Unabii kuhusu Tiro
1 Hino ni ruwiya kuhusu Tiro:
Rirani mwi enye meli za Tarishishi!
Mana mudzi wa Tiro ukaangamizwa
ukasala bila nyumba wala bandari.
Habari hizi zamanyikana
kula Kupuro.
2Hurirani mwi atu msagalao pwani
na mwimwi achuuzi a Sidoni
mchiotajirishwa ni mabaharia,
3ariovuka madzi manji kpwendagula mtsere kula Shihori,
na kula muho Naili.
Nao ndio okala pato ra Tiro.
Tiro ichikala soko ra mataifa.
4Gbwirwa ni haya uwe Sidoni mana bahari ikagomba,
iyo ngome ya bahari yaamba,
“Sidzangbwehenda utsungu wa kuvyala wala sidzangbwedzivugula.
Sidzangbwerera avulana wala asichana.”
5Habari za kuangamizwa kpwa Tiro ndiphofika Misiri,
atu andasikira sonono sana!
6Vukani mphiye Tarishishi mwimwi msagalao pwani.
Rirani kpwa sonono.
7Dze, huno ndio mudzi wenu wa raha,
mudzi wa hangu kare na kare
ambao atue atsamizwa
kpwendasagala tsi za kure?
8Ni ani ariyepanga njama hino chinyume cha Tiro,
mudzi uriovwisa tadzi atu anji?
Mudzi ambao ahendadzie bishara kala ni ana a afalume
na achuuzie kala ni atu akulu duniani?
9Mwenyezi Mlungu, Mlungu wa majeshi ndiye yepanga njama hino
ili kubananga ngulu zirehwazo ni iyo nguma ya Tiro
na kuifya osi anaoishimiwa duniani.
10Mwimwi enyezi a Tarishishi, mwagirani tsi yenu madzi
dza muho Naili ufurikavyo, mphande mtsere
mana Tiro taina bandari tsona.
11Mwenyezi Mlungu akagolosa mkpwonowe dzulu ya bahari
na kuhenda falume zisumbe.
Akalavya amuri kukala midzi ya Kanani
yozungulusirwa ngome, ivundzwe-vundzwe.
12Kundakala na raha tsona
uwe mwanamwali wa Sidoni unayeonerwa.
Uka uphiye Kupuro,
na kuko piya kundaoya bii.
13Lola, iyo tsi ya Akalidayo,
atue taako tsona!
Aashuru akaigaluza
ikakala phatu pha nyama a tsakani.
Akaizangira na kuidzengera minara ya viha.
Akabomola madzumbage ga afalume
na kuihenda ikale gandzo.
14Rirani mwimwi enye meli za Tarishishi,
mana mudzi wenu urio na ngome ukahendwa gandzo!
15Phahi wakati hinyo mudzi wa Tiro undayalwa kpwa muda wa miaka mirongo sabaa, sawa-sawa na muda wa umuri wa mfalume mmwenga. Ela muda uhu wa miaka mirongo sabaa ndiphosira, mudzi wa Tiro undakala dza hura wira wa malaya uambao:
16“Hala ngephephe uwe malaya uriyeyalwa
uzunguluke nyo mudzi!
Piga ngephephe vinono
na uimbe mawira manji ili azembeo akuuyire tsona.”
17Bada ya iyo miaka mirongo sabaa, Mwenyezi Mlungu andaufufula mudzi wa Tiro. Bisharaze zindauya dza hipho mwandzo na kudziphahira pesa kpwa kudziguza kpwa falume zosi duniani. 18Ela higo maripho ga bisharaze gandatengbwa kpwa ajili ya Mwenyezi Mlungu. Tagandaikpwa kuikpwako hazina wala akiba, ela fwaida za bisharaze zindakala mali ya hinyo ahumikao mbere za Mwenyezi Mlungu, aphahe kurya kumvuna na avwaleto.