Yaubada ena Fanufanuha
1Aee–, Yaluwagu, Guyau u fadebasae!
Ma nuwa ofi fahigu hesana fafatabuna E fadebasae!
2Aee–, yaluwagu, Guyau u fadebasae.
Ena ainauya mahudoꞌidi haba E nuwa nuwatuhuidi,
3in egu heyaheyaya mahudoꞌidi ya nuwatuhu afuledi
yo agu asiyebo mahudoꞌidi ya faloholohodi,
4Peꞌi yai ya famwahuli fuyoꞌigu,
be ena faloholoho yai,
in ya gadogadosisiyegu yo ya fanuwatohatohaegu.
5Egu miya lahaidi ganahewadi yai
ginauli loholohodi ya aiꞌainauyaigu,
be haba taugu ena adidili ya fafwaufwau fuyoi
doha magesubu gubugubufwauna.
6 Guyau laulau dudulaina yai
safalumadi sa ita lidilidiyedi ya saguhidi.
7Ena nuwatuhu Mose ya fatalaha,
yo ena paipaisowa Isalaela dodogadi hinaga ya fatalahadi.
8 Guyau in fafanuwatohatohana yo anꞌansoina,
hige i manamanabala feula yo ena gadosisi ya fafatadada.
9In ibege fuya ouꞌouli i laulau fagilu,
yo ena manabala ibege i ota esegahi.
10Eda heyaya debadi yai in gonowana ya fakamkamnada,
in moho ibege i ginauli.
11Doha galewa tanoꞌubu ya saipwai
mate ena gadosisi laꞌina tau fafaꞌatitiyenna lebedi yai.
12Eda heyaheyaya lofana doha
tefa saisai yai, na ya lau ee–,
tefa leuleu yai mate ya kamfahidi.
13Doha taumoho nanatuna ya fanuwatohatohaedi
mate doha Guyau tau faꞌatitiyenna ena fanuwatohatohaedi.
14Paꞌana ya sibai, ita tanohi moho lisina yai ya ginaulida,
be ya nuwatuhui ita hige dodoga adiꞌadidilida.
15Eda miya lahaidi yai doha hawahawa,
doha mula inꞌin gaibudi, sa taya be sa peꞌi.
16Hwayahwayau ya towa tawaidi be sa failaulauwidi
na hige sai i ita fuyoꞌidi.
17Safalumadi Guyau sa ita hitiꞌi, ena gadosisi otaꞌota fahidi.
Lisidi yai, ena loholoho haba ya ota esegahi ya lau ee–,
hitina yo hitina.
18Umi, safalumadi ena liba fasunuma yo laugagayo sa atahiyedi,
mate bena sa awaꞌabiyedi.
19 Guyau galewa ya abi ena aba taꞌai,
be amainiya ginauli mahudoꞌidi ya tanuwagaidi.
20 Guyau au fadebasae!
Umi, ena anelu adiꞌadidilidi yo dididigadi,
yo umi ena laugagayo au awaꞌabiyedi,
yo au ataꞌatahi lau somo ya libalibaedi.
21Wananaha! Guyau au fadebasae!
Umi, Galewa ena hiyala dodogadi,
yo umi, ena tau paisowa,
be ena nuwatuhu ami laulau watandi,
22Ginauli mahudoꞌidi ya ginauli ena aba baꞌisa nuꞌuna mahudoꞌina yai,
Guyau, au fadebasaen.
Guyau ee–, egu nuwanuwatuhu yai E fadebasaem.