No Kapanganyib so Dyos
1Annadan mo kaparin mo an mangay ka do bahay no Dyos. Maganaganay a maypasngen ka daw a mangadngey kan no abos arang a manoroh so dāton a dya makapatak so pariparinen na a madi.
2Taykalo kaba maychirin.
Nyeng kaba mangibahey do Dyos.
No Dyos, ki myan do hanyit.
As imo, ki myan ka do tanaya.
Dawa, karohen mwabaw maychirin.
3Sobra riribok manoroh siras tayēnep a dya pakaychehan.
Sobra kapaychirin, ki parinen naymo a abos arang.
4Anchan magsapata ka do Dyos, maybabalay kaba mangtongpal sya. No Dyos, ki masoyot aba do abos arang. Tongpalen mo insapata mo. 5Maganaganay dya magsapata kan magsapataw a dyi mo a tongpalen. 6Palobōsan mwabaw dāngoy mo a mangikwan dyimo do kapaygatos. As ibahey mwaba do pādyaw do timplo a riro sapata mwaw. Tod mo a pasolihen Dyos, kan āngwan rārayawen na tabo naparinan mo. 7Āro a tayēnep kan āro a chirin, ki abaw sinpaspangan da. Basbali, anyiben mo Dyos.
No Kabo no Sinpaspangan no Kinabaknang
8An maboya mo mapobri a naidadanes do asa logar, kan napakaro so kinalinteg kan kalintegan dyira, chasdaaw mwabaw nya. Ta kāda opisyal, ki myan matwatohos a opisyal a manyidechideb sya, kan myan paw matwatohos a magtoray dyira dadwa a mangchidechideb sira. 9Iyaw kapaypāro no mahap do tana, ki hapen no tabo. Iyaw āri a mismo, ki mamya do āpit.
10Aran sino a malakam so kwarta, manawob abaw kwarta na.
Aran sino a madaw so kinabaknang, chapnek nabaw maganansya na.
Aran nyaya, ki abos sinpaspangan.
11Do kapaypāro no warawara,
komwan kapaypāro no mamatawos sira.
Aryoriw kaganayan no akin dyiraw sira?
Pī! Tod na sa lang a chichiban.
12No kapakaycheh no trabahador, ki maīmas
aran āro mana dēkey kanen na.
Ki no kinabaknang no mabaknang,
pakaychehen naba.
13Myan naboya ko a makalidliday a kayayan do lōbongaya.
Kinabaknang a nāw na a banbantayan a nyaw pakaynyinan no mismo a inawan na
14mana mabo kinabaknang na do boysit na.
As do nakapakapōtot na so mahakay,
ki aba polos natokos na dya.
15Sibahabahas tawo a inyanak ni ānang na.
As akmas nakawara na, ki komwan kakaro na.
Aba polos maiyonot na a yapo do nayhohopagan na
a panawbi na do tanoro na.
16Nya paw makalidliday a kayayan:
Akmas nakawara no tawo, komwan kakaro na.
As āngo mahap na
do kapayhohopag na a manglakat so salawsaw?
17Do tabo araw na, ki koman do kasarisaryan
a palālo so kaōpay, kaynyin, kan kasoli.
18Nyaw napatakan ko a maganay kan kosto do tawo: iyaw kakan, kaynom, kan kapaychichwas so ragragsak do tabo nayhohopagan a tinarabāko na do lōbongaya ranan papere a araw no kabyay na a intoroh no Dyos dya ta nawri danaw naikeddeng dya. 19An torohan Dyos aran sino a tawo so kinabaknang kan warawara, kan torohan na pa iya so kāya na a pagragsakan na, iyaw machita a mangrawat so kayayan kan kasoyot do tarabāko na. Nya, ki sāgot no Dyos. 20Masanyib aba a mangtokto so araw sa do kabyay na maynamot ta nāw no Dyos a apnohen ōras na do pakaragsakan no pōso na.