Kayëte mba Sak
Wade yehëhna hnë iŋi kayëte
Ale herëk iŋi kayëte ŋa tufëhnana ɓare namu cery sali ŋa ntehnëk Sak, aheryu Yesu, herëhnëkëhni vële hwëtahnëk sampëk ɗuniỹa li. Akerëk mpëd yëbëlan bëhn wafëhw imbëɗ gë bëhn wafëhw imbëɗ gë ryaw̃ gë wahi (50 gë 62) ga ndëcëk hnagi Yesu ỹa. Hnë kayëte hna, wanira wayaɓah njëɗahnëɗ gante nkehahnëɗëni vële hwëtahnëk haryënkw W̃ënu ŋa gë vëỹëntaw̃ va. Yëb le hnëfak ye iỹi: «Ahnë ntehnëɗ mpëd: “Wëjë, kwëhnaru ikwëtahn, ami viỹë vifërën liɗëfu. Tufërye bi hak koɗu ahwëhna ikwëtahn hara diɗila fërën! Ge ami ye, gë ile liɗëfu ỹa tufëɗëmi ikwëtahn mën iŋa.”»
Sak wëdahëse hnë uwám vë fac-w̃o-fac mbalëtahnëɗ soŋe karaŋahnëhni karaŋ nte wok dakëna nkwëry: Sisikulu, pahnac, hwëɗëh.
Wëlin wanës wakwëhn nafa hn'iŋi kayëte: kwëtahn, vëỹënta, sariya, iña ɗuniỹa, hakili, hwëɗëh, wameh, vëvetak/vëhaỹëhnah, ryëw̃.
Wëlin gante nke kayëte ka:
Simpaỹi (1.1)
Ƴaw̃ënaryin hnë haỹëhnah g'uvetak (1.2-11)
Ile w̃atik hnë W̃ën gë ile wok matina hn'umë (1.12–3.18)
Iña ɗuniỹa, iñew̃ W̃ën (4.1-17)
Unira vëvetak (5.1-6)
Ɗuñëna gë iƴëfa (5.7-20)
Simpaỹi
1Vëỹënta mën, nkaỹëɗëmu ɗus. Ami Sak, aryokuŋëhn W̃ën do gë Ahwëhn a Yesu Këris, herëhnëryiɗëhu, w̃uhnë, ɓulunda W̃ën le sampëk hnë ɗuniỹa ỹi fop.
Ƴaw̃ënaryin
2Ntehnëɗëmu, ge nkeɗëhu sifa uryëñah w̃a fop, pëlaryin had uhnatah sankaf; 3njëtërun, ge ikwëtahn hun ŋa njaw̃ënaɗ hn'uryëñah le yeɗëhu hna nkwënëɗëhu kamëna ŋa. 4Age kamëna hun ŋa padëk nkeɗun vësatah ɗus, vëhwëhn w̃eh këm, do ñoñ gojëɗiluhna.
5Age ahnë hnë w̃uhnë nkojëka hakili ỹa, tëfëka tëƴa W̃ënu ŋa, do umë njëɗaɗëha, kaɓi njëɗaɗëhëhni vahnë va fop gë uhwëhna nëf hara nahalehnëna. 6Ɓare ahnë arac tëfëka tëƴ g'ikwëtahn W̃ën hara gwajëlehnana, kaɓi ale wajëlehnak a gë iɓonkëlo w̃ënka wov nte matëndëk sël do peñëlehnëɗ gante-wo-gante mëntëlëni. 7Sifa ahnë arac antë mbëra naha nuỹaɗ iñë Ahwëhn hna. 8Ale wajëlehnaɗ ye do kahnëndaɗina kwëlëkwël hn'ile ntiɗ hna fop.
