1Keiman Pakai chu phattin in thang vah'in kate. Pakai thagvah nahi kakam sunga gingdoh jingding ahi. 2Keima Pakaiya bou kithang at jing ding kahin; Panpi beite jouse lunglut cheh uhen. 3Hungun Pakai loupi nahi seiphong khom u hitin amin hi choi-an khom u hite. 4Keima Pakai kom a kataovin aman kataona eisanpeh tai. Aman kakichatna jousea jong eilhat doh tai. 5Ama panpi ding ngaicha jouse vah bangin hungvah doh untin, amai uva jachatna muthim jinglouhelding ahi. 6Kahahsat behseh phat in kataovin Pakai in eingai peh e; aman kaboina jouse eisuh lhap peh tai. 7Pakai vantil chu hoidamna ahin; ama ging te aman aumkimvel in ahuhdoh jinge. 8Pakai phatje chu patepmun lang veovin, Pakaija kisel jing mite chu iti kipa hitaovem! ✡ 9Nangho Pathen mite ho Pakai chu ging jingun ajeh chu ama ging jingten angai chat jouse amudiu ahi. 10Keipi bahkai gol hat laitah jong agilkel jin, ahin Pakai tahsandet jing hovang thilpha alhasam ngaipouve. 11Kachate ho hunguvin kaseihi kingai phaovin, chuleh keiman Pathen ginje kahilding nahiu ve. 12Hinkho sottah leh phatthei na lhingset a hingnom umkha em? ✡ 13Thuse seinan nalei tuhtangin lang chuleh nakam jong jouseinan mang hih in! 14Thilse a kon in kihai mangin lang thilpha bol in, chamna hol in lang hichu chepin. 15Pakai mitin thilpha boljingho avesui jingin;panpi ngai a koute din akol tenin jong akihong jing e. 16Hinla thilse bolte chu dou mitnin aven, aman amin u leiset aathaimang ding ahi. 17Pakai in panpi ngaichaho kouna angaipeh in. Aboi naova kon in ahuhdoh jin ahi. 18Lungthim kisuchipte kom a Pakai chu anai in;Alhagao kisu gimte ahuhdoh jin ahi. 19Michonpha hon boina tampi atohjiuvin, hinla Pakai in phattin in ahung huhdoh jin ahi. 20Ajeh chu Pakai in michonpha ho gule chang ahoibit pehjin; khatchajong abohsah pon ahi! ✡ 21Hamsetnan migiloute hinkho alah teiding, michonpha ho hotbol tejong got na chang teidiu ahi. 22Hinla Pakai in ama kin bolho vang alhatdoh ding, ama a kisel jing honjong themmo changlou diu ahi.