1Do nakatayokaw ni Dabid a nachisarsarīta di Saulo, nayboya sa kan Jonatan. Naypasinged nakapachisīt ni Jonatan di Dabid, as inpateg na iya akmay mismo na inawan. 2Yapo do dāwri a araw, ki pinagyan ni Saulo si Dabid do yanan na, kan inpalōbos na paba somabat di āmang na. 3Do dāwri, nachitōlag si Jonatan di Dabid, ta naipateg na iya so taywara a akmas inawan naw. 4Binahas ni Jonatan iyaw kagay naw, as nakaitoroh na sya di Dabid. Binahas na paw laylay naw a pachigobat, as nakaitoroh na sya dya a nagrāman ispāda naw, bai, kan iyaw sintorong naw.

5Nagballīgi si Dabid do aran dino a nanoboyan sya ni Saulo. Dawa, pinayparin na a komander no bōyot na saw. Chinasoyot da no tabo tawotawo saw kan siraw opisyalis na saw ni Saulo.

6Do nakapaybidi daw, do nakatayokaw ni Dabid a nangdiman so Pilisteowaw, minohtot saw mababakes saw do tabo idiidi no Israel a nachibayat di Āri Saulo. Nagkankanta sa so kankanta no ragragsak, kan tomnatāda sa a myan so tamborin kan tatdo so kordas a pagtokaran. 7Do katatāda daw, inkankanta da:

8As taywara a nakasoli si Saulo do dyaya, kan binata na a kāna, “Āngo nyaya? Padayāwan daya si Dabid do nakapangdiman na so asa poho a rinibrībo. Ki yaken, ki rinibrībo lang. Aysa, isarono danchi a payparinen a āri da!” 9Nakayapo do dāwri, kinoskosilapan ni Saulo a pangimōnan si Dabid.

10Do somaronwaw a araw, nangay asa a marahet a ispirito a pinalobōsan no Dyos a nangitoray di Saulo a mangipadpadto do kayan naw do irahem no bahay na. Ki myan si Dabid a magtoktokar so arpa naw a akmas gagāngayaw a pariparinen na, kan siig-igpet si Saulo so chibot naw. 11Pinalbot ni Saulo chibot naw, ta iniktokto na a kāna, “Ilansa kos Dabid do dyindyinaya.” Ki nadichanan ni Dabid so naypirwa do pinarinaw ni Saulo.

12Myan kāmo ni Saulo di Dabid, ta myan dya si ĀPO. Ki kinarwan ni ĀPO si Saulo. 13Dawa, pinayam ni Saulo si Dabid do salapen na, kan pinayparin na iya a komander no asaw a rībo a soldādo, as indaōlwan na sa do kapachigobat. 14Nagballīgi si Dabid do tabo a pinariparin na maynamot ta myan dya si ĀPO. 15Do nakaboyaw sya ni Saulo so taywara a kaballīgi ni Dabid, naypangay paw kāmo na dya. 16Ki siraw tabo tawotawo no Israel kan Joda, ki chadaw da si Dabid, ta kanāyon a magballīgi do kaidaōlo naw dyirad bōyot na do kapachigobat.

17Do dāwri, inbahey ni Saulo di Dabid a kāna, “Chaya dyaw matonengaw a balāsang ko a si Merab. Itoroh ko na dyimo a baketen mo, ki basta pagsīrbyan mo yaken a sitotored kan ilāban mo iyaw no gobat saw ni ĀPO.” Ta no kapangktokto ni Saulo, ki kāna, “Iyabaw mismo a tanoro ko mangdiman anchi sya an dya siraw Pilisteowaw!”

18Initbay ni Dabid di Saulo a kāna, “Sino ako, kan āngo lang iyaw no pamilya ko mana partīdos ko do Israel tan mayparin ako a manōgang a mahakay no āri?” 19Ki do arawaw a maitoroh si Merab a balāsang ni Saulo a machikabahay di Dabid, basbāli a naitoroh a binaket ni Adriyel a taga Meholah.

20Do dāwri, iyaw asa paw a balāsang ni Saulo a si Mikal, ki magayat di Dabid. Do nakadāmagaw syay ni Saulo, naay-āyo. 21Do kapangtokto ni Saulo binata na a kāna, “Iya danaw itoroh ko tan mayparin a asdok dya kan tan do tanoro dan Pilisteowaw, ki madiman.” Dawa, inbahey narana di Dabid a kāna, “Nya danaw somarono a chansa mo tan mayparin ka manōgang ko.”

22Minandaran sa ni Saulo saw opisyalis saw a kasarīta da si Dabid a sililimed, kan ibahey da a kon da, “Mahwahokaw āryaya dyimo. As siraw tabo no opisyalis naw, ki chadaw daymo. Dawa, mayparin ka na pakono a manōgang na ah.”

23Inbahey da di Dabid nyaya. Ki initbay ni Dabid a kāna, “Na, sinsinanori dyinyo no mayparin a manōgang no āri? Yaken, ki mapobri akwaya kan sinsinan ako lang.”

24Do nakaipadāmag daw no opisyalis saw ni Saulo so inbahey naw ni Dabid, 25binata ni Saulo a kāna, “Ibahey nyo nya di Dabid, ‘Abaw matarek a chakey no āryaw a bāyad no nobyaw an dya asa gasot a pisot* a Pilisteo dimanen mo tan mabahes na saw kabōsor no āri.’ ” Ta no plāno ni Saulo, ki siraw no Pilisteo saw mangdiman si Dabid.

26Do nakaibahey daw no opisyalis saw so nyaya di Dabid, naay-āyo a mayparin a manōgang no āryaw. Dawa, sakbay no arawaw a naikeddeng, 27si Dabid kan bonggoy na saw a mahahakay, ki komnaro sa kan nangay sa nangdiman so dadwa gasot a Pilisteo. As insabat na a inparawat di āri iyaw inbahey naw a bidang† no pisot tan mayparin a manōgang na. Dawa, intoroh ni Saulo si Mikal di Dabid a baket na.

28Do nakadlaw naw ni Saulo a si ĀPO, ki myan di Dabid, as kan iyaw no balāsang naw a si Mikal, ki oyod a chadaw na si Dabid, 29naypaypāngay paw kāmo dya ni Saulo. Dawa, nāw narana kabōsor si Dabid manda do pandan byay na.

30Do kāda kadarop da no komander da saw no Pilisteowaw, naypaypāngay paw nakapagballīgi ni Dabid dyira kan siraw no tabo bōyot saw ni Saulo. Nyaw naynamotan na a naglatak ngaran ni Dabid.