Boru au Jerusalem
1Wate nelara ḡelaui Judeaei i ḡairai au Antiok ma ekalesia i viararamani i pa, “Mepa da eḡa inibori ona vaia Moses ana tarawatu e ririwei nanare, God taumi eḡa ina vilawanimi.” 2Ma karuwaḡawaḡa ḡaeḡaena i bauni Paul ma Barnabas maiteni. Ma taui Paul, Barnabas ma rava ḡelaui i vinei da i ḡae au Jerusalem da Apasol ma babada ita inanai wei babanina aubaina. 3Ma i paritawanei au Jerusalem, Ma ai au vaḡai ekalesia au Phonisia ma Samaria provins i pariverei menanare Jentail i mae-tavirei God awarina. Ma taui i vinuaiaii kaua maraina wei i nonori. 4Maranai i ḡeta au Jerusalem, ekalesia ma Apasol i nei da i nebelei. Taui i pariverei menanare kaua anatapui God ana aguei i tupua. 5Wate ekalesia ḡelaui mai Pharisi, i vomairi ma i babani guratana i pa, “Jentail anina da inibori ina vaia ma ona egari da Moses ana tarawatu ina voteletelei.”
6Apasol ma babada i viboru da wei babanina i okei. 7 Ma i vitarapiri guratana ma Peter i vomairi ma taui i riwei i pa, “Au rava! O aramanei da au orata God i vineu da Riwana Aiaina ana jimei Jentail awarii da taui ina nonori ma ina vitumaḡana. 8 God rava anatapui ai nota e araramanei, ma Jentail Aruana Vivivireina i verei me tauta nanare. Wei matairana i viatataieta da God i vianina. 9Tauna Jentail ma tauta e vaivainita da tagogina, ma ata vitumaḡanei orata i viaiaiani. 10Marina aiwai aubaina God o viviamlo-ḡaiḡaini? Tauta amamata maiteni eḡa tata virewapana da tarawatu tata vojijina-kauei. Wate marina wei vitana Jentail ta verevere-damanei. 11Eḡateni! Tauta anataputa ta vivitumaḡana da Bada Iesu ana aguei tana lawana, ma nanare Jentail maiteni.”
12Rava anatapui i genuana ma Barnabas ma Paul i rautaniḡanei, taui i bababani menanare ana au vaḡai God ana aguei kaua aniba ma vivirewapanai i kauei Jentail awarii.
13Maranai i babani vorovei, James babani i vikarei, “Au rava ona rautaniḡaneu.
14—Peter au naona i pariveremi menanare God Jentail i raugenari ma ḡelaui i vinei da tauna ḡarinei. 15Ma Peroveta nununai wei kauai i bababaniei marina nanare e tuputupua:
16 Wei au murina ana nememei,
ma David ana numa gara ana voa-melei.
Ana vituramairini
ma ana kauei da ina virewapana me.
17 Da rava mamae-terenai
Bada ina baiei,
Wate Jentail a rauḡorei da ḡariuei, Badai riwa. (Amos 9:11-12)
18 Wariaḡa da marina wei ta aramanei.
19-21—Lamna au baina eḡa tana kauei da ina piripiri Jentail aubaii, taui e mamae-tavirei God awarina. Wate pepa tana girumi ma tana egari da lam e pulopuloei god morumorui awarii eḡa ina ani, eḡa ina viawawana labalababa, ḡamoḡamo uai e kikiki eḡa ina ani ma sia ana tarana eḡa ina ani. Aubaina wariaḡa da marina Moses ana tarawatu e raugugulei boru au numai Sabatena patapatana.”
Pepa i girumi Jentail awarii
22Ma Apasol, babada ma ekalesia anatapui rava ḡelaui i vinei ma i paritawanei au Antiok au Syria provinsPaul ma Barnabas maiteni. Taui ai babada ruaḡa i vinei wavai Judas wavana ḡelauna Barsabas ma Sailas. 23Ma wei pepana au urai i terei,
Aposol, ekalesia babadai, varevareimi.
Jentail ekalesia au Antiok, Syria provins ma Silisia provins. Varevareiai, egualau!
24Tauai riwana a vaia da rava ḡelaui ai au boru i ḡairai ma ai viararamani i vinuabolaimi ma i visina-viraviraimi, wate tauai nai ravai eḡa ata paritawanei. 25Lamna aubaina tauai a viboru ma a vianina da taupariverena ata paritawaneiai, ata rava Paul ma Barnabas maiteni, 26taui i verena-melei ma ai lawana eḡa ita vinuabolei Bada Iesu Keriso wavana aubaina. 27 Judas ma Sailas a pariparitawanei da taui gamoiei ina riwemi aiwai tauai a girumi.
28Arua Vivivireina ma tauai ai ḡoana da eḡa vita ḡaeḡaena ana veremi, anina wei tarawatuna ava.
29Lam god morumorui i puloi eḡa ona ani,
Eḡa tara ona umai, Eḡa ḡamoḡamo uana kikikina vioana ana tarana ona ani.
Eḡa ona viawawana labalababa,
Mepa da wei tarawatui ona vojijina-kauei, taumi kaua aiaina o kaukauei.
Egualau kaua.
30Ma nelarai i paritawanei da i ḡaira au Antiok, ma ekalesia i rieiai da pepa i verei. 31Ma taui i ʼavi ma i vinuaiai kaua pariverena aiaina aubaina. 32 Judas ma Sailas taui God ana peroveta ma i babani guratana awarii ma wei taui i vinuaiaiei ma ai tumaḡana i vovai-virewapani. 33Ma kampa i mae mara aburuna ma ekalesia ana nuaubai i paritawana-melei au Jerusalem. 34 35Wate Paul ma Barnabas au Antiok i mae, ma taui maiteni Bada Riwana Aiaina i viararamani ma i raugugulei.
Paul ma Barnabas i vilamonei
36Ma muriai Paul, Barnabas i riwei, “Tana nae dobu au anatapuna mepa Bada Riwana Aiaina ta raugugulei ma ekalesia tana raugenari, ma tana inanai taui anina bo eḡa.” 37 Barnabas i ḡoei da John-Mark ita taravaini. 38 Wate Paul wei notana eḡa ita ḡoei aubaina au naona John taui au Pamphilia i ruba-tawanei ma eḡa ita mae da maiteni ita nola. 39Ai viparipariniḡai i apoapoe guratana da taui i vilamonei. Barnabas, Mark i taravaini ma kukei i damana au au Saipras. 40 Paul, Sailas i vinei. Ma ekalesia, Bada i vibaḡai da ana aguei taui ai au nola ina paini. 41Taui Syria da Silisia i naeni ma ekalesia i raugenari ma i vinua-terenei.