Injiili eya
LUUKA
Amangʼana ku owuimpi
Ebuuki eya *Injiili eya Luuka yajojwa ni Luuka, Omugiriiki owasoma geeza kandi owakolanga emirimo egia owurezi, owagenda-genda ni Paulo na amutunzia mu engendo ziae ezia okulanzia injiili ezia lunyima. Awantu waingirizia mbwe ebuuki eno yajojwa agati ya emiaka egia 50–63, kandi omujoji agijojera omuntu owa aeta mbwe omukangasi Tiofiila.
Luuka awoola mu owutanikro eya ebuuki eno mbwe yajoja ebuuki eya injiili eno kugere tumanye owuene wuona owuri ku owulamu owua Yesu. Kutio yajoja omunayo guno mu engira ewurikana geeza, aa atarekere ingʼana rindi enze. Alonderezia amangʼana goona aga awantu waawoolanga ku Yesu okuemerra mu okuiwulwa, emirimo giae, okufwa no okuziuka kwae. Injiili eya Luuka eri ne eminayo gindi egiwula mu Injiili eya Mathaayo ni Mariiko. Ni mu eminayo gindi amangʼana gaawu gafwanana nakuwa gari ampi ino.
Luuka alagana geeza mu ebuuki eno mbwe Yesu ari Katonda, kandi mbwe yawanga omuntu mu owuiwulane owua Adaamu, owaaza na amangʼana amalootu agareeta owusangaavu owungi ku awantu woona. Yesu ari na amaani ku ewintu wiona ewiikola ku ekialo kandi emirimo giae mu ebuuki eno, gilagana amagongi, amasaasra ku awataka, okusawa okuri kuwuene, alala no okurinda awakazi na awaana. Goona galagana olugonzi olwa Katonda yalagana olureeta owuinunuzi ku ekialo ekia awooni.
Amangʼana ku owuimpi
1Omukangasi otiirwe Tiofiila, awantu awangi awamiire okukalawana okujoja ku ewintu ewimiire okuikola agati iifu ano. 2Wamiire okujoja amangʼana amalala aga ifwe twona twalagwa na awantu awasooka okugawona na amiiso ni gaikola kandi awaakorra Katonda mu okugalanzizia awantu. 3Kutio, mbona mbwe kulootu noona nkujojere amangʼana gano mu engira ewurikana aeniki omwene miire okugalondorezia geeza okuemera mu owutanikro, 4kugere omanye owuene wuona owuri ku amangʼana goona aga omiire okugererwa.
Okuiwulwa okwa Yowaana Omubatiisi
5Mu amiire aga *Eroode yawanga omwami owa Yudeea, yawangao *omuozia owaetwanga mbwe Zakaria, owawanga mu owuasio owua owulala owua awoozia owuaetwanga Abiija. Mukaae yaetwanga mbwe Elizabeethi, omwala owa awa Aruuni. 6Woona wawiri waawanga awigolovu emberi wa Katonda, kandi waarinda *ensikirra ne endagirra ziona ezia Katonda aa wataterera. 7Ni waawulanga omwana aeniki Elizabeethi yawanga omugumba, kandi woona wawiri waawanga awantu awakulu.
8Owuire wulala ni Zakaria yawanga na akola emirimo egia owuozia emberi wa Katonda mu owuasio owua owulala wuawu, 9yalowolwa ne ensiiti na awoozia awiina waae, nikulondokana ne enkola ezia emirimo egia owuozia, okuingira mu ekaalu eya Omwami okusamba *owubaani. 10Ne enyinga ezia okusamba owubaani wuatuuka, awantu woona awaaikumia okusawa, waasawiranga enze. 11*Enyankoi owa Katonda yafumira Zakaria aimerra nyakukono okusaaza okwa emeesa eya okusamba owubaani. 12Olwa Zakaria yamuwona, yazinduka amasaai kandi owuti wuamuamba. 13Ne enyankoi yamulaga otino, “Zakaria, otatia. Katonda amiire okuwurra okusawa kwao, kandi mukaao Elizabeethi aaza okuiwula omwana owekizia, omuluke eriina Yowaana.
14“Aaza okugera owone geeza kandi owe omusangaavu,
kandi awantu awangi wariwa ne ekisangaalo ku okuiwulwa kwae,
15aeniki ariwa omuntu omukaate emberi wa Katonda.
Na ataaza yanywa amalwa nakuwa ewintu ewilulu ewitowookwe;
kandi aaza okuizuziwua no *Omwoyo Omweru,
namba na akiari mu enda eya ngʼinwae.
16“Arigera Awaisraeli awangi wairane ku *Omwami Katonda waawu. 17Arikangata emberi wa Omwami na ari na amaani aga Omwoyo Omweru kiomo Eliija. Arigalusia emioyo egia waaswawu awaana okugonzia awaana waawu; kandi origera awa emitwe emikalu okuwurra amangʼana aga owuganga aga awalongoole, kugere waikagre okuingizia Omwami.”