Haỹëhnah g'uvetak
9Araɓi aỹënta mën ale haỹëhnëk a nata kaɓi matëndik haryënkw W̃ën hna, 10do avetak a nata ge W̃ënu ŋa ñoƴëka. Ndëcëɗ gante caw̃ëɗ wapëtel ki. 11Ulav w̃a pëhniɗ, yakah lëw̃u w̃a hankënëɗ; ufëtel w̃a njoɗ do idël iŋa goɗina nkwam. Koyëna nkeɗ soŋe avetak a fëna, nambëɗe fagant ɗoku lëw̃u hna.
Ile w̃atik hnë W̃ën gë ile wok matina hn'umë
12Mbetak ale hamënak hn'uryëñah hna, kaɓi ge mëkak, nuỹaɗ uwám usër ule ntehnëk W̃ën njëɗaɗëhëhni vële ỹahnëka va.
13Ge ahnë njëkëhnahnik, antë ntehn W̃ënu ŋa yëkëhnahnëɗëha, kaɓi W̃ënu ŋa koɗena njëkëhnahni menehni, do umë dënk ƴëkëhnahnëɗina ahnë. 14Ale-wo-le njëkëhnahnik ge mbënakëfu do pëlaỹinëkëfu g'iña fu ŋa dënk. 15Tac iña ŋa nkeɗ had iɗonk asëval, do w̃eh nagëɗ; do ge w̃eh w̃a naỹëk hafo pad, icëm nagëɗ.
16Vëỹënta mën, vële ỹahnëɓu ɗus, antë mpaỹëmpaỹawu: 17fop uyëɗ yivah w̃a, fop ɓuña wamah ỹa g'ambin matik; hnë W̃ënu le ye Rëm Wahumpen hna matik. Umë gwëcëtaɗina had icën nte pakëtëlehnëɗ ulav. 18W̃ënu ŋa ntik naginëfu g'ahaw̃ary gë wanës toña wadëwu ŋa, nkehahnin vëryënkwëryënkw hnë ile ntik hna fop.
Idi wanës W̃ën
19Vëỹënta mën, vële ỹahnëɓu ɗus, tëfëku ayëtu iỹin: ale-wo-le tëfëka njanc nëpa ŋa, ɓare antë njanc nës iŋa do dav iŋa; 20kaɓi ntavah ahnë nagëɗina le satëk haryënkw W̃ën hna. 21Soŋe më ye, tavëryin fop ile ronkënëɗ ỹa do gë fop le w̃enëɗëha ahnë ỹa. Kacaryin g'uhnatah wanës wante taw̃ëk W̃ën hnë w̃uhnë ŋa, kaɓi kwëhnak fanka soŋe pehët vintaw̃ary hun va.
22Antë nëŋu nëpaŋi fo, ɓare diryin le nësëɗ ỹa, ge gena umë w̃uhnë dënk rokaɗ vankaf hun va. 23Ale hnëpaɗ wanës ŋa do diɗil ile nkwëryëɗ ỹa, nke had ale yëkaɗ hnë njëka: 24ge puhnak ƴëka ŋa, njiɗ do ndënkwëɗ taŋ gante nke ka. 25Ɓare ale fëcëtaɗ gë yasery sariya satah le yëɗaɗëhëfu ipeh ŋa, natëlahna soŋe nëpa tac ndënkw taŋ, ɓare ntiɗ le nësëɗ ỹa. Awa, ahnë arac nëfaɗëha hnë ile ntiɗ hna fop.
26Age ahnë ntiyahnëka W̃ënu ŋa nëŋëka gë umë do mëkëna pëla w̃ës lëw̃u ỹa, tokak nkaf ntëw̃u ŋa dënk: ile liỹahnëka kwëhnana nafa. 27Wëlin ile hnëŋëɗëha ɗus W̃ënu ŋa, Rëm ỹa: ipaɓ vukëryëm gë vësëval vële cëmaryëk vësan hnë uyiw̃ëhnah lëw̃ hni hna do kehayi viỹë vivë ɗuniỹa vi antë tonkënëfu.