à laakari dↄa de à asãnsi le.

2Dↄ̃na súsun matɛn daárɛ,

àsun pã kpá ma yãdannɛnaairo.

3Kũ má kun nɛ́ ũ ma de ↄĩ,

má busana ma da nɛ́ mɛ̀n do légelege ũ.

4Ma de yã dàmɛnɛ à pì:

Ǹgↄ̃ ma yã kũna n swɛ̃̀ɛ gũn,

ǹ ma yãditɛnanↄ da ĩnigↄ̃ kun.

5Ǹ ↄ̃ndↄ̃ kũ ǹgↄ̃ dↄ̃na vĩ,

ǹsun sãsãi ǹ pã ma yãnɛro.

6Ǹsun pã kpá ↄ̃ndↄ̃iro, ani n dãkpã,

ǹgↄ̃ yei, ani ↄ kúmma.

7Ǹ ↄ̃ndↄ̃ kũ, àkũmɛ yã sĩnda pínki mì ũ,

ǹ dↄ̃na wɛtɛ kũ aruzɛkɛ kũ ń vĩo pínki.

8Ǹ a kũ gbãngbãn, ani n kara,

ǹ a kũ ↄplapla, ani bɛ̀ɛrɛ línnɛ.

9Anigↄ̃ de fùra mana ũ n mìia,

anigↄ̃ dennɛ kífura gakuride ũ.

10Ma nɛ́, ǹ sã kpá ma yãi,

ǹ yã pì da, n wɛ̃̀ndi nigↄ̃ gbã̀na.

11Ma ↄ̃ndↄ̃ zɛ́ mↄ̀nnɛ,

ma n da yã mana zɛ́n.

12Tó ntɛn táa on, pↄ́ke ni kpánnɛro,

tó ntɛn bàa lɛ́n, ĩni gɛ̃̀ síro.

13Ǹgↄ̃ ma lɛ́damma kũna, ǹsun gbarɛro,

ǹ a kũ gbãna, zaakũ àkũmɛ n wɛ̃̀ndi ũ.

14Ǹsun yãvãnikɛrinↄ zɛ́ sɛ́ro,

ǹsun tɛ́ gbɛ̃ vãninↄ zɛ́iro.

15Ǹ pãńnɛ, ǹsun naḿmaro,

ǹ kɛ̃ḿma ǹ n gɛna kɛ.

16Tó odi vãni le ò kɛ̀ro, òdi i oro,

tó odi gbɛ̃ le ò kari boro, i dì gɛ̃ ń wɛ́nlo.

17Zaakũ vãnikɛnaamɛ ń pↄ́ble ũ,

wɛ́tãna gbɛ̃nↄaamɛ ń pↄ́mina ũ.

18Gbɛ̃ mananↄ zɛ́ de lán gudↄnaa bàmɛ,

a gupura dìgↄ̃ bo lán ifãntɛ̃ bonaa bà.

19Yãvãnikɛrinↄ zɛ́ de lán gusira níkiniki bàmɛ,

òdi pↄ́ kũ à tò òdi gɛ̃̀ sí dↄ̃ro.

20Ma nɛ́, ǹ laakari dↄ yã pìnↄa,

ǹ sã kpá ma yã'onnɛnaaa.

21Ǹsun kpá sãkotoro,

ǹgↄ̃ kũna n swɛ̃̀ɛ gũn.

22Zaakũ à de wɛ̃̀ndi ũ gbɛ̃ kũ à lè à kũnaanɛ,

à de mɛ̀ pínki aafia ũ.

23A kũ à denla ǹ laakari dↄ n swɛ̃̀ yãa,

zaakũ wɛ̃̀ndi zĩni bò swɛ̃̀ kĩnaamɛ.

24Ǹ bo yãvãni'onan,

ǹ mì kɛ̃ yãlɛkpɛrɛ'onaaa.

25Ǹ wɛ́ dↄ n arɛ,

ǹ gu gwa n kuru súsu.

26Ǹ zɛ́ sɛ́ súsu,

n yãkɛnanↄ pínki ni bo mana.

27Ǹsun na ↄplai ke ↄzɛiro,

ǹsun gbá pɛ́tɛ yã vãni zɛ́nlo.