1Ka capa, na pyi ham qii khoeng nawh khawlawng thlang khanawh na kut nak thlak awhtaw,

2Nak awiawh namah awk nawh, nak awi kqawn ing namah ni pin nawh ni.

3Ka capa, na pyi a kutawh taang vit hynyng ti nang simqu awhtaw na loetnaak hamna vemyihna sai kawp ti, na pyi venna cet, nak kawlung ce ak kaina phaih nawh qeennaak thoeh kawp ti.

4Koeh ip, namik koeh kuu sak qoe kawp ti.

5Sakzyym a kut awhkawng sakkhi a cen amyih ingkaw phak zym a kut awhkawng pha ang ding valh amyihna namah ce hul qu kawp ti.

6Nang, thakdam pa, liing avena cet nawh, a khawsak ce toek nawh na cyih ta lah;

7Anih ing boei, ak sawikung, khawkkhan kung am ta na.

8Khawhqai awh a buh cun nawh cangmaa awh a ai sui hy.

9Aw, thakdam pa, iqyt dy nu na ih hly? Ityk awh nu na ihnaak awhkawng na thawh hly?

10 *Na ngaih awhtaw ip, ngam, kut boem nawh zaih,

11Na ih hlanawh khawdengnaak ing khit cet amyihna ni pha kawm saw, awk voet ai vainaak ing ak tlung amyihna thoeng law kaw.

12Thlakche ingkaw khawboeche thlang taw am khaaawh awioelhnaak ing ni a plam thaam hy.

13Amik ing mikhqih, a khaw ing awi kqawn a kut dawn ing pho sak hy.

14Ak kawlung am dyng nawh, seetnaak sai ham poeknaak ta poepa nawh, hqeehnaak sai poepa hy.

15Cedawngawh ak poek kaana kyinaak ing thoeng law nawh bawtbetawh seetnaak ing pha kawm saw qoeinaak a huh voel kaana.

16Khawsa ing a sawhnaak khquk awm nawh am tuih soeih khqeet awm hy.

17Ak oe qu mikhai, thailatnaak ing ak be lai, thlakdyng a hqingnak ak lo kut,

18amak leek them ak poek kawlung, thawlh sainaak benna hqingtawn ing ak dawng khaw,

19a qaai kqawn nawh thailatnaak ing ak bee, ciingnapaca lakawh hqehnaak ak sai.

20Ka capa, na pa awipek ve ngai nawh, na nu cawngpyinaak ce koeh mang taak.

21Na kawlungawh khoemnawh, na hawngawh aawi poe lah.

22Na cehnaak hoeiawh ni hqui nawh, na ih hui awhawm ni doen kawm saw, na thawh lawawh ni tym pau pyi kaw.

23Awipek taw maihchoei na awm nawh, cawngpyinaak taw vaangnak ni, toelthamnaak taw hqingnaak lampyi ni.

24Nu amak leek ingkaw awih tui ing thlang ak zoek thlangthai nu ang laak awhkawng a nik doen hamna;

25Nak kawlung ing a dawnaak koeh nai nawh, a mikkhu ing koeh ni zoek seh nyng.

26Pum ak zawi nu ak caming pa ing phaipi cunoet doeng ham nawh, samphaih nu ing hqinglung phutlo ce khoem thai hy.

27Thlang ing a hii a uih kaana mai ce pawm hly thai nawh nu?

28Thlang ing a khaw a uih kaana maihling leeh hly thai nawh nu?

29A pyi a zuu venna cet nawh ak hei taw a uu pynoet awm kut thlak kaana am voei ti kaw.

30Ak phoencawih dipnaak ham ak quu thlang awm am loet ti kaw;

31A mi huh awhtaw a pyh khqihna sah seitaw a im awhkaw a them a long boeih ing sah kaw.

32Kawlung ak talh nu taw samphaih, a hqinglu a seetnaak ham bi ak sai ni.

33Tlohnat ingkaw chah phyi kawm saw ming seetnaak ce ham kaw.

34Yytnaak kawlung taw pa khqi kawsonaak na awm nawh phu sui nynawh am loet ti kaw.

35A mikhuh awh tlansum pynoet awm am khyn kawm saw them khawzah pek ingawm kaw am zeel sak kaw.