Atu anakubali na kutubu dambi zao
1Lola, mkpwono wa Mwenyezi Mlungu si mfupi hata usiweze kutivya,
na sikirore si ziho hata risiweze kusikira.
2Ela makosa genu gakakutengani mwimwi na Mlungu wenu,
na dambi zenu zikaufwitsa usowe musiuone,
ndiyo mana kakusikirani.
3Mikono yenu ikatiywa najisi kpwa kuolaga,
na mala genu gakatiywa najisi ni makosa,
miromo yenu ikagomba handzo,
na malilimi genu gakagomba uyi.
4Taphana ashitakiye kpwa haki,
na taphana adziheheraye kpwa kugomba kpweli.
Mnakuluphira maneno mahuphu na kugomba handzo,
na kupanga njama mbii za kuhenda uyi.
5-6Mipango muhendayo ni mii dza mayayi ga bafwe.
Mwenga richivundzwa, bafwe nkutuluka.
Ela mipango yenu taindakufwaidini,
mipango dza iyo taina mana
dza nguwo ichiyotengezwa na muhambo wa dzwidzwidzwi.
7 Amaruru kuhenda mai,
na kuhenda wangbwi wa kuolaga atu asio na makosa.
Maazo gao ni ga uyi,
chila phatu ainjirapho, nkuphabananga na kuphahenda gandzo.
8Taamanya kuishi kpwa amani,
na taphana uamuli wa haki, kahi yao.
Adzitengezera njira za kumyoka.
Chila atsupiraye njira zizo, kandaishi kpwa amani tsona.
9Kpwa sababu iyo, uamuli wa haki u kure naswi na haki taihufikira,
hunagodzera mwanga, ela kosi kuna jiza,
hunagodzera kungʼale, ela hunanyendeka kpwenye chilungulungu cha jiza.
10Hunaphaphasa kuta dza chipofu,
hunakpwala mutsi, avi ni usiku.
Kahi-kahi ya enye nguvu, swiswi hu dza nyufu.
11Swiswi hosi hunanguruma dza dubu,
na hunaula dza njiya kpwa sonono, hunalonda haki ela taipho,
hunalorera wokofu, ela u kure naswi.
12Mana makosa gehu ni manji mberezo,
chisha dambi zehu zinatuluza ushaidi kuuhusu,
kpwa kukala huna makosa,
na uyi wehu hunaumanya.
13Hukakuasi na kukurema uwe Mwenyezi Mlungu,
hukakuricha uwe Mlungu wehu,
hukaonera atu na kukuasi uwe,
hukatunga maneno ga handzo mioyoni mwehu na kugagomba.
14Uamuli wa haki ikaikpwa kanda
na haki i kure naswi,
kpweli ikarichwa kotini
uaminifu taupho.
15Kpweli taipho
na iye arichaye uyi anakala muindzwa.
Mwenyezi Mlungu waona kala takuna uamuli wa haki,
vivyo taviyamuhamira.
16 Waangalala ariphoona taphana mutu wa kuhehera aonerwao,
phahi mkpwonowe wenye, ndio uriokurehera ushindi,
na hakiye ndiyo iriyokuterya.
17 Achivwala haki dza chisibao cha chuma chifuwani,
na wokofu dza kofiya mwakpwe chitswani,
achidzivwisa chisasi dza nguwo,
na achidzifwinikira wivu dza vwazi.
18Andariphiza maaduige kulengana na mahendo gao,
andaatsukirirwa nyo ampingao,
naye andariphiza maaduige
hadi garigo pembe za dunia.
19Phahi atu andariogopha dzina ra Mwenyezi Mlungu,
na kuishimu ngumaye,
kula mlairo wa dzuwa hadi mtswerero wa dzuwa,
mana andakpwedza dza madzi ga mafuriko gachigovuvurirwa ni Mwenyezi Mlungu.
20 “Mkomboli andakpwedza Sayuni,
akombole atu a chivyazi cha Jakobo atubuo dambi zao,”
Mwenyezi Mlungu anaamba.
21Mwenyezi Mlungu anaamba, “Chichi ndicho chilagane changu nao, Roho wangu ariye ndani yenu, kandakurichani kula vi sambi, hata kare na kare. Na maneno gangu nrigogatiya mwenu kanwani, tagandauka mwenu kanwani, kanwani mwa ana enu, wala kanwani mwa adzukulu enu kula vivi sambi, hata kare na kare.”