèn,
đùng wang wê jah wìa taneh jìang,
taneh jìang jah wìa rôm cràm.
16Jò aih bìac hadrah lem jang jah ŏi ta đùng wang wê,
bìac ta-atoq jah ŏi nòi taneh jìang.
17Bìac ta-atoq jah loh can catèm,
plì da bìac ta-atoq aih hatenh wa canòm cajap hloi hloi.
18Jò aih jàn Au jah ŏi ta nòi catèm,
ta hnem nòi cajap,
wa padài ta nòi hatenh.
19Mahaq mè preo jah clìh ta rôm cràm,
wa panàt phôq jah 'bìq tacro ha'neq.
20Xôq ramŏt ca pì, 'bài mangai ma rai adrech ti rìm 'bùc diac,
ca'naih 'bo wa lùa lam caq nhat.