18Ni Zakaria yawuuzia enyankoi otino, “Ekiesa okundaga mbwe ewintu wino wiriikola niki? Aeniki inze ndi omuntu mukulu, kandi mukange oona ari ne emiaka emiera.”
19Nikuemao, enyankoi yamuirania otino, “Inze ni *Gabrieli, *omutumwa okola emberi owa Katonda; kandi ntumrwe okugamba-gamba ni iwue ni nkureetra amangʼana amageni amalootu gano. 20Kutio, manya mbwe ooza okuwa omurimba otagamba-gamba nawuno kutuuke owuire owua ewintu wino wiiza okuikola, aeniki ngokaganya na amangʼana gange gano agaaza okuikola owuire wuago.”
21Ku enyinga ezio, awantu awaasawanga enze awo waarindanga Zakaria ni waaluguula ekiagera na akinda ino mu ekaalu munsi otio. 22Olwa Zakaria yafuma enze, ngakaesanga okugamba-gamba. Kuno kwagera wamanya mbwe awuine owusasuko mu ekaalu; aeniki yawalagirizianga ewintu mala na amakono ni ngakanawula ekingʼana.
23Ne enyinga ezia owuasio owua okukola mu ekaalu ziawua, Zakaria yairana engo waae. 24Lunyima, mukaae Elizabeethi ya-amba isaai kandi yaiwisa mu enyumba ku emienzi itaanu na atafuma enze. Yawoola otino, 25“Katonda nio onkoriire geeza otino. Mwakuuno ambariire no owusiza wuae kandi antoorreko ensuuko ezia owugumba emberi wa awantu.”
Okulanzia okuiwulwa okwa Yesu
26Ne Elizabeethi yawanga ni isaai eria emienzi mukaaga, Katonda yatuma enyankoi Gabrieli ku omugizi ogwa Nazareeti, mu ekitemo ekia Galiili. 27Yagia ku omwala omugima oetwa Maaria, owawanga no owuiko owua okukwezana ni Yoseefu, owaemanga mu ekiriango ekia Omwami Daudi. 28Enyankoi oyo yamugiako amulaga otino, “Oikaziwue, iwue omwala omusereke. Omwami ari ni iwue kandi aomereerwe ni iwue!” 29Maaria yainyaasia mu omwoyo gwae ino ku amangʼana ago kandi yaiwuuzia mu amaingirizio gaae ekia amakeezio ago gaalagananga. 30Enyankoi oyo yamulaga otino, “Maaria, otatia, aeniki Katonda ari omusiza ni iwue. 31Kutio, wona! Ooza okuamba isaai kandi oiwule omwana owekizia kandi orimuluka mbwe Yesu. 32Ariwa omuntu omukaate, kandi arietwa mbwe Omuzia owa Katonda omunene; kandi Omwami Katonda arimuta ku entewe eya owuami owua guukwa waae Daudi. 33Ariwa omwami owa awiizukulu awa Yakoobo ku emiigo emiera egiiza kandi owuami wuae ngawuriwua yawa!”
34Maaria yawuuzia enyankoi otino, “Kino kiesa okuikola kitie, ni inze nkiari omwala omugima okiari okuwa alala no omusaaza?” 35Enyankoi yamuirania otino, “Omwoyo Omweru aaza okukuuzako kandi amaani aga Katonda ori kungulu okukira gaaza okukusanikira. Kutio omwana owa ooza okuiwulwa oyo arietwa mbwe Omweru, Omuzia owa Katonda. 36Namba Elizabeethi, omuganda waao, oona aaza okuwa no omwana kukawa mbwe ari omukiire. Kandi iye owaetwanga omugumba nyingeeno ari ne enda eya emienzi mukaaga. 37Aeniki kiwulao ekiesa okukira Katonda okukola.”
38Maaria yairania otino, “Inze ndi *omukurumu owa Omwami Katonda, kandi nganyire ekintu-ukintu ekia aagala mbwe kinyiikoleko.” Nikuemao enyankoi yagia amureka.
Maaria agiire okuwona Elizabeethi
39Nikuemao, Maaria yasiwa emisigo wuangu afuma okugia ku omugizi oguri mu ekialo ekia ewigiri ewia Yudeea, 40aingira ku omugizi ogwa Zakaria agia akeezia Elizabeethi. 41Olwa Elizabeethi yawurra amakeezio aga Maaria otino, omwana yawaaya mu enda yaae kandi Elizabeethi yaizuziwua no Omwoyo Omweru. 42Yagamba-gamba no omwoyo ogwa kungulu na awoola otino, “Iwue osereekwe agati eya awakazi wandi, kandi omwana owa ooza okuiwula oona asereekwe! 43Ni inze nsereekwe aeniki ngʼinwawu Omwami wange aazre okumbona. 44Aeniki olwa mpuriire-uwurra amakeezio gaao otino, omwana ori munda yange aduma-duumre ne ekisangaalo. 45Osereekwe iwue ku okuganya mbwe ewintu ewia Katonda akulagre wiiza okuikola!”
Olwembo olwa Maaria
46Nikuemao Maaria yawoola otino,
“Omwoyo gwange gutondowola Omwami Katonda.
47Mu owulamu wuange ndi ne ekisangaalo ku Katonda omununuzi wange,
48aeniki amiire okunyingirizia inze omukurumu waae ori ansi!
Okutanikra reero, amakula goona gaaza okunyeta omusereke,
49aeniki Katonda owa amaani goona amiire okunkorra ewintu ewikaate. Eriina riaae rieru!
50Alagana owusiza ku awantu awamuere owuti, okuemera ku ikula rino okugia ku ikula rindi.
51Amiire okukola ewinene na agoloole okukono kwae okwa amaani na ataanyia awaitumbula mu amaingirizio gaawu.
52Yategula awaami awa amambala nawuno awatoola ku entewe ziawu, na aginga kungulu awantu awaiisiizie ansi.
53Yaigusia awari ne enzala ne ewintu ewilootu, na awanyazi arumusia wagia amakono masa.
54Amiire okutunzia omukurumu waae Israeli, na alonda owusiza wuae,
55kiomo yawoorra waaguukwa wiifu, Abraamu alala na awiizukulu waae, mbwe arikola amiire goona.”
56Kutio, Maaria yamenya ne Elizabeethi ku emienzi egikaera isatu nikwo airana owaawu.
Okuiwulwa okwa Yowaana Omubatiisi
57Olwa enyinga ezia Elizabeethi ezia okuigawula ziatuuka, yaiwula omwana owekizia. 58Awamenyere nae ampi na awaganda waae waawurra kiomo Omwami amiire okumukorra owusiza owukaate, kandi woona waasangaala nae alala. 59Olwa owuire owua munaane wuatuuka waaza okuira omwana *enyangu, kandi waagalanga mbwe wamuluke swae Zakaria. 60Ni ngʼinwae yawairania otino, “Yaaya! Asugaane aetwe Yowaana!”
61Ni iwo waamuirania watino, “Awulao omuntu mu oluganda lwinyu ori ne endukwa eyo.”
62Nikuemao waawuuzia swae na amakono ni wamuagalako eriina eria akaagala omwana oyo alukwe. 63Yawasawa iwaale eria akujojako, kandi yajoja mbwe “Eriina riae ni Yowaana.” Kandi okwo kwagera awantu waluguula ino. 64Ao-ao, omunwa gwae gwaiguka kandi olurimi lwae lusiwuka, nawuno atanika okugamba-gamba na atondowola Katonda. 65Kandi, owuti wua-amba awantu woona awaawanga ni wamenyere nawo ampi. Awantu woona awa ekialo kiona ekia ewigiri ewia Yudeea waagamba-gambanga ku amangʼana gano. 66Omuntu-umuntu owawurra amangʼana gano yagaluguula na aiwuuzia otino, “Omwana ono aaza okuwa omuntu ofwana otie?” Aeniki, kuri kuwuene mbwe amaani aga Omwami Katonda gari nae.
Olwembo olwa Zakaria
67Swae Zakaria, na aizuziwua no Omwoyo Omweru, yawoola amangʼana agaamuemera ku Katonda otino:
68“Atondowolwe Omwami, Katonda owa Awaisraeli,
aeniki amiire okuuza okutoola awantu waae mu amakono aga omuzigu.
69Amiire okutureetra omununuzi ori na amaani
okuema mu enyumba eya omukurumu waae Daudi.
70Kiomo yawoola okuwitra ku *awagambi waae aweeru okuemera kale mbwe:
71Aritununula okuema ku awazigu wiifu
kandi okuema ku amakono aga awaturegere woona.
72Arilagana owusiza ku waaguukwa wiifu
kandi ari-ingirizia *endagano yaae enzeru eya yakola nawo.
73Aaza okutuusia endagano eya yaifuuwira soifu Abraamu.
74Aaza okutu-aa amaani aga okumukorra ni tuwula owuti,
na amiire okututoola mu amakono aga awazigu wiifu.
75Kandi tuuza okuwa aweeru kandi awigolovu emberi waae, amiire goona aga owulamu wuifu.
76Ni iwue, omwana wange, ooza okuetwa omugambi owa Katonda omunene;
aeniki orikangata emberi owa Omwami okuta emioyo egia awantu okuwa amankaga okumuingizia.
77Ooza oku-aa awantu waae amaganga aga okumanya owuinunuzi
owutuukrwa ni warekeerwe owuoni wuawu.
78Okuwitra ku owusiza owua olugonzi olwa Katonda iifu,
aaza okureeta owueru owua enyanga owua owuinunuzi wumurike,
ni wuema ku igulu,
79ku awamenyere mu ekierema
kandi awari mu ekiiruuzia ekia olumbe;
kandi okulagirizia amagulu giifu ku engira eya owuolu.”
80Omwana oyo yakoma kandi awa omukalangufu mu omuwiri ni mu omwoyo; kandi yamenya mu ekeewa nawuno kutuuka afuma awonekana owuyanga ku Awaisraeli.