Luda yã takada kũ Bisã yão AYUBA 3

Ayuba a igↄrↄ gyabonaa

1Abire gbɛra Ayuba lɛ́ wɛ̃̀ à yã vãni ò a igↄrↄ musu 2à pì:

3Luda ma igↄrↄ kɛ pã

atɛ̃nsa gwãani kũ ò ma nↄ̀ↄ sìi pìi.

4Gↄrↄ pì li gusira ũ,

zaa musu Luda sún a yã daro,

àsun tó gu puaro.

5Gusira kũ níkiniki gↄrↄ pìia,

ludambɛ sira kútɛa,

gusira bìtim daala.

6Gwãani pì sↄ̃ à sira kũ níkiniki,

òsun a da wɛ̃̀ gↄrↄnↄ tɛ́ doro,

òsun a naro mↄ gↄrↄnↄ gũnlo.

7Gwãani pì kɛ gwãani fĩni ũ,

ayuwii súngↄ̃ dↄ gↄrↄ kũ̀aro.

8Pↄ́dammari kũ òdi tó ifãntɛ̃ gu puronↄ láari kɛ gↄrↄ pìia,

gbɛ̃ kũ ò dↄ̃ lákũ òdi ↄ ká kwãsaaii pìnↄ.

9A gudↄnao susunɛnↄ sira kũ,

oni a gudↄna dã pã, gu ni kɛ̃ro.

10Zaakũ gↄrↄ pì dí ma da nɛ́'isↄ zɛ́ tatamalɛro,

à tò ma wɛ́ wari è.

11À kɛ̀ dera òdi ma i gɛ̀ ũroo?

Bↄ́yãi mádi bo gbɛrɛn ma ɛra gↄ̃̀nↄroo?

12À kɛ̀ dera ò ma kpa gbálaa?

Bↄ́yãin ò yↄ̃ kpàma ma mìi?

13Tó ma ga yã, de ma gↄ̃ kítikiti,

de ma i ò ma kámma bò

14kũ kínanↄ kũ andunia gũn lɛ́dammari

kũ ò kínabɛ zĩnↄ kɛ̀kɛ ò bò ń zĩdanɛnↄ,

15kínɛ kũ ò wuraa kàkarańyĩnↄ

akũsↄ̃ ò andurufuu kà ń kpɛ́n à pà.

16À mana yã ò ma vĩ lán nↄ̀bↄtɛnɛ bà,

lán nɛ́ kũ à sù gɛ̀ ũ adi andunia ero bà.

17Gwen yãvãnikɛrinↄ dì ń vãnikɛna tón

akũsↄ̃ gbɛ̃ busananↄ dì kámma bon.

18Zĩ̀zↄnↄ dì ĩampaki le gwe,

òdi ń wɛ́tãmmarinↄ kòto ma doro.

19Gbãnadenↄ kũ talakanↄn kú gwe ń pínki,

akũsↄ̃ zↄ̀ↄ dìgↄ̃ de a dikiri pↄ́ ũ gwe doro.

20Bↄ́yãi Luda dì gu pu wɛ̃ndadenↄnɛɛ?

À kɛ̀ dera àdi wɛ̃̀ndi kpá gbɛ̃ kũ ń pↄ siranↄaa?

21Ń wɛ́ dìgↄ̃ dↄ gai òdi lero,

òdi kpátɛ kɛi de aruzɛkɛ kũ à utɛnala.

22Tó ò gà ò ń vĩ, òdi pↄnna kɛ,

ń nɛ̀sɛɛ dì kɛ nna.

23Luda ń zia yã ùtɛńnɛ,

à karaa lìkańyĩ kpa sĩnda pínkia.

24Wesakakara à bona mɛ́ à gↄ̃̀ ma pↄ́ble ũ,

ma ndanaa dì lákaro.

25Yã kũ ma vĩna kɛ̀nɛɛ pì mɛ́ à ma le,

yã kũ ma kã gìi pì mɛ́ à sùma.

26Má ĩampana vĩro, ma laakari kpátɛnaro.

Má kámmabona vĩro, ma wari dì lákaro.