1Janjiño o entañe honjoneko
ho bekom-pandalàñe ama’ areoo,
ry anjomba’ Israele: 2Nihotrake ty somondrara’ Israele;
tsy hahafitroatse ka:
mifitak’ an-tane’e eo avao,
tsy eo ty mahaongak’ aze. 3Fa hoe ty nafè’ Iehovà, Talè:
Ty rova nampionjoñe ty arivo
ro hengañe zato;
naho ty nampionjoñe zato
ro sisàñe folo,
amy anjomba’ Israeley. 4F’ie hoe ty nafè’ Iehovà
amy anjomba’ Israeley:
Paiavo raho, soa t’ie ho veloñe; 5Fa ko mipay i Betele,
naho ko mb’e Gilgale mb’eo,
vaho ko mitsake mb’e Beersèba
amy te hasese mb’an-drohy
añe t’i Gilgale,
naho ho tanan-taolo t’i Betele. 6Tsoeho t’Iehovà, soa te ho veloñe;
tsy mone hisolebora’e hoe afo,
ry anjomba’ Iosefe,
hamorototo i Betele,
ie tsy ama’e ty hahafikipek’aze. 7O ry mamotetse ty zaka ho vahontsoy,
vaho mametsake ty havantañañe an-tane, 8Miandrà mb’amy Namboatse
i vasiam-pito rey
naho i Telo-miriritseiy;
mb’amy mamalike ty fimoromoroñan-kavilasy ho maraiñey,
mb’amy mampaièñe ty andro ho haleñey;
mb’amy mpikanjy o ranon-driakeo
hañiliña’e an-tarehe’ ty tane toiy:
Iehovà ty tahina’e. 9Ampibiloe’e amo maozatseo
ty fandrotsahañe,
vaho miambotrak’ amy rova
fatratsey ty fandrebahañe. 10Heje’ iereo ty mpañendak’ an-dalambey eo,
vaho falai’ iareo
ty misaontsy an-kavañonañe. 11Aa kanao lialià’ areo o rarakeo, naho
angala’ areo fehen-ampemba,
naho andranjia’ areo traño
am-bato vinaky,
toe tsy himoneña’areo;
nambolèa’ areo tanem-bahe soa,
f’ie tsy hinoman-divay.
12Toe apotako te maro o fandilara’ areoo naho jabajaba o ota-fali’ areo;
helofa’ areo o vantañeoo,
naho mangala-vokàñe,
vaho ampiotahe’ areo an-dalambey eo
o rarakeo.
13Aa le hianjiñe avao o mahilalao
amy andro zay amy te
ho hekoheko i sa zay.
14Paiao ty soa, fa tsy ty raty,
soa te ho veloñe;
vaho hañimba anahareo
t’Iehovà Andrianañahare’ i màroy,
ty amy saontsi’ areoy. 15Hejeo ty raty naho kokò ty soa,
vaho añorizo zaka to an-dalambey eo;
hera hanolots’arofo
amo sehanga’ Iosefeo
t’Iehovà Andrianañahare.
16Aa le hoe t’Iehovà, Talè
Andrianañahare’ i màroy:
Fangololoihañe ty ho amo lalan-drovao,
vaho ho koiheñe an-damoke ey
ty hoe, Hankàñe! hankàñe!
le hikoke o mpihareo, handala,
naho o mahay mikoiakeo, hangoihoy.
17Le firovetañe ty ho amo
tanem-bahe iabio,
amy te hiranga añivo’o ao raho,
hoe t’Iehovà.
18Hankàñe ama’ areo misalala
ty andro’ Iehovà!
Ho inoñ’ ama’ areo ty andro’ Iehovà?
Ho fimoromoroñañe fa tsy hazavàñe.
19Manahake t’indaty
mibotatsak’ ami’ty liona
te mone mizò amboa romotse;
ndra mizilik’ añ’anjomba ao
naho miato an-drindriñe eo ty fità’e
vaho tsipohe’ ty fandrefeala.
20Tsy haieñe hao ty andro’ Iehovà
fa tsy hazavàñe?
Toe ho fimoromoroñañe fa
tsy ho aman-kazavàñe ndra piti’e.
21Hejeko, toe mampangorý ahy
o sabadida’ areo miavakeo,
tsy noko o fivorim-pamantaña’ areoo.
22Aa ndra t’ie mañenga soron-koroañe
rekets’ enga-mahakama amako,
tsy ho noko;
vaho tsy ho haoñeko
o engam-pilongoa’ areoo
naho o vinondra’ areoo.
23Asitaho amako ty fikoraha’ o saboo;
le tsy ho tsanoñeko ty feo fititiha’ areo.
24Te mone ampikararaho hoe rano ty hatò,
naho hoe torahañe tsy-mai-drano
ty havantañañe.
25Aa vaho nisoroñe naho nañenga-mahakama amako an-dratraratra añe hao nahareo tamy efa-polo taoñe zay, ry Anjomba’ Israele? 26Toe nibabè’ areo ty kibohom-panjàka’ areo, naho o samposampo’ areoo, i vasian-drahare nitsenè’ areoy. 27Aa le haseseko an-drohy mb’ankalo’ i Damesèk’ añe, hoe t’Iehovà. I Andrianañahare’ i màroy ty tahina’ey.