1Pakai chu thangvah un! Pakai min chu thangvah un! Pakai lhacha ten Ama chu thang vah un, 2nangho Pakai in a lhacha ten Pakai hongsung a in a chun. 3Pakai chu aphatna jeh’in thangvah’un; amin ngaitah chu vahchoilan domsangun. 4Ajeh chu Pakai in Jacob chu Ama a dingmong monga alhen ahin, Israel chu atumbeh’a amagou dinga agon ahi. 5Keiman Pakai aletna leh aloupina chu kahen, Ipakai uhi pathen dang sanga lenjo le loupijo ahi. 6Pakai in van le leiset chunga hin, twikanglen thuh sunga hin aman alunglhaina a adeidei abol ahi. 7Aman meiho jonghi leiset chunga kon a alentousah ahin, Aman gojuh pet in koljong aphetsah’in, huijong hi athilkholna a kon in ahin lhadohjin ahi. 8Aman Egypt te insunga chun ainson in mihemle ganhing jong apeng masa jouse ana sugam in ahi. 9Aman Egypt a chun Pharaoh le amipi jouse douna in datmo umtah thilkidangho ana tongdoh’in ahi. 10Aman namlentah tah ho anavolhun leng thupi tahtah hojong ana ssatchap e. 11Amor lengpa Sihon, Bashan lengpa Og chuleh Caanan lengho jouse anathat gam in ahi. 12Aman agam u chu Ama goulo Israelte gamtum dingin anapen ahi. 13O Pakai namin hi tonsot'a umjing ding ahi. 14Ajehhcu Pakai in amite chunga thutah’a vaihom ding asohte chunga khotona aneiding ahi. 15Chitin namtinte doilim hohi sana le dangka maimai mihem in asemthubou ahi. ✡ 16Amahon kam anei un ima aseithei pouvin, mit anei un ima amuthei pouvin, 17kol anei un ima ajathei pouvin nahkui anei un ima anahthei pouvin ahi. 18Doilim semthu ho jouse le hiche tahsanho jouse chu hitobang ngen ahiuve. 19Vo Israel Pakai chu thangvah’un! O thempu Aaron chilhahho, Pakai chu thangvah’un, 20O Levite Pakai chu thangvah’un! Nangho Pakai ginna neijouse Pakai chu thangvah’un! 21Zion’a kon in Pakai chu thangvah’un ajeh chu Ama Jerusalema hin achengin ahi. Pakai chu thangvah’un!