BABYOR NI
HOSEA
Murung’agen e Re Ke Babyor Ney
Hosea ni profet e i machib ko ley ni lel’och e nam nu Israel nga tomuren Amos ni profet ko ngiyal’ nib gel e gafgow ni tay yu Israel u m’on ni dawori waer yu Samaria ko mael ko duw ni 721 u m’on ndawori yib Kristus. I Hosea e i magafan’ ni bochan e i meybil e girdi’ nu Israel ngak yugu boch e got ma dakura yul’yul’gad ngak Got, me susunnag e ren’em ni bod nike le’engiy be’ ni bpin nde yul’yul’ ngak. Ya girdi’ nu Israel e ra pi’ed keru’rad ngak Somol ni bod rogon Gomer ni le’engin Hosea nde yul’yul’ ngak. Bochan e ren’em ni rin’ yu Israel me gechig nagrad Somol. Machane bochan e yugu be par Got nib t’uf yu Israel rok, me gagiyegnag ngar chealgad ngak me par thilrad nike fel’. Runguy rok e m’ug ko thin rok ni ga’ar: “Israel, uw rogon ni nggu pagem? Uw rogon ni nggu n’igem? . . . Dabiyag u ngorongreg ni nggu rin’! Ya ri gab t’uf rog!” (11:8)
Gathon e Re Ke Babyor Ney
Mabgol rok Hosea nge tabnaw rok 1:1—3:5
Pi thin nib togopluw nga Israel 4:1—13:16
Ba thin ni ngan pi’ keru’uy ko kireb nge ba michmich 14:1–9
1Irera’ e thin ni pi’ SOMOL ngak Hosea, ni be’ nib mo’on ni Beeri e chitamngin, ko fa ngiyal’nem ni Uzziah, nge Jotham, nge Ahaz, nge Hezekiah e ur pilunggad u Judah, ni bayi chuw bagayad me yib bagayad nga luwan; mi Jeroboam ni bmo’on ni Joash e chitamngin e ir e pilung nu Israel.
Le’engin nge pifak Hosea
2Nap’an e som’on ni non SOMOL ngak piyu Israel u l’ugun Hosea, e ga’ar ngak Hosea, “Girdi’ ko re nam ney e dakurir yul’yul’gad ngog ya yad be meybil ngak yugu boch e got ma yad be tay farad. Ere mman ngam la’ay be’ ni bpin nma pi’ ir ni chuway’ nge diyennag e bitir ni fakam.”
3Me yan Hosea i fek Gomer nge le’engiy, ni be’ ni fak Diblaim. Me diyen nge gargeleg bochi pagel, 4me ga’ar SOMOL, “Mu tunguy fithingan ni Jezreel, ya dabki n’uw nap’an mug gechignag fare pilung nu Israel ni bochan e mathang pogofan ni i tay Jehu ni reb e ga’ rok kakrom u Jezreel. Aram e nggu moseg e birok Jehu e gagiyeg. 5Ma bayi taw ko ngiyal’nem mu gu gagiyegnag e salthaw nu Israel ngar waergad ko mael u lan e loway nu Jezreel.”
6Me diyen Gomer bayay nge gargel ni bochi pin. Me ga’ar SOMOL ngak Hosea, “Mu tunguy ‘Det’uf’ ngak ya dabku gu dag e t’ufeg rog ngak e girdi’ nu Israel ara gu n’ag fan e kireb rorad. 7Machane bay gu dag e t’ufeg ko girdi’ nu Judah. I Gag SOMOL, ni Got rorad e bay gu ayuwegrad u pa’ e to’ogor rorad, machane gathi bay gu rin’ u daken e mael, — ni kan fek e saydon ara gat’ing, ara os ara salthaw ni be yan u os.”
8Ma nap’an ni chuguliy Gomer Det’uf nge pag e thuth, miki diyen bayay ngki gargeleg bochi pagel. 9Me ga’ar SOMOL ngak Hosea, “Mu tunguy fithingan ni ‘Gathi-girdi’-rog’, ya girdi’ nu Israel e gathi girdi’ rog, ma gathigag e Got rorad.”
Yu Israel ni bay ni fulweg nga rogon
10Piyu Israel e bay ra yo’orgad ngar boded e yan’ u maday, ndabiyag i the’eg ara ni foleg. Chiney e be ga’ar Got ngorad, “Gathi gimed girdi’eg,” machane bayib reb e rran ni bayi ga’ar ngorad, “Gimed pifak fare Got ni be par nib fos!” 11Piyu Judah nge piyu Israel e bay ku ra pethgad ngar ta’rebgad bayay. Ma bay ra duwgiliyed ta’abe’ nge par ni pilung rorad, ma bay ra yo’orgad bayay me fel’ rogorad. Aram rogon e re rran ni ba’aram ni rran rok Jezreel.