1Mame Izyraeu tõ emero tõximõse toto Tawi maro Eperõ po. Ynara tykase toto eya:

— Oekyry tõme ynanase Izyraeu pakõme kuexirykõke, tuisa. 2Pake kutuisarykõme Sauu ahtao, Izyraeu tõ soutatu tõ aroneme mexiase etonatoh pona. Mame ynara tykase Ritonõpo Kuesẽkõ oya: “Tuisame exĩko mase, Ritonõpo poetory tõ esẽme,” tykase toto.

3Moro sã Izyraeu tõ tamuximãkõ tõximõse Tawi maro Eperõ po, tõmiry totapose eya xine Tawi a Ritonõpo neneryme. Mame Tawi zuhpokoxi, oriu tukuãse eya xine tutuisarykõme tyritohme, Izyraeu tõ esẽme. 430me jeimamyry nae Tawi ahtao tuisame toehse, 40me jeimamyry taropose eya tuisame toexiry poko. 5Eperõ po Juta tõ tuisaryme nexiase 7me jeimamyry zokonaka; Mame Jerusarẽ po 33me jeimamyry taropose eya Juta tõ maro Izyraeu tõ tuisaryme.

6Morarame tuisa Tawi toytose soutatu tõ maro pata Jerusarẽ poremãkapose. Moro pata jepuseu tõ esaryme kynexine. Tosaka xine Tawi tõ omõsaromepyra tokarose toh repe. Naeroro ynara tykase toto eya:

— Xiaro jũme omõpyra mase. Tonurãkara pata eraseme ahtao ro oẽmapopyra xine mã toto, pakaihkahnõme roropa toto ahtao oẽmapopyra xine mã toto, tykase jepuseu tomo.

7Yrome Xião jamihme exikety tapoise Tawi a tosaryme ehtohme. Moromeĩpo moro pata tosehpase Tawi pataryme. Ynara toehse nexiase:

8Apitoryme Tawi ynara tykase typoetory tomo a:

— Jepuseu tõ se pyra ase ipunaka. Mokaro tonurãkara sã exiketõ, ahmitahpyry sã exiketõ roropa poremãkapory se awahtao xine, tuna eutary ae nono kuroko onuhnõko matose toto maro etonatohme.

Morara exiryke morara tykase mã toto: Tonurãkara, ahmitahpyry exiketõ maro omõsaromepyra mã toto Ritonõpo Tapyĩ taka.

9Morarame tõsesarise Tawi moroto, osewomatoh tao, Tawi Esaryme moro tosehpase roropa eya. Mame moro pata zomye ewomatoh tyrise eya, nono ritopõpyry pata poe xixi tũtatoh wino tuisa tapyĩ konõto pona. 10Kokoro rokẽ orẽpyrahxo toehse ynororo Ritonõpo, Jamihmehxo Exikety imaro exiryke.

11Mame tuisa Hirão, pata Tiro esemy, Tawi akorehmary se toehse. Naeroro oturuketõ taropose eya Tawi zuruse; apupari roropa taropose te, wewe poko erohketomo te, topu poko erohketomo, enara. Mame tapyi kurã tyrise eya xine Tawi tapyĩme. 12Mame tuisame nymyry toehtoh poko tuaro toehse Tawi, Ritonõpo a tuisame tyrise ynororo, typoetory Izyraeu tõ esẽme ehtohme. Ritonõpo poe imehxo toehse Tawi Izyraeu tõ akorehmatohme.

13Moromeĩpo Eperõ poe toytose Tawi ahtao, typytase ropa ynororo imehnõ nohpo tõ maro Jerusarẽ po. Tonuruse ropa imũkuru tomo, ẽxiry tomo, enara. 14Tawi poenõ tonuruse Jerusarẽ po, enara nexiase toto: Samua te, Sopape te, Natã te, Saromão te, 15Ipaa te, Erisua te, Nepeke te, Japia te, 16Erisama te, Eriata te, Eriperete, enara.

17Morarame Izyraeu tõ tuisaryme Tawi menekatopõpyry waro toehse pirixteu tõ ahtao, tõximõse toto Tawi apoitohme tyya xine repe. Yrome moro poko tuaro Tawi, tyhtose ynororo ãpuruhpyry jamihmã taka. 18Mame pirixteu tõ tooehse. Tõsesarise toto jakanahmã Ahno konõto po. 19Naeroro tõturupose Tawi Ritonõpo a, ynara tykase:

— Ytõko ha osetapase pirixteu tõ maro? Toto poremãkapõko mah? tykase.

— Ytoko! tykase Ritonõpo. — Mokaro ekarõko ase oya, toto poremãkapõko roropa matose, tykase.

20Morara exiryke Paau-Perazĩ pona toytose Tawi. Moroto pirixteu tõ typoremãkapose eya, ynara tykase ynororo:

— Zueme tuna ahtao emero arõko. Moro sã mã kuepetõkara typoremãkapose Ritonõpo a.

Naeroro moroto tosehpase Paau-Perazĩme. (Paau-Perazĩ, kary “Kuesẽkõ mokyro, kuepetõkara poremãkapone.”) 21Moroto tynaxikahpyrykõ tyneponãmarykõme turumekase pirixteu tomo a, naeroro mokaro tarose kehko Tawi tomo a moro poe. 22Imeĩpo pirixteu tõ tooehse ropa jakanahmã Ahno konõto pona ropa osesarise ropa.

23Tõturupose ropa Tawi Ritonõpo a, mame ynara tozuhse ynororo Ritonõpo a:

— Osetapara ehtoko taroino. Mya ytotoko mokaro zomye, wewe amoreira tõ htaka. Mame moino wewe etonie osetapatoko. 24Mame imoihmãkõ ytoytory sã etaryhtao oya wewe tõ epozakuroko, ytotoko axiny. Toytose Ritonõpo osemazuhme mokaro pirixteu tõ poremãkapose.

25Morara exiryke Ritonõpo omihpyry omipona toehse Tawi, pirixteu tõ taropose eya mya Kepa poe Kezea pona.