1Bade Mabude Musare ḳoila, “Tumi Feraunor ḳasat gia tare ḳo, Mabud, zein Ibrani oḳolor Alla, tain nize ḳoira, amar ebadot ḳorar lagi amar bonda oḳolre saṛi deo. 2Tarare saṛte razi na oia oḳono bada dile, 3hunia raḳo, bondor maze tumar foshuintor ufre, guṛaintor, gadaintor, uṭ, ar goru-sagol, meṛaintor ufreo ami Mabude at dimu, betaea bemaror moṛki saṛimu. 4Oile ami Mabude Mishoror ar Boni Israilor foshur maze tofat ḳormu; Boni Israilor kunu foshu morta nae.”

5Ar Mabude shomoeo ṭik koria dilaila, samnor ḳail tain desho i ḳam ḳorba. 6Hasau bador din Mabude oulau ḳorla, teu Mishoror hokkol foshu morigela, oile Boni Israilor egu foshuo morla na. 7Feraune manushdi ḳobor loia deḳlo, Boni Israilor egu foshuo morsoin na; ta-o tar dil fashan roilo, he manshore saṛlo na.

8Ou Mabude Musa ar Harunre ḳoila, “Tumra duiozonor muiṭ boria undalor sali ano, ania Musae ou salire Feraunor samne ufredi siṭai deo. 9Deḳbaene, ita hara Mishor deshor maze fatla duil oia hoḳol zagar manush ar foshuintor gotoro fuṭ oia ga oibo.” 10Teu tara undalor sali ania Feraunor samne ubaia, Musae ufredi siṭai dila, ete manshor ar foshuintor gotoro ga-ala fuṭ oilo. 11Ar ou gar lagi zadugir oḳole Musar samne ubaita farla na, hoḳol Mishori ar zadugir oḳolor gotoro-o fuṭ oilo. 12Oile Mabude Feraunor dil fashan ḳorilla. He erar mate ḳan dilo na, zela Mabude age ḳoisla.

13Bade Mabude Musare ḳoila, “Tumi biane uṭia Feraunor samne ubaia oula ḳoio, Mabud, zein Ibrani oḳolor Alla, tain nize ḳoira, amar ebadot ḳorar lagi amar bonda oḳolre saṛi deo. 14Naile i fira ami tumar, tumar uzir-nazir ar tumar proza oḳolor maze amar hokkol zator gozob saṛimu. Teu tumi buzbae, hara duniait amar homani ḳeu nai. 15Er ageu ami amar at baṛaia betaea moṛki dia tumare ar tumar proza oḳolre martam farlam one; tumi duniai taki binash oigelae one. 16Asole erlagiu ami tumare duniait otodin basaisi, zate tumare amar lila-ḳela deḳai, ar hara duniait amar nam zair oe. 17Tumi oḳono amar bonda oḳolre saṛrae na, tumar beṭagiri deḳairae, 18te dekio, ḳail i shomoye ami ou laḳan hil-tufan ar meg dimu, zeta Mishoror zonom taki aiz forzonto kunudin oise na. 19Erlagi bondor maze tumar foshuin ar zotota ase, itare ania goro harao; manush ba foshuin zeta goro hamaita nae, itar ufre hil foṛia hokkolṭi morba.” 20Teu Feraunor uzir-naziror maze zera Mabudor zobane ḍoraila, tara zoldi ḳori nizor gulam ar foshuintore goror bitre anaila; 21Oile Mabudor zobanre zetae dam dilo na, tarar gulam ar foshuintore bondor maze toilo.

22Bade Mabude Musare ḳoila, “Tumi asmanor bae nizor at baṛao, teu Mishoror hokkol zagat hil-tufan oibo, Mishoror manush, foshu ar ketor hoḳol gas-gasalir ufre ita foṛbo.” 23Ou Musae tan ator laṭi ufredi tulla, Mabude Mishor deshor ufre megor ḍak-zilḳanir loge hil-tufan deoaila; ar asmani ṭaṭa zomino foṛlo. 24Ou hilor loge megor zilkani ar ṭaṭao asil. I laḳan gozobi hil-tufan Mishor deshor zonom taki kunudino oise na. 25Hara Mishor deshor bondor mazor hokkol manush ar foshuintor ufreo kub zure zure hil foṛlo, ar ketor hoḳol foshol nosṭo oigelo ar hoḳol gas-gasalio bangi gelo. 26Ḳali Boni Israilor boshot ḳana Gushon elaḳat hil-tufan oilo na.

27Bade Feraune manush faṭaia Musa ar Harunre anaia ḳoilo, “I fira ami oforad ḳorsi. Mabud to pak-fobitro, oile ami ar amar proza oḳol oforadi. 28Te gozobi megor ḍaḳ ar hil-tufan to bout oise, ar zartam fariar na. Erlagi ami oḳon tumrare saṛi dimu, ar aṭḳaitam nae. Tumra amar lagi Mabudor gese minot ḳoro.”

29Musae tare ḳoila, “Ami ṭaunor baire giau Mabudor gese at tulmu, teu megor ḍaḳ, hil-tufan bondo oizibo, zate afne buzta faroin i duniai to Mabudor. 30Oile ami to zani, afne ba afnar uzir-nazir oḳole oḳono Alla Mabudre ḍoraira na.”

31I shomoe ketor hoḳol nalia gas ar barli nosṭo oigelo, ḳaron nalia gasor ful ar barlir soṛa baroi gesil. 32Oile kunu zator gomor gas boṛo na oae itar ḳeti oilo na.

33Teu Musae Feraunor samne taki ṭaunor bare gia Mabudor gese at tulla, loge loge megor ḍaḳ, hil-tufan bondo oilo, megor zoṛio bondo oigelo. 34Oile Feraun ar tar uzir-nazir oḳole meg, megor ḍaḳ ar hil foṛa bondo oigese dekia tarar dil fashan ḳorilla. Feraune hirbar guna ḳorlo. 35Tar dil fashan oizaoae, he Boni Israilre saṛlo na, Mabude age zela Musare ḳoisla.