1Bade ami deḳlam, hou meṛar baichchae zebla shato sil-sappoṛor maz taki foela sil bangira, ou shomoe hou sairo zandaror mazor eḳzone ṭaṭa foṛar aoazor laḳan zure ḳoila, “Ao.” 2Teu ami saia deḳlam, dola eḳṭa guṛa, er ufre zein soar oisoin tan ato tir-donuḳ ase. Tan matat taz lagail oilo, tain zoe ḳorar lagi zoe ḳori ḳori roana oila.

3Ar tain zebla dusra sil bangila, ou shomoe ami dusra zandaror aoaz hunlam, ein ḳoila, “Ao.” 4Teu lal churuk aroḳṭa guṛa baroilo, ar er ufre zein soar oisoin, enre ou ḳemota deoa oilo, zate tain dunia taki hoḳol shanti ḳaṛia neingi, manshe eḳe-oinnore kun ḳoroin, enre boṛo eḳan toluaro deoa oilo.

5Bade meṛar baichchae zebla tin nombor sil bangila, ou shomoe ami tin nombor zandaror aoaz hunlam, tain ḳoila, “Ao.” Teu ami deḳlam, eḳṭa ḳala guṛa. Er ufre zein soar oisoin, tan ato eḳan falla ase. 6Ar ami hunlam, hou sairzon zandaror mazḳan taki ḳeu zanu ḳoira, “Eḳ dinare ḳali eḳ sher gom ba eḳ dinare tin sher barli mile. Oile tumi zoetun ar angur gasor ḳeti ḳorio na.”

7Ou meṛar baichchae zebla sair nombor sil bangila, ou shomoe ami hunlam, sair nombor zandare ḳoila, “Ao.” 8Teu ami saia deḳlam, sali rongor eḳ guṛa, ou guṛar zein soar, en nam oilo mout ar tan ḳore ḳore ḳoebore aṭer. Erare duniar sair baṭor mazor eḳ baṭor ufre ḳemota deoa oilo, zate tara toluar dia, nidan dia, gozobi mout ar zongli zanuar dia manshor zan nein.

9Bade tain zebla fas nombor sil bangila, ou shomoe ami deḳlam, kurbani ḳanar tole ou laḳan manshor ruh oḳol ase, zerare Allar kalamor lagi ar Hozrot Isar fokke zobanbondi deoar lagi ḳatol ḳora oise. 10Era zure zure ḳoila, “O fak-fobitro hokkani Moula, amrar ḳatolor bisar ḳorte ar bodla loite, tumi duniar manshore ar ḳotodin shomoe ditae?” 11Teu era hoḳolre dola lebas dan ḳora oilo, ar ḳoa oilo, tarar logor ḳezmotgar ar tarar zoto baiainre tarar nomunae ḳatol ḳora oibo, erar shongḳa fura na oa forzonto, aro kisu din bar saite oibo.

12Bade ami deḳlam, meṛar baichchae soe nombor sil bangila, ou shomoe kub boṛo boisal oilo. Shuruzor rong oigelo ḳala siai ar bora sandor rong oilo lour laḳan lal. 13Tufan aile zela ḍumur gas taki ḳasa folo tufane falai dey, ṭik oula asmanor tera oḳol kulia zominor ufre foṛigelo. 14Asta asman dola oia ḳagozor fuṭla laḳan bonia gaib oigelo. Faṛ-forbot ar dif oḳolo zarzir zaga taki horigelo. 15Ar duniar hoḳol raza-bashshain, namḳora zon, sifair fordan, zomidar, foeluan, gulam ba azad forteḳ zonu faṛor gate gate, fattoror aoṛe lukailo. 16Tara ou faṛ ar fattor oḳolre ḳoilo, “Amrar ufre aia foṛo, zein toḳto boat asoin tan soukor samon taki ar meṛar baichchar gozob taki amrare lukao. 17Tarar gozobi hou kiamotor din to aichche, oḳon ar ṭikia taḳar shaiddo ḳar ase?”