1Hidin taki Zeruzalemor zomator ufre kub zulum-mosibot ḳaṛa oilo, erlagi ḳali sahabi oḳol bade ar hoḳoleu Ehudia ar Shomoria elaḳar zagae zagae sitri gela. 2Ḳoezone milia allaraia manush Stifanre dafon ḳorla ar tan lagi bout ahazari ḳorla. 3Oile Shoule zomatre binash ḳorar niote, goro goro hamaia imandar beṭain-beṭinre bondi ḳori ṭania sesṛaia zel ḳanat haranit lagla.

4Teu zera sairobae sitri gesil, tara hokkol zagat guri guri Injilor kush-ḳobri toblig korla. 5Ar Filif Shomoriar eḳ shohoro gia al-Mosir befare toblig korla. 6Manshe Filifor boean hunia ar tan keramoti ḳam oḳol dekia, dian dori eḳ dile tan nosiot hunla. 7Ḳaron boutor ges taki but oḳol zure zure sillaia saṛia gelo, ar bout ordong bemari ar lengṛa oḳol bala oila. 8Ita dekia hi shohoror manush kub kushi oila.

9Oile hikano Saimon namor eḳzon manshe bout din dori zadu-ṭunar ḳam ḳorto, Shomoriar manshore danda lagaia he nizore eḳzon kamil fir ḳoia dabi ḳorto. 10Ar huru-boṛo hoḳole tar ḳotar dam dito, manshe ḳoito, Allar ze kudrotre ḳas kudrot ḳoin, i beṭa oilo hou ḳas kudroti beṭa. 11Mansheo tar ḳota moto solto ḳaron bout din dori he tar zadu-ṭuna deḳaia tarare taijjub banaisil. 12Oile Filife zebla Allar bashshai ar Isa al-Mosir befare kush-ḳobri toblig korla, ar manshe tan toblige iman anla, i shomoe beṭain-beṭinte aia toubar gusol ḳorla. 13Hou Saimono iman ania toubar gusol ḳoria Filifor ḳore ḳore roila, bout keramoti ar boṛo boṛo kudroti ḳam hasil or dekia taijjub oigela.

14Zeruzalemor sahabi oḳole zebla hunla, Shomoriar manush oḳole Allar kalamor ufre iman anchoin, teu tara Fitor ar Hannanre erar gese faṭaila. 15Fitor ar Hannan aia tarar lagi dua ḳorla, zate tara Pak Ruhu fain. 16Ḳaron oḳono tarar ufre Pak Ruhu nazil oise na, tara ḳali Hozrot Isar name toubar gusol ḳorsoin. 17Fitor ar Hannane tarar ufre at raḳla, teu tara Pak Ruhu faila. 18Ar Saimone zebla deḳla, sahabi oḳolor at raḳar ḳarone Pak Ruhu miler, ou tain ṭeḳa ania erar gese dia ḳoila, 19“Amareo ou ḳemota deukka, zate ami ḳeuror ufre at raḳle he-o ou Pak Ruhu fae.” 20Fitore tare ḳoila, “Tumar rufa tumar logeu binash ouk, tumi mono ḳorso Allar dan ṭeḳadi ḳorid ḳora zae. 21Amrar i ḳamo tumar kunu bag nai, ḳaron Allar nozoro tumar dil shorol nae. 22Erlagi i nazaiz ḳam taki tumar dil firao. Ar Allar gese minot-ḳajji ḳoro, kiba tumar dilor i nazaiz kial tain maf ḳorilta faroin. 23Ami deḳram, tumar dil lifshae bora ar tumi gunar maze bondi oiroiso.” 24Teu Saimone ḳoila, “Afnara Allar gese amar lagi dua ḳoroukka, zate afnara zeta zeta ḳoisoin ita zanu amar ufre na ae.” 25Bade Fitor ar Hannane malikor kalam toblig koria Zeruzalemo firot zaoar foto, Shomoriar bout gaut kush-ḳobri toblig kori ḳori gela.

26Eḳdin Allar eḳ firistae Hozrot Filifre ḳoila, “Uṭo, douknor ze fot Zeruzalem taki Gaza ṭaunor bae gese hou fote roana deo.” I fot asil morubumit. 27Teu Filif uṭia hobae roana dila, zaite zaite foto Itiofia deshor Kandaki ranir eḳzon boṛo raz ḳazanchir loge tan mulaḳat oilo, hi ḳazanchi asla na-mord, ar ranir hokkol don-rotnor zimmadar. Allar ebadot-bondegi ḳorar lagi ein Zeruzalemo aisla. 28Bade baṛit zaoar bala foto tan nizor guṛar garit boia Ishaea nobir kitab tilaot ḳorat asla. 29Ou shomoe Pak Ruhe Filifre ḳoila, “Ou garir ḳandat zao, ar en loge log doro.” 30Teu Filife douṛia ou garir ḳandat gia hunla, ein Ishaea nobir kitab tilaot ḳorra; Filife tanre zikaila, “Afne zeta tilaot ḳorra itar mani buzra ni?” 31Hein ḳoila, “Ḳeu buzaia na dile ami ḳemne buzmu?” Ou tain Filifre garit uṭia tan ḳandat boar lagi minot ḳorla. 32Hein kitabor ze aeat tilaot ḳorat asla, ita oilo,

34Hou ḳazanchie Filifre ḳoila, “Ḳoukka sain, nobie ḳar befare ita ḳoisoin? Nizor befare na ar ḳeuror?” 35Filife zoban kulia pak kalamor ou aeat taki loia Isar kush-ḳobri forzonto tan gese toblig korla. 36-37Foto zaite zaite tara faniala eḳ zagat aia fosla, teu hi ḳazanchie ḳoila, “Ou deḳoukka ono fani ase, te ami toubar gusol ḳorte kunu bada ase ni?” 38Ḳoia tain guṛar gari uba ḳorar hukum dila, Filif ar hou na-mord ḳazanchi duiozon fanit lamla, ar Filife tanre toubar gusol ḳoraila. 39Tara zebla fani taki uṭia aila, ou shomoe Mabudor ruhe aḳtau Filifre aoṛe nilagi. Hi na-morde ar Filifre deḳla na, teu tain furti ḳori ḳori tan nizor fote gelagi. 40Oile Filifre Ashdud ṭauno deḳa millo; tain gaue gaue kush-ḳobri toblig kori ḳori heshe Ḳoisoria shohoro gela.