1O aolad oḳol, malikor morzi mafik tumrar ma-bafor ḳotamoto solio, ar ola solaṭau to usit. 2Allar kalamor foela hukum, ze hukumor loge furushkaror oada ase, iṭa oilo, “Tumar ma-bafore ijjot ḳorio. 3Teu tumar balai oibo, ar i duniat tumar haeati baṛibo.” 4Te tumra zera huruttar baf oiso, tumrao nizor aoladre sataio na, borong malikor talim ar shringkolar mazdi tarare manush banao.

5Tumra zera gulam, tumra al-Mosir zela baiddo, oula ḍor ar tazime dile-zane tumrar zogotor munib oḳolor baiddo roio. 6Ḳali manshore kushi ḳorar niote munibor samne baiddo roio na, borong al-Mosir gulam hishabe dile-zane Allar morzi mafik solrae ḳoria tumrar munibor baiddo roio. 7Tumra ikan mono ḳorio na ze, tumra manshor ḳezmot ḳorrae, borong asmani malikor ḳezmot ḳorrae mono ḳoria, zogotor munibor ḳezmoto kiali o. 8Mono rakio, malikor ges taki forteḳ manshe zarzir nek kamor furushkar faibo, he gulam ouk ba azad ouk.

9Tumra zera munib, tumrao tumrar gulam oḳolor loge oula bala bebohar ḳoro. Tarare ḍor deḳani bad deo, ḳaron tumra to zano, tara ba tumra hoḳoloru malik eḳzon, tain behesto asoin; tan nozoro hoḳolu shoman.

10Hesh-mesh ḳoiram, tumra asmani malikor loge milia roia tan kudroti bole bolala o. 11Zuddor lagi Allar deoa hoḳol nomunar atiar lagao, teu Iblisor hoḳol sol-soturir birudde mozbut oia ubaitae farbae. 12Amrar ou zuddo to kunu manshor loge nae, ita oilo andair zogotor hoḳol raza ar tar ḳemota-ala oḳolor birudde, andair zogotor shoktiala bod ruh oḳolor birudde, ar asmanor Iblis-shoetan dolor birudde. 13Te ou zuddor lagi tumra Allar deoa hoḳol nomunar atiar findilao, zate Iblise zebla hamla ḳorbo ou shomoe mozbut oia ubaitae faro, ar hesh-mesh tir roitae faro. 14Erlagi Allai hokikotir belṭ ḳomoro bando, ar buk basanir lagi forezgarir amol dia buk guria raḳo, 15sifai oḳolor laḳan duio fao-o zuta lagao, zate shantir kush-ḳobri tobligor lagi zuit taḳtae faro. 16Ar sifai oḳole nizore basanir lagi ze ḍala bebohar ḳore, oula hoḳol shomoe tumra imanor ḍala ato lo, ou ḍala dia Iblisor hoḳol zalail tir nibaitae farbae. 17Matare basanir lagi Allar deoa nazat sifair kefor laḳan findilao. Ar Pak Ruhur toluar mani, Allar kalamre mozbut ḳori doro.

18Pak ruhur bole dile-zane hor-hamesha munazat ḳoro. Erlagi hozag roia hoḳol pak bonda oḳolor lagi shob shomoe munazat ḳorat roio. 19Amar lagio dua ḳorio, ami ḳota matar bala zanu Allae amar mukor buli zugai dein, zate toblig korar shomoe ami shaosh ḳaṭaia kush-ḳobrir ashol batuni bed manshore buzaitam fari. 20Ou kush-ḳobri tobligor lagi luar cheindi banda haloteo ami al-Mosir naib hishabe ḳam ḳorram. Te zelor maze roia zelaḳan shaosh ḳaṭaia toblig kora zorur, dua ḳorio, ami zate ola ḳortam fari.

21Amar hal-hokikot kilaḳan ar amar din-ḳal kila zar, ita amar maear dust Tukik bair ges taki hunbae. Ein amrar malikor hok-halal ḳezmotḳari. 22Ami tanre tumrar gese faṭailam, tumra tan muk taki amrar ḳobora-ḳobor hunbae, tain gia tumrare utshaho diba.

23Amrar gaibi baf Alla Pake ar Hozrot Isa al-Mosie, mumin bai oḳolre shanti ar imani maea-mohobbote raḳoukka. 24Amrar Hozrot Isa al-Mosir lagi zarar dilo ḳaṭi mohobbot ase, era hoḳolor ufre Allar rohomot nazil ouk. Amin.