“Taropose ropa ya ekarõko matou, typyty aropory sã inio a?

Morara ahtao otoko na apapeny, ypyty aropotoh papeny?

Otarame ynara ekarõko matose:

Imehnõ namotome kuekaroatose tineru apoitohme ya, ynepehmary epehmatohme.

Arypyra! Tarose mexiatose imehnõ namotome oorypyrykõ pokoino;

kuaropoatose popyra ehtoh poko oexirykõke.

2Oty katoh ypoetory tõ oehpyra osẽpatakãmase ymaro toytose jahtao toto pynanohse?

Oty katoh jezuhpyra toh nexiase tykohmase toto ahtao ya?

Seromaroro opynanohsaromepyra jekarõko matou?

Tyjamihkehse jekarõko matou? Arypyra!

Toiro tyripõko ase, mame tuna konõto anorỹko mana.

Tuna tõ rĩko ase ona tonorẽme.

Morara ahtao tuna pyra exiryke

kana orihnõko mã toto tuna peneryke,

tymoke exipitõko mana.

3Kapu kohmãkapory waro ase xinukutume aehtohme,

xinukutume tupokẽ sã tyekyry tõ hnamone mana.”

4Ritonõpo Imehxo Exikety a tamorepase ywy jotururu waro jehtohme

totaehse exiketõ jamihtanohpotohme ya.

Ẽmepyry ae rokẽ aomiry etary se jyrĩko mana

aomiry etatohme jamoreparyhtao.

5Tuaro jehtoh ekarose Ritonõpo ya,

ỹme exiase, aomiry omipona exikehpyra exiase,

epara exiase ewinoino.

6Ỹpary ekaroase jypipohnanomo a,

jẽmyty ekaroase otypo mukanomo a.

Otonẽpyra exiase typoihtose jahtao eya xine,

ituh tykase toto ahtao, jẽmyty pona.

7Yrome ehxiropyra ase Ritonõpo Kuesẽkomo a jakorehmaryke.

Morara exiryke esyryhmara ase topu samo,

zuaro ase ehxiropyra exĩko ase,

8jewomane ameke pyra exiryke,

azahkuru pyra jehtoh enepõko mana.

Onoky jyhxirory se hnae?

Ahtao eropa oximaro apiakane ẽpataka.

Onoky zae pyra jekarõko nae?

Ah mokyro noehno jyhxirotohme!

9Ritonõpo Kuesẽkõ mã jewomãko,

naeroro jyhxirosaromepyra imehnõ mana.

Jepetõkara emero tonahkasẽme exĩko mã toto;

kamisa samo tonahse ahtao nuko a.

10Etatoko pahne, Ritonõpo Imehxo Exikety enetupuhnanomo,

ipoetory omiry omipona exiketomo:

oesemarykõ tykohmãse ahtao xinukutumã samo,

saerehkatoh pyra ahtao ipunaka,

Ritonõpo enetupuhtoko,

Oesẽkomo a ãkorehmarykõ eraximatoko.

11Enetoko ke amarokomo imehnõ enahkapory poko atamorepaketomo,

osenahkapõko rokẽ matose onyrihpyrykomo a.

Ynara tyripõko Ritonõpo mana awãnohtohkõme;

sam katoh konõto oeraximatorỹko mana.