एलीफाजम लोव़ पशो
1मिनु तेमान ङा एलीफाजमी अय्युब कली 2“मार, सुइमी गे नु लोव़ पचा माल्तु हना, इन थुं खाइक्पाइक्नीनी? तन्न सु मब्वाक्थु बाक्ने चाप्नीमी ङा? 3गे शुश मुर आन कली शेंताक्नी। गे मचाप्ब मुर आन कली बोल्यो सेल्तीनी। 4दाइल पा गोल्शो आन कली इन लोव़मी आन थुं बारपाइक्तीनी। मिनु गे खोइल मथेक्ब आन कली खोइल थेक्ब सेल्तीनी। 5तन्न मुल इन तार मोदेंशो श्येत जाक्मेनु, गे फाल्ने मचाप्ब दुम्शो बाक्नीनी। मेको श्येतमी इन कली थिवानु, इन थुं लुक्च लशो बाक्ब। 6मार इन परमप्रभु कली मान पा हिंतीकेम थमा मसुइक्नीनी? इन ठीक पतीकेमी आस मगेबा?
7मारेइ दोस मताइब मुर खतम दुम्शो बाक्नीमी? मेको मिम्तीन। गेना हना यो रिम्शो पाइब मुर साइक्चा पुंइसीनीमी? 8मरिम्शो पाइब नु ग्रांग्ये माग्ये पोक्ब आंम आन पशो ताइनीम। हितोपदेस २२:८ 9परमप्रभु आ मुइश्शोम मेकोपुकी खतम दुम्नीम। मिनु मेको आ गाइश्शो आ मीम नेक्चा पुंइसीनीम। 10गुप्स ग्रीमल, बोल्यो गुप्स ङरर ङरर पामेक्ल। मो हना यो ठिटा गुप्स आन ख्रुइ जिक्चा पुंइसाक्म। 11बोल्यो गुप्सपुकी सिखार ब्वचा मतथु नुप्नीम। मिनु छाउरी गुप्स आन चाइक्ब एर ओंथ ब्राइनीम।
12आइक्च लोव़ का आं नोफाम नेंता। मिनु गो शिप शिप पा लोव़ पशो नेंता। 13नाक्दो ङोमु ततीके बाक्ब। मुर ठेयब निन्द्रा पशो बाक्नीम। अय्युब ३३:१५; उत्पत्ती १५:१२ 14मोदुम्तीके गो शुश हिंशा ख्रिंख्रि पाता। मिनु मेकोम आं पोक्च कली शुश ख्रिंख्रि पपाइक्तु। 15फश का आं ङोंइती रे पा लत। मिनु आं रां ङा चां बोक्तेक्म। 16मेको दिक्शा बाक्त। तन्न मेको मार बाक्मे, गो मारेइ मतुइक्तु। आं ङोंइती मार कका राप्त। नोले सिक्सी दुम्शा, सेंदा का ग्रूत। 17मेको सेंदामी ‘मार बेक्शा लाइब मुर परमप्रभु आ ङोंइती नेल्लेम ठीक पाइब दुम्ने चाप्बा ङा? मुर आ कली सेल्ब क्येङा रिम्शो दुम्ने चाप्बा ङा?’ देंत। १राजा ८:४६; भजन संग्रह १४:३; हितोपदेस २०:९ 18परमप्रभुम आ गेय पाइब आन कली थमा मसुइक्ब। मिनु आ स्वर्ग ङा गेय पाइब आन कली दोस गेब। अय्युब १५:१५ 19मिनु खप के खिंम बाक्ब मुर मेको आन क्येङा शुश दोस मताइनीमी ङा? मुर आन जग फुरक बाक्ब। मेको तुम्ब खोदेंशो पा दिप्शा साइक्चा पुंइसीनीम। 20मेकोपुकी नाक्त काम साइक्चा पुंइसीनीम। सुइम मतुइक्थु बेक्नीम। 21मेको आन ताम्बु ङा डोरी ग्रुंइशो बाक्ब। मेकोपुकी जोक्ब तुइक्ब मदुम्थु बेक्नीमी” देंमाक्त।