1Nathahatna ahi lengpa iti kipah hitam O Pakai! Galjona napehjeh’in aman kipah’in kho asam e. 2Ajeh chu nangin alungthim’a angaichan napen aman athumho khatcha jong nadapeh poi. 3Nangin lolhin naleh houtheinan nalamto jin, aluchungah sana hoipen lallukhuh nakhuhsah’in ahi. 4Aman ahinkho nahoitup peh din athumjin, chule nangin ataona nasanpeh ji'e. Ahin nikho jong tonsot'a din nasuh saopeh ji e. 5Nagaljona chun jabolna lentah achansah in, thupina le loupinan najemhoijin ahi. 6Nangin tonsot malsomnan naphungvuh in chuleh nangtoh umkhom'a nopna kipana achun naphung vuh e. 7Ajeh chu lengpa’n Pakai atahsan e. Hatchungnung ngailutna longlou chun alhuhna dinga kon in nahoidoh sah jingin ahi. 8Nangin nagalmiho chu namattup sohkei ding, nangma nadouho jouse chu thahattah nabanjetna chu namattup ding ahi. 9Nangma nahung teng amaho chu meikong lah’a naselut ding ahi. Pakaiyin alunghanna a asuhgam ding meikonga ahalgam ding ahi. 10Achateu leiset chunga kon a nathaimang ding; amahon sonlepah aneikitlou diu ahi. 11Amahon nangdounan thil gong jongleu, athilse gonhou chu lolhing louding ahi. 12Ajeh chu amahon nathalchang amaho kapna dinga nadoi chu amutenguleh kiheimang untin jammang diu ahitai. 13O Pakai nathahatna nasattah a chunhungthou doh tan. Tumgin le lasah tothoa nahat na natoh chu kakipa pidiu ahi.