1Erlagi O bai oḳol, Allae tumrare ola meherbani ḳorae, ami tumrare ḳas minoti ḳoriar, tumra zarzir shorilre Allar ato shofi deo, ila zinda fobitro kurbani Allar dorbaro ḳobul oe, oḳṭau oibo tumrar sohi-shuddo ebadot. 2Ar ou ḳaraf zomanar talo foṛio na, borong nizor dilor bab bodlaia noea manush o. Teu tumra Allar morzi buzbae. Tan morzi to bala ar furafur nikut, ola ḳorle tain kushi oin.

3Talim dibar lagi Allae amare ze ḳas niamot disoin, ou niamotor bole ami tumra forteḳ zonre ḳoiram, nizore zotoḳan boṛo mono ḳora usit, er saite beshi mono ḳorio na. Allae zare zotoḳan imani bol disoin, he zanu nizore er taki beshi kunta mono na ḳore. 4Kial rakio, amra hoḳolor shorilo bout ongo ase, hoḳol ongoe to eḳ laḳan ḳam ḳore na. 5Ṭik ou laḳan, mumin hishabe amra bout zon oileo, al-Mosir loge shorik oia ḳali eḳ shoril oisi. Eḳoi shorilor ongo gotike amrar eḳe-oinne mil ase. 6Allar rohomote amra nanan zone nanan laḳan niamot faisi, ou niamot zudi gaibi ohi zananir befare oe, te amrar iman mafik oli-auliar laḳan ohi ḳoite taki. 7Ḳeu zudi ḳezmot ḳorar niamot fae, te ḳezmot ḳorouk. Ar talim dibar niamot ze faise, he talim deuk. 8Utshaho dibar niamot ze faise, he manshore utshaho deuk. Dan ḳorar niamot ze faise, he ḳalis niote dan ḳorouk. Murobbiana ḳorar niamot ze faise, he dile-zane hoḳolta salauk. Manshore shaijjo ḳorar niamot ze faise, he kushi mone shaijjo ḳorouk.

9Maea-mohobbotor maze kunu ḳad mishaio na. Ḳarafire ginnao, balair ashik o. 10Eḳe-oinnore afon bair laḳan dile-zane maea ḳoro, niz taki oinnore beshi dam deo. 11Ḳezmot ḳamo durbol oio na, ruhre gorom raḳo, malikor gulami ḳorat ro. 12Samnor furushkaror ashae hamesha kushi-bashi ḳoro, duk-mosiboto sobor ḳoro, hor-hamesha munazat ḳorat ro. 13Allar pak bonda oḳolor obabo shaijjo ḳoro. Memandari ḳorte kiali o.

14Tumrar ufre zera zulum ḳore, tarar lagi nek dua ḳorio, boddua dio na. 15Zera kushi-bashi ḳorer, tarar loge kushi ḳoro, zera ḳander tarar loge oia ḳando. 16Tumra eḳe-oinne bai bai oia ro. Boṛoluki bab na deḳaia, shadaron manshor loge mili-mishi solo. Nizor fonḍiti deḳaio na. 17Ḳarafir bodla hishabe ḳeuror ḳarafi ḳorio na, hoḳol manshe zetare bala mono ḳoroin, tumra sinta-babna ḳoria otau ḳoro. 18Tumrar torof taki zotoḳan shombob hoḳol manshor loge shantie boshot ḳoro.

19O maear bai oḳol, tumra ḳeuror bodla loio na, ita Allar ato saṛi deo, bodla deoa tan ḳam. Allar kalamo ase, “Naformanir shaza dibar eḳtiar ḳali amaru ase, zar zela faona ami tare ola bodla dimu, ikan ami Mabude ḳoiram.” 20Borong kitabe ḳoe, “Tumar dushmonor feṭo buk lagle, tare ḳani deo. Fiase dorle tare fani deo. Ola ḳorle to tumi tar matar ufre zalail angrar ṭukri toilae.”

21Ḳarafir gese kunumonteu ario na, borong balare dia ḳarafire arao